IMAAMATI 3 - KITABI HABARI MOPIOHE

Bake lo polodame

¹ Wonu bolo tahingota-ngotaawa mopodewo mao̒ sapi tuwau duo̒lo bake lo polodame, sapi boito mowali ulai̒, mowali bilango, bo diila mowali o tailolio.

² Taa u mopodewo mao̒ musi mopodutu lo uluu̒lio toitaato lunggongo binatangi boito lapatao̒ mongolotao̒ totalu huhebu Kema lo Eeya. Mongo iimamu wali lei Haruna musi mopo muhutao̒ duhu losapi boito to opato biihu mesba.

³ Duo̒lo bake lo polodame ode Eeya, ti iimamu musi mopodewo mao̒ oo̒o-longowalo botie monto binatangi boito: tabo u momolu tuango ombongio,

⁴ oile wolo tabolio wau wimbihu u mopiohe daa̒ monto wantohio.

⁵ Ngoa̒amilalo boito pee̒-pee̒enta wolo bake yilalango wewolio, musi lalangolo toitaato mesba. Boolo bake lou̒ aalo boito moo̒sanangi hilaa lo Eeya.

⁶ Wonu u podewolo duo̒lo bake lo polodame boito himba tuwau meaalo batade, binatangi boito mowali ulai̒, mowali bilango, bo diila mowali o tailolio.

⁷ Wonu bolo tahingota-ngotaawa mopodewo himba tuwau, tio musi modelo mota ode Kema lo Eeya.

⁸ Mota teto tio musi mopodutu uluu̒lio toitaato lunggongo himba boito lapatao̒ mongolotao̒ totalu lo Kema. Lapatao̒ ti iimamu musi mopo muhutao̒ duhu lohimba boito to opato biihu mesba.

⁹ Duo̒lo bake lo polodame ode Eeya, ti iimamu musi mopodewo mao̒ oo̒o-longowalo botie monto himba boito: tabolio, ngoa̒amilalo patahio u otabo ilolongo totili lotulalo wulealio, tabo u momolu tuango ombongio,

¹⁰ oile wolo tabolio wau wimbihu u mopiohe daa̒ monto wantohio.

¹¹ Ti iimamu tao̒ tuugasi musi molalangao̒ ngoa̒amila boito toitaato mesba duo̒lo bake lou̒ aalo ode Eeya.

¹² Wonu u podewolo batade tuwau, taa umopodewo mao̒ musi modelo mota ode Kema lo Eeya.

¹³ Mota teto tio musi mopodutu uluu̒lio toitaato lunggongo batade boito lapatao̒ mongolotao̒ totalu lo Kema. Ti iimamu musi mopo muhutao̒ duhu lo binatangi boito to opato biihu mesba.

¹⁴ Duo̒lo bake lou̒ aalo ode Eeya, ti iimamu musi mopodewo mao̒ oo̒o-longowala botie monto batade boito: tabo u momolu tuango ombongio,

¹⁵ oile wolo tabolio wau wimbihu u mopiohe daa̒ monto wantohio.

¹⁶ Ti iimamu tao̒ tuugasi musi molalangao̒ ngoa̒amila boito toitaato mesba. Boolo bake lou̒ aalo boito moo̒sanangi hilaa lo Eeya. Ngoa̒amila tabo lo binatangi boito duo̒lo Eeya.

¹⁷ Taulo Isirai̒lu sama-samaata diila mowali molamela tabo wau duhu. Wuu̒du boito pohu-pohutu u ohiheo-hiheolo mao̒ wau musi dungohe mao̒ lotimii̒du taulo Isirai̒lu penu boli tou̒toonu tio bilu-biluloa̒.