IMAAMATI 27 - KITABI HABARI MOPIOHE

Wuu̒du pasali lodewo ode Eeya

¹ Eeya longohi mao̒ olei Musa

² wuu̒du botie ode bangusa lo Isirai̒lu. Wonu bolo ngotaalio podewolo ode Eeya u motolota tuwaulio lo danti utolo-tolomodu, yi tau boito mowali tolotalo wolo ngojumula doi

^3-7 moduduo̒ halaga upohu-pohutu to Kema lo Eeya: – toitaato wolomo pulu lotaunu: talolai̒ mopulaa limo doi talaa̒ taabua mopulu doi talaa̒ – wolota dulopulu demola wolomo pulu lotaunu: talolai̒ limo lopulu doi talaa̒ taabua tolopulu doi talaa̒ – wolota limo tunggula dulopulu lotaunu: talolai̒ dulo pulu doi talaa̒ taabua mopulu doi talaa̒ – towalungo limo lotaunu: talolai̒ limo doi talaa̒ taabua totolu doi talaa̒

⁸ Wonu tau boito odanti laba-labaalo mosikini u momayali halaga utilantu mao̒, yi tio musi modelo mota taa u mapilodewo to Eeya boito odeli iimamu. Ti iimamu musi molantu mao̒ halaga ulebe moopa motuuu̒de lou̒ omamboa lotau boito.

^9-10 Wonu bolo danti boito tomimbihu binatangi halale umowali tolimoolo odelo dewo ode Eeya, taa u odanti boito diila mowali moluloa̒ao̒ wolo binatangi wewo, sababu ngoa̒amila u pilodewo ode Eeya mowali miliki lo Eeya. Wonu tio debo moluloa̒ao̒ olo, yi duuduluo binatangi boito mowali miliki lo Eeya.

¹¹ Bo wonu danti boito tomimbihu binatangi haramu udiila mowali tolimoolo odelo dewo ode Eeya, yi taa u odanti boito musi modelo mota binatangi boito odeli iimamu.

¹² Ti iimamu mamolantu mao̒ halagaalio modudua̒ owowoluwoa lobinatangi boito. Wau halaga u matilantu mao̒ yito halaga mate.

¹³ Wonu tau boito ohilaa motolotao̒ binatangilio, tio musi momayali mao̒ halagaalio duhengala wolo dulopulu poloseni.

¹⁴ Wonu bolo tahingota-ngotaawa mopodewo belelio ode Eeya, ti iimamu molantu mao̒ halagaalio modudua̒ owowoluwoa lobele boito. Halaga u matilantu mao̒ yito halaga mate.

¹⁵ Wonu tau boito ohilaa motoloto belelio, tio musi momayari mao̒ halagaalio duhengala wolo dulopulu poloseni.

¹⁶ Wonu bolo taahi ngota-ngotaawa mopodewo ngotayadu monto hutalio ode Eeya, halagaalio musi tantuwola moduduo̒ jumulaa lobili u palaluwola tou̒ mopomulo mao̒ huta boito. U timii̒du dulo pulu lokilo pale halagaalio mopuulo pita doi talaa̒.

¹⁷ Wonu huta boito podewolo anggadu Taunu Powuwalingalo, halagaalio musi bayaliyalo polupolu.

¹⁸ Wonu huta boito podewolo lapatio mao̒ Taunu Powuwalingalo, ti iimamu musi motakusili mao̒ halagaalio koontangi moduduo̒ jumulaa taunu udonggo woluo dilumutu Taunu Powuwalingalo u wumbutio mola, lapatao̒ molantu mao̒ halaga ulebe muura.

¹⁹ Wonu taa u mopodewo halabolu boito ohilaa motolotao̒, tio musi momayali mao̒ halagaalio duhengala wolo dulopulu poloseni.

²⁰ Wonu tio mopotali halabolu boito lou̒ diila meimulo motolotao̒ monto Eeya, yi tio diilalo ohaku motoloto halabolulio.

²¹ Todelomo Taunu Powuwalingalo u wumbutio mola, halabolu boito mowali miliki lo Eeya u ohiheo-hiheolo mao̒, wau wohi ode mongo iimamu.

²² Wonu bolo tahingota-ngotaawa mopodewo ode Eeya halabolu ngopita umaa tilaliilio,

²³ ti iimamu musi motakusili mao̒ halagaalio moduduo̒ jumulaa lotaunu udonggo woluo dilumutu Taunu Powuwalingalo u wumbutio mola. Lapatao̒ tau boito musi momayali mao̒ halagaalio to dulahulo boito. Doi boito mowali miliki lo Eeya.

²⁴ Todelomo Taunu Powuwalingalo, halabolu boito musi powalingolo ode taa ohuu̒wolio ubohu-bohulio meaalo ode waliilio.

²⁵ Ngoa̒amila halaga musi tantuwola moduduo̒ halaga upohu-pohutu to Kema lo Eeya.

²⁶ Binatangi ubohulo pilotutu mai yito miliki lo Eeya, oditolio diila mowali podewolo ode bake iloheela lohilao. Walao̒ sapi, walao̒ himba meaalo walao̒ batade ubohulo pilotutu mai yito duo̒lo Eeya.

²⁷ Bo binatangi haramu ubohulo pilotutu mai mowali tolotalo moduduo̒ halaga upohu-pohutu to Kema lo Eeya, duhengalo dulopulu poloseni. Wonu diila tolotalo, binatangi boito mowali potali ode taawewo moduduo̒ halaga upohu-pohutu to Kema lo Eeya.

²⁸ Diaaluo penu boli ngotaa mao̒ tamowali mopotali meaalo motolotao̒ wolo umaa pilohetulio lou̒ diila odanti ode Eeya, mopio uito manusia, binatangi meaalo huta. Uito miliki lo Eeya u ohiheo-hiheolo mao̒.

²⁹ Tumbao̒ manusia tamaa pilohetu ode Eeya u pobinasaalo diila mowali tolotalo; tio musi pateelo mate-mateelo mao̒.

³⁰ Ngotayade mopulu monto ngoa̒amila tilapulo huta, mopio pale meaalo huhuu-ngowaalo, deu̒yito-yito ode Eeya.

³¹ Wonu tahingota-ngotaawa ohilaa motoloto ngotayadu tilapula boito, tio musi momayali halagaalio u matilantu mao̒ duhengalo dulopulu poloseni.

³² Tuwau monto timii̒du mopulu bibiahe yito miliki lo Eeya. Wonu bibiahe boito rekeniyolo timii̒du tuwau bibiahe u opululio mowali miliki lo Eeya.

³³ Tao̒ huu̒wo lo bibiahe boito diila mowali molulaotao̒ toonu umopiohe, toonu udiila mopiohe. Tio olo diila mowali moluloa̒ao̒. Wonu tio debo moluloa̒ao̒ olo, duuduluo bibiahe boito mowali miliki lo Eeya wau diila mowali tolotalo.

³⁴ Ui-uitolo palenta uilohi mai lo Eeya odelei Musa toitaato Hui̒dee Sinai ode bangusa lo Isirai̒lu. 83