IMAAMATI 8 - KITABI HABARI MOPIOHE

Tei Musa lopo mantali mao̒ olei Haruna wau mongo walai̒o

¹ Eeya lotahuda odelei Musa,

² “Tianga mao̒ tei Haruna wau mongo walai̒o wau pii̒delowa mai pakeyangi li iimamu, winulo upacala, sapi ulai̒ buboto tuwau duo̒lo bake pongambungualo dusa, himba ulai̒ ngopanggalo wau ngokalanji roti udiila oragi.

³ Lapatao̒ ahuli mao̒ ngoilanggubu umati lo Isirai̒lu motia̒mbu totalu huhebu lo Kema-U̒.”

⁴ Tei Musa lopohutu mao̒ wolo upilo malenta lo Eeya. Tou̒ ngilanggubu umati malo tia̒mbu totambati boito,

⁵ tei Musa loloi̒ya mao̒ olimongolio, “Upohutuo lowatia masaatia botie yito palenta lo Eeya.”

⁶ Lapatao̒ tio lopoa̒hu olei Haruna wau mongo walai̒o modudulai ode talu wau lopo belesi batanga.

⁷ Lapatao̒ uito tio lopopake mao̒ pakeyangi li iimamu to olei Haruna: kameja, bintolo wohuta wau jumba. Wau olo boo̒ li iimamu u bilintolao̒ to wohutalio wolo bintolo monto kaingi moa̒aluti.

⁸ Lapatao̒ pilopo hulialio tau̒bu duhelo to olei Haruna, wau ode delomo tau̒bu duhelo boito pilopo tuwotio Urim wau Tumim.

⁹ Lapatao̒ pilakealio sulubani to lunggongee Haruna, wau to sulubani boito pilakealio pake hulawa, u tuotio deu̒ tei Haruna malowali miliki lo Eeya. Ngoa̒amila boito pilohutu lei Musa loduduo̒ palenta lo Eeya to olio.

¹⁰ Lapatao̒ tei Musa lohama winulo upacala wau lopo maideo̒ to Kema lo Eeya wau totoonulalo powimumutio. Lou̒ odito ngoa̒amilalo pilohetulio ode Eeya.

¹¹ Ngoi̒di lonto winulo boito pilo molotii̒o mao̒ poo̒opitu ode yitaato mesba wau ngoa̒amila powimumutio, wau olo ode yitaato baki wau wumbatio. Lou̒ odito ngoa̒amilalo pilohetulio ode Eeya.

¹² Lapatao̒ uito tei Musa lopo mantali mao̒ olei Haruna wolo loluwato ngoi̒di winulo upacala ode yitaato lunggongio.

¹³ Lapatao̒ tio lopoa̒hu mongo walae̒e Haruna lodudulai ode talu. Pilopo pakelio mao̒ olimongolio kameja wau bintolo wohuta. Lapatao̒ dilutuwalio sulubani to lunggongi mongolio debo odelo upilo malentao̒ lo Eeya to olio.

¹⁴ Lapatao̒ uito tei Musa lohama sapi ulai̒ buboto tuwau duo̒lo bake pongambungualo dusa. Tei Haruna wau mongo walai̒o helo podutu mao̒ uluu̒ limongolio toitaato longgongo binatangi boito.

¹⁵ Lapatao̒ tei Musa longolotao̒ wau lohama ngotayadu duhulio. Duhu boito pilomaidio wolo tingongoa lo uluu̒lio to tutuu-ngeyaalo, totimii̒du tutulo mesba, alihu mesba boito pohetuola ode Allahu Taa̒ala. Duhu ulebelio pilomuhutio mao̒ towumbato mesba. Odi-odieelo mola pohuliilio lomesba boito pilo mantali wau pilohetu ode Eeya.

¹⁶ Lonto sapi u boheli iloloto boito, tei Musa lohama mao̒ ngoa̒amila tabo ulomolu tuango ombongio, oile wolo tabolio wau wimbihu u mopiohe daa̒ lonto wantohio. Ngoa̒amila boito yilalangio toitaato mesba.

¹⁷ Bo tapu losapi boito, walitio, lebelio lotuango ombongo tuwo-tuwoto toniyaalio, oditolio ngoilanggubu sapi boito ngopohia pakaakasi umaa pilopowiwi yilalangio to bulemengo kema debo odelo upilo malentao̒ lo Eeya.

¹⁸ Lapatao̒ tei Musa lohama mao̒ himba ulai̒ duo̒lo bake yilalango, lapatao̒ tei Haruna wau mongo walai̒o helo podutu mao̒ uluu̒ limongolio toitaato lunggongo himba boito.

¹⁹ Tei Musa longolotao̒ himba boito wau duhulio pilomuhutio to opato biihu mesba.

^20-21 Lapatao̒ binatangi boito ilo-ilolotio mao̒ wau tuango ombongo boli oa̒atio yilulowalio wolo taluhu. Lunggongo, tabo, wau lebelio monto tapu lohimba ulai̒ boito yilalangio duo̒lo bake yilalango toitaato mesba debo odelo upilo malentao̒ lo Eeya olio. Boolo bake lou̒ aalo boito loo̒sanangi hilaa lo Eeya.

²² Lapatao̒ tei Musa luli lohama mao̒ himba ulai̒ tuwau duo̒lo bake pomantaliyalo li iimamu. Tei Haruna wau mongo walai̒o helo podutu mao̒ uluu̒ limongolio toitaato lunggongo himba boito,

²³ lapatao̒ tei Musa longolotao̒. Lapatao̒ uito hilamalio ngoi̒di duhu lobinatangi boito, wau pilomaidio to pambilinga olowala lei Haruna, to tiyombu lo uluu̒ olowala, tiyombu lo oa̒ato olowalalio.

²⁴ Lapatao̒ tio helo poa̒hu mongo walae̒e Haruna mohimbidei, tulusi pilaidelio olo duhu ngoi̒di to pambilinga olowala limongolio, to tiyombu lo uluu̒ olowala, wau tiyombu lo oa̒ato olowala limongolio. Duhu ulebelio pilomuhutio ode opato biihu mesba.

²⁵ Tei Musa lohama mao̒ tabo lohimba boito, patahio u otabo, ngoa̒amila tabo ulomolu tuango ombongio, wimbihu u mopiohe daa̒ lonto wantohio, oile wolo tabolio wau oa̒atio olowala.

²⁶ Monto kalanji utua-tuanga roti diila oragi u mapilodewo ode Eeya, tei Musa lohama mao̒ roti ngobotu mohulodu u pilohutulio wolo winulo wau roti ngobotu u molipa. Roti boito dilutulio mao̒ toitaato tabo wau bungolopa lohimba olowala.

²⁷ Ngoa̒amilalo pilopo dutulio toitaato uluu̒ lei Haruna wau mongo walai̒o, lapatao̒ timongolio helo podewo mao̒ odelo dewo poo̒taa ode Eeya.

²⁸ Lapatio mao̒ tei Musa lohama ua̒alo boito lonto olimongolio wau lolalangao̒ toitaato mesba, pee̒-pee̒enta wolo bake yilalango duo̒lo bake pomantaliyalo. Boolo bake lou̒ aalo boito loo̒sanangi hilaa lo Eeya.

²⁹ Lapatao̒ tei Musa lohama duhelo himba boito wau lopodewo mao̒ odelo dewo poo̒taa ode Eeya. Ui-uitolo tayadio lei Musa lonto himba ulai̒ u pilopobake duo̒lo upacala pomantaliyalo li iimamu. Ngoa̒amilalo pilohutu mao̒ lei Musa debo odelo upilo malenta lo Eeya olio.

³⁰ Lapatao̒ uito tei Musa lohama ngotayadu lonto winulo upacala wau ngotayadu lo duhu uwoluo toitaato mesba, tulusi pilo mutatio mao̒ odelei Haruna wau mongo walai̒o wau to pakeyangi limongolio. Wolo dudelo boito tei Musa lopoheetu olimongolio wau pakeyangi limongolio ode Eeya.

³¹ Lapatao̒ tei Musa loloi̒ya mao̒ odelei Haruna wau mongo walai̒o, “Tubuwalo tapu lobake boito totalu lohuhebu Kema lo Eeya. Moduduo̒ palenta lo Eeya, timongoli musi molamelao̒ tapu boito teto wolo roti lobake pomantaliyalo uwoluo todelomo kalanji.

³² Tapu wau roti u lebelio musi lalango mao̒ limongoli tunggula maahu.

³³ Ngotilonggadu pitu hui mola timongoli diila mowali mololaa mao̒ Kema lo Eeya tunggula upacala pomantaliyalo olemu yilapato.

³⁴ Eeya lomalentai alihu wolo u pohutuwonto todulahee botie pohutuwola tulusi. Wolo upacala boito duduu-sawaalo limongoli ilaambungu.

³⁵ Ngotilonggadu pitu hui mola, hui wau dulahu, timongoli musi motitolaa totalu huhebu lo Kema u mohutu mao̒ wolo upilo malentai lo Eeya. Wonu timongoli diila mopohutu mao̒, timongoli maamate. Ui-uitolo upilo malentai lo Eeya olaatia.”

³⁶ Lapatao̒ tei Haruna wau mongo walai̒o helo pohutu mao̒ ngoa̒amila upilo malenta lo Eeya lotimbuludei olei Musa.