IMAAMATI 9 - KITABI HABARI MOPIOHE

Tei Haruna lopodewo bake

¹ Ngohui lapatio mao̒ lo upacala pomantaliyalo boito yilapato, todulahee owalulio, tei Musa lotiangai olei Haruna wau mongo walai̒o wau mongo tau̒wa bangusa lo Isirai̒lu.

² Ualei Musa odelei Haruna, “Hamawa mao̒ sapi ulai̒ buboto tuwau wau himba ulai̒ tuwau, duduuluolo udiila otailolio. Podewowa mao̒ binatangi duuduluo boito ode Eeya, sapi ulai̒ duo̒lo bake pongambunguala dusa, wau himba ulai̒ duo̒lo bake yilalango.

³ Lapatao̒ ahuli mao̒ bangusa lo Isirai̒lu mopodewo batade ulai̒ tuwau duo̒lo bake pongambungualo dusa wau tuwau walao̒ sapi wau tuwau walao̒ himba u tinggai o umulu ngotaunu wau diila otailolio duo̒lo bake yilalango.

⁴ Ahuli mao̒ timongolio mopodewo olo sapi ulai̒ tuwau wau batade ulai̒ ode bake lo polodame. Ngoa̒amilalo boito musi podewo mao̒ limongolio ode Eeya pee̒-pee̒enta wolo bake pohinta u piladeta lowinulo, sababu todulahee botie Eeya meidungga mai ode limongolio.”

⁵ Ngoa̒amila u pilolahuli lei Musa dilelo mota limongolio ode talu lo Kema, wau ngoilanggubu umati helo tia̒mbu mota teto loi̒baadati to Eeya.

⁶ Lapatao̒ tei Musa loloi̒ya mao̒, “Eeya lopoa̒hu mai olimongoli mopohutu mao̒ utie alihu timongoli mowali momilohe tinelo owoluo lo Eeya.”

⁷ Lapatao̒ uito tio loloi̒ya mao̒ odelei Haruna. “Ponao̒lo mota ode mesba wau podapata mao̒ bake pongambungualo dusa wau bake yilalango, alihu dusamu wau dusa lo umati ambunguo mai lo Eeya. Pohutua mao̒ uito debo odelo upilo malentai lo Eeya.”

⁸ Yi malonao̒lo tei Haruna ode mesba wau longolotao̒ sapi ulai̒ umaa pobakeyolo duo̒lo pongambungualo dusalio lohihilao.

⁹ Mongo walae̒e Haruna lopo tunggulao̒ duhu lo binatangi boito odelei Haruna, wau tio lopolomo mao̒ tiongongoa lo uluu̒lio ode delomo duhu boito, wau lopomaide to tutuu-ngeyaalo to opato tutulo mesba. Lapatao̒ duhu ulebelio piloloohio towumbato mesba.

¹⁰ Tabo, oile wau wimbihu u mopiohe daa̒ lobinatangi boito yilalangio toitaato mesba, debo odelo upilo malenta lo Eeya odelei Musa.

¹¹ Bo tapu wau walito lo binatangi boito yilalangio to bulemengo kema.

¹² Lapatao̒ tei Haruna longolotao̒ binatangi duo̒lo bake yilalango ode batangalio lohihilao. Mongo walae̒e Haruna lopo tunggulao̒ duhu lo binatangi boito ode olio, lapatao̒ tio lopotooheo̒ to opato biihu mesba.

¹³ Lapatao̒ uito timongolio lohudu mao̒ ode olio lunggongo wau pakaakasi wewo lo binatangi boito, wau tio lolalangao̒ toitaato mesba.

¹⁴ Lapatao̒ tuango ombongo wau bungolopa lo binatangi boito yiluloalio wau yilalangio wolo bake yilalango toitaato mesba.

¹⁵ Lapatao̒ uito tio lopodewo mao̒ batade duo̒lo bake pongambungualo dusa lo umati. Batade boito ilolotio wau pilodewolio debo odelo tobake pongambungualo dusalio lohihilao.

¹⁶ Lapatao̒ hilamalio olo binatangi duo̒lo bake yilalango, wau pilodewolio helo duduo̒ wuu̒du.

¹⁷ Lapatao̒ uito pilodewolio bake pohinta; hilamalio mao̒ labu ngaau̒po, wau yilalangio toitaato mesba. Uito yito poduhenga tobake yilalango timii̒du dulahu.

¹⁸ Lapatao̒ ilolotio mao̒ olo sapi ulai̒ tuwau wau himba ulai̒ tuwau duo̒lo bake lo polodame ode umati. Mongo walae̒e Haruna lopo tunggulao̒ duhu lo binatangi boito to olio, tulusi pilopo toohio to opato biihu mesba.

¹⁹ To wimbihu u otabo losapi wau batade boito pilopodutu limongolio

²⁰ toitaato duhelo binatangi duuduluo boito, lapatao̒ tei Haruna lolalangao̒ toitaato mesba.

²¹ Duhelo wau bungolopa olowala lo binatangi boito pilodewolio odelo dewo poo̒taa ode Eeya. Uito yito tayadu lomongo iimamu, debo odelo upilo malentao̒ lei Musa.

²² Lapatao̒ lopodewo mao̒ ngoa̒amila bake boito, tei Haruna lomintaa̒ mola uluu̒lio ode yitaato umati lo Isirai̒lu wau lobalakati olimongolio, lapatao̒ tio lolaahe mola.

²³ Lapatao̒ tei Musa wolei Haruna tilumuwotao̒ ode delomo Kema lo Eeya. Lapatao̒ uito timongolio yilumualai wau helo balakati mao̒ umati. Tulusi ngoilanggubu umati lo Isirai̒lu loo̒onto tinelo owoluo lo Eeya.

²⁴ Debolo Eeya lopo tuhutai tulu ulomobu tunggula yilaahu bake yilalango wau wimbi-wimbihio u otabo toitaato mesba. Tou̒ umati lo Isirai̒lu loo̒onto mao̒ uito, timongolio helo ngibo-ngiibode meengahe tulusi helo sujudu wau lolubo.