IMAAMATI 4 - KITABI HABARI MOPIOHE

Bake ode duduu-sawaalo udiila tilunggai

¹ Eeya lopoa̒hu olei Musa

² mopo malalumu mao̒ ode bangusa lo Isirai̒lu deu̒ boli tatoonu wambai̒o tadiila wolo tilunggai odusa sababu molambanga tala tuwau monto papaa-rentaalo Eeya, musi modudua̒ wuu̒du botie.

³ Wonu bolo tao̒dusa boito ti Iimamu Daa̒, tilinggula bangusa lo Isirai̒lu modudua̒ ilototala, tio musi mopobake mao̒ sapi ulai̒ buboto tuwau udiila o tailolio ode Eeya alihu dusaalio ambunguo-Lio.

⁴ Sapi boito musi deloolio mota ode huhebu Kema lo Eeya. Ti Iimamu Daa̒ musi mopodutu uluu̒lio toitaato lunggongo binatangi boito, lapatao̒ mongolotao̒ totalu lo Kema.

⁵ Ngotayadu monto duhulio musi deloolio mota potuwotolo ode delomo Kema.

⁶ Lapatao̒ tio musi mopolomo mao̒ tingongoa lo uluu̒lio ode delomo duhu boito wau mopo molotia̒ao̒ poo̒opitu totalu lopodehu ulopo walahe Huwali Leidaa̒ Mantali.

⁷ Ngotayadu monto duhu boito musi pomaideo̒ to tutuu-ngeyaalo totimii̒du tutulo mesba lodupa umoonu todelomo Kema, wau lebelio musi pomuhuta mao̒ towumbato mesba lobake yilalango uwoluo totalu huhebu lo Kema.

⁸ Ti iimamu musi mohama mao̒ ngoa̒amila tabo losapi ulai̒ boito, deu̒yito-yito tabo u momolu tuango ombongio,

⁹ oile wolo tabolio wau wimbihu u mopiohe daa̒ monto wantohio.

¹⁰ Ngoa̒amila boito musi lalangolio toitaato mesba lobake yilalango debo odelo tobake lo polodame.

¹¹ Bo tapu losapi boito, walitio, lunggongio, oa̒atio, lebelio lotuango ombongio, leituwoto toniyaalo,

¹² oditolio ngoa̒amilalo mao̒ ngopohia wimbihu umaa pilopowiwi, musi deloo mota ode bulemengo Kema. Mota teto sapi boito musi lalangolo toitaato ayu podiio̒ totambati polapilalo wahu, deu̒yito-yito tambati u pilohetu mao̒ woleeto.

¹³ Wonu bolo tao̒dusa boito ngoilanggubu umati lo Isirai̒lu, sababu diila sangaja lolambanga tala tuwau palenta lo Eeya,

¹⁴ yi hua̒a lapatio mao̒ dusa boito mailotaawa, umati boito musi modelo mota sapi ulai̒ buboto tuwau ode talu Kema lo Eeya. Binatangi boito musi podewolo duo̒lo bake pongambunguala dusa.

¹⁵ Mongo tau̒wa lobangusa musi mopodutu mao̒ uluu̒ limongolio toitaato lunggongo binatangi boito, lapatao̒ mongolotao̒ totambati boito.

¹⁶ Ti Iimamu Daa̒ musi modelo mao̒ ngotayade duhu lo binatangi boito tumuwoto ode delomo Kema.

¹⁷ Mota teto tio musi mopolomo mao̒ lo tiongongoa lo uluu̒lio ode delomo duhu boito lapatao̒ mopo molotia̒ao̒ poo̒opitu totalu lopodehu ulopo walahe Huwali Leidaa̒ Mantali.

¹⁸ Ngotayadio poli musi pomaide mao̒ to tutuu-ngeyaalo totimii̒du tutulo mesba lodupa todelomo Kema, wau lebelio musi pomuhuta mao̒ to wumbato mesba tambati lobake yilalango u woluo totalu huhebu lo Kema.

¹⁹ Ngoa̒amila tabo lo binatangi boito musi hamaalo lapatao̒ lalangolo tomesba.

²⁰ Dudelolio debo odelo todewo sapi ulai̒ duo̒lo bake pongambungualo dusa. Odieelo mola pohuli li Iimamu Daa̒ mopodewo mao̒ bake duo̒lo duduu-sawaalo lo umati, yi duduu-sawaalo boito maa ambunguo lo Eeya.

²¹ Lapatao̒ sapi ulai̒ boito musi deloolo ode bulemengio, wau lalangolo to bulemengo Kema, debo odelo todewo sapi ulai̒ duo̒lo bake pongambungualo dusa li Iimamu Daa̒ boito lohihilao. Odi-odieelo mola pohuli lo mopodewo bake pongambungualo dusa lo umati.

²² Wonu bolo tao̒dusa boito ngotaalio lotaa okawasa sababu diila sangaja lolambanga tala tuwau palenta lo Eeya,

²³ yi hua̒a lapatio mao̒ tio mongalati mai, tio musi mopobake mao̒ batade ulai̒ tuwau udiila o tailolio duo̒lo pongambungualo dusalio.

²⁴ Tio musi mopodutu mao̒ uluu̒lio toitaato lunggongo binatangi boito, lapatao̒ mongolotao̒ to ambahu tilayo lomesba, tambati pongolotalo binatangi duo̒lo bake yilalango.

²⁵ Ti iimamu musi mopolomo mao̒ tiongongoa lo uluu̒lio ode delomo duhu lobinatangi boito lapatao̒ mopo maideo̒ to tutuu-ngeyaalo totimii̒du tutulo mesba wau mopo muhutao̒ labitio ode wumbato mesba.

²⁶ Lapatao̒ ngoa̒amilalo tabo lobinatangi boito musi lalangolo toitaato mesba, debo odelo tobake lo polodame. Odi-odieelo mola pohuli li iimamu mopodewo mao̒ lobake duo̒lo ngotaalio lotao̒ o kawasa, yi tau boito maa ambunguo lo Eeya.

²⁷ Wonu bolo ngotaalio lo ulipu biasa mohutu dusa sababu diila sangaja molambanga tala tuwau palenta lo Eeya,

²⁸ yi hua̒a lapatio mao̒ tio mongalati mai, tio musi mopobake mao̒ batade bilango udiila otailolio.

²⁹ Tio musi mopodutu mao̒ uluu̒lio toitaato lunggongo binatangi boito, lapatao̒ mongolotao̒ to ambahu tilayo lomesba tambati hepo ngolotalo binatangi duo̒lo bake yilalango.

³⁰ Ti iimamu musi mopolomo mao̒ tingongoa lo uluu̒lio ode delomo duhu lobinatangi boito, lapatao̒ mopo maideo̒ to tutuu-ngeyaalo totimii̒du tutulo mesba wau mopo muhutao̒ labitio towumbato mesba.

³¹ Ngoa̒amila tabo lo binatangi boito musi hamaalo debo odelo tobake lo polodame. Tabo boito musi lalanga mao̒ li iimamu toitaato mesba, alihu boolio moo̒sanangi hilaa lo Eeya. Odi-odieelo mola pohuli li iimamu mopodewo mao̒ lobake duo̒lo dusa lo ulipu biasa, yi tau boito maa ambunguo lo Eeya.

³² Wonu bolo ngotaalio mopodewo mao̒ himba tuwau duo̒lo pongambungualo dusalio, himba boito musi bilango wau diila otailolio.

³³ Tio musi mopodutu mao̒ uluu̒lio toitaato lunggongo binatangi boito, lapatao̒ mongolotao̒ to ambahu tilayo lo mesba, tambati hepo ngolotalo binatangi duo̒lo bake yilalango.

³⁴ Ti iimamu musi mopolomo mao̒ tingongoa lo uluu̒lio ode delomo duhu lobinatangi boito, lapatao̒ mopo maideo̒ to tutuu-ngeyaalo to timii̒du tutulo mesba, wau mopo muhutao̒ labitio towumbato mesba.

³⁵ Lapatao̒ ngoa̒amila tabo lo binatangi boito musi hamaalo debo odelo tobake lo polodame. Tabo boito musi lalangolo toitaato mesba, pee̒-pee̒enta wolo bake lou̒ aalo upilodewo ode Eeya. Odi-odieelo mola pohuli li iimamu mopodewo lobake duo̒lo dusa lotau boito, yi tio maa ambunguo lo Eeya.