IMAAMATI 26 - KITABI HABARI MOPIOHE

Balakati duo̒lo taa u modungohe

¹ Eeya lotahuda mai, “Diila mao̒ pohutua balaahala meaalo mopotihula bui̒ meaalo wolihi botu iluukili u tuboolo. Wau̒lo Eeya Allahu Taa̒ala limongoli.

² Polameya mao̒ dulahu saabati wau duduu-laheyalo buka lo agama wewolio wau hulumatia mao̒ tambati upiloheetu u polubowalo ola-U̒. Wau̒lo Eeya.

³ Wonu timongoli tumumulo moduduo̒ wuwuu-uduu-U̒ wau modungohe papaa-lentaa-U̒,

⁴ Wau̒ mamopo tuhutai didi towakutuulio, tilinggula huta mongohi mai tilapulo wau bubuu-ngowaalo ayu momungo.

⁵ Tilapulo huta limongoli malaba-labaalo daatalio, tilinggula wonu malei dungga wakutuulio u molipu hungo lo angguru, timongoli donggo hipo ngotola pale. Wau wonu malei dungga wakutuulio u mopomulo pale, timongoli donggo hipolipua hungo lo angguru. Timongoli maa o ua̒alo u motuheta wau tumumulo aamani sontosa wau maa̒amulu tolipu limongoli.

⁶ Wau̒ mamodaha mai otantramu lipumu tilinggula timongoli mowali motuluhe wolo duo̒-duo̒oto wau diila moohe penu boli loolo. Bibii-natangiyalo mongantau mapobinasa-U̒ monto lipu boito, wau diduu̒ popaatea tolipumu.

⁷ Timongoli maa mambo mopo olaaheo̒ mumuu-suwaalo limongoli;

⁸ wolo limolota wambao̒ timongoli mambo mopo olaaheo̒ ngohetuto lota, wolo ngohetuto lota timongoli mambo mopo olaaheo̒ mopulu lihulota.

⁹ Wau̒ mamo balakati olimongoli wau mongohi mai dadaata walao̒ wau woombu olimongoli. Wolo u madilanti-U̒ mai olimongoli, tantulo mao̒ eela-U̒.

¹⁰ Tilapulo hutamu malaba-labaalo daatalio, tilinggula motuheta u ngotaunu mola. Tumbao̒ timongoli bolo pakusa mopo lualao̒ olebe lou̒ ilotolo u malo hiheo alihu woluo tambati u polahuwalo tilapulo ubohulo ilotolai.

¹¹ Wau̒ mamo tibiluloa̒ towolota limongoli todelomo Kema-U̒, wau diila tamopo touli olimongoli.

¹² Wau̒ mapee̒-pee̒enta woli mongoli; Wau̒ mamowali Allahu Taa̒ala limongoli wau timongoli mowali umati-U̒.

¹³ Wau̒, Eeya Allahu Taa̒ala limongoli, talodelo olimongoli yilumualao̒ lonto Masiri alihu timongoli diilalo mowali wato. Okokawasa u helodeehe olimongoli mapilopo binasaa-U̒, wau timongoli pilopowali-U̒ taa ubeebasi.”

Hukuumani ode taa udiila modungohe

¹⁴ Eeya lotahuda mai, “Wonu timongoli diila modungohe ola-U̒ wau diila moponao̒ palentaa-U̒,

¹⁵ wonu timongoli molambangao̒ daantia u pilohutu-U̒ mai woli mongoli wau diila mohuto modungohe totoonulalo putusani wau wuu̒du-U̒,

¹⁶ yi timongoli mahukuu-maniyo-U̒. Wau̒ mamopo dungga mai baala ode limongoli, ngongoto wau patu lobatanga ulaba-labaalo udiila mowali poo̒luliyolo, tilinggula matomu mowali pitoo̒ wau timongoli tumumula mingga-minggalato. Timongoli mamotolo kela-kela mao̒ ilengi bo diila molamitao̒ tilapulio, sababu mumuu-suwaalo limongoli mamonao̒ mai mopo olaaheo̒ olimongoli wau mopoo̒ pulitao̒ wolo upilomulo limongoli.

¹⁷ Timongoli mahukuu-maniyo-U̒, tilinggula timongoli olaahe lo mumuu-suwaalo limongoli wau kawasaalio lotau-tauwalo tamolonui̒ mongoli. Timongoli mamowali moohe daa̒ tilinggula tumeteo̒, penu boli diaaluo tamo henelo.

¹⁸ Wonu lapatio mao̒ moo̒toduo ngoa̒amila hukuumani boito timongoli debo diipo olo modungohe ola-U̒, hukuumani limongoli maduhenga-U̒ mai poo̒opitu piu̒wa.

¹⁹ Timongoli laba-labaalo sombongi, bo Wau̒ mamo potaa̒luku olimongoli. Didi diila tamo tuhutai, tilinggula hutaamu mowali mohengu wau huta motoheeto debo odelo wate.

²⁰ Ngoa̒amila tolopani limongoli u pilohutu wolo suukali daa̒ diaaluo hunalio, sababu huta limongoli diila mongohi tilapulo wau totoonulalo pilomulo limongoli diila momungo.

²¹ Wonu timongoli debo donggo tulusi moluwali ola-U̒ wau diila mohuto modungohe ola-U̒, yi hukuumani limongoli mamuli duhenga-U̒ mai poo̒opitu piu̒wa.

²² Wau̒ mamopo dungga mai bibii-natangiyalo mongantau ode huungi mongoli. Bibii-natangiyalo boito mamo dangapo mongo walau̒mu, momate bibiahumu mate-mateelo mao̒ wau mopoo̒ pulitao̒ olimongoli, tilinggula jumulaa limongoli mowali ngoi̒di daa̒, wau dadaa-lalaalo tolipumu mowali didu otau.

²³ Wonu lapatio mao̒ moo̒toduo ngoa̒amila hukuumani boito timongoli debo diipo olo modungohe ola-U̒, bo debo tulusi moluwali ola-U̒,

²⁴ yi Wau̒ mamomate olimongoli wau mohukuumani mai olimongoli poo̒opitu piu̒wa lebe mobuheetao̒ wolo umailalu mola.

²⁵ Wau̒ mamo pobutu mai popaatea tohuungi mongoli u mohukuumani olimongoli sababu timongoli malo lambanga daantia-U̒ woli mongoli. Wau wonu timongoli motia̒mbu tokota limongoli u mololohe poti duo̒laalo, Wau̒ mamopo dungga mai lo ngongoto udiila mowali poo̒luliyolo, tilinggula bolo pakusa mohudu batangamu ode musu limongoli.

²⁶ Timongoli maa opulita lou̒ aalo, tilinggula mongobua mopulu lota bo momalalu ngotambati wambao̒ polalangalo u polalangalo roti uwoluo toli mongolio. Ua̒alo boito mapopo jataalo, wau lapatao̒ timongoli molamelao̒, timongoli debo donggo molaasa polaangolo.

²⁷ Wonu lapatio mao̒ moo̒toduo mai ngoa̒amila hukuumani boito timongoli debo donggo tulusi olo moluwali ola-U̒ wau diila mohuto modungohe ola-U̒,

²⁸ yi wolo muluka Wau̒ mamomate olimongoli, wau mohukuumani mai olimongoli poo̒opitu piu̒wa lebe mobuheetao̒ wolo umailaku mola.

²⁹ Timongoli mapolaangolo, tunggula molamelao̒ mongo walau̒mu lohihilao.

³⁰ Wau̒ mamopo aantulu tataa-mbatiyalo hepomujawa limongoli toitaato huhuu-luduwalo, mopolohubu memees-bawaalo tambati hepomobua limongoli dupa, wau mopomahula mimii-lateyaalo limongoli ode yitaato balaahala limongoli umalo lohubu boito. Wolo laasa mojijio̒

³¹ kokoo-tawaalo limongoli lomelo-U̒ mowali tutuu-wodeyaalo, tambati hepomujawa limongoli antuluwo-U̒ wau babaa-keyaalo limongoli diila tiolimoo-U̒.

³² Lipumu mapobinasa-U̒ sama-samaata, tilinggula mumuu-suwaalo tahi biluloa̒awa teto mao̒oheyalo moo̒onto mao̒ antululio ulaba-labaalo boito.

³³ Wau̒ mamopobutu mai popaatea tolipu limongoli wau mopobubuu-ayaawa olimongoli to lilii-puwaalo lotaa deli. Halabolu limongoli maa ololoihia, wau kota limongoli maa luliluli mowali tuodu.

^34-35 To wakutu boito tou̒ timongoli donggo woluo todelomo polayahu tolipu lo mumuu-suwaalo limongoli, hutamu udiila pilopo huheli limongoli tilolo kela-kele tou̒ timongoli hibiluloa̒wa teto, maa ololoihia wau o hiyango mohuheli.

³⁶ Tautaumu tawoluo todelomo polayahu tolipu wewo, mapohutu-U̒ mao̒ moohe daa̒, tilinggula penu boli tingohu duungo u hiliipa lodupoto moo̒ tetea̒a olimongolio. Timongoli matumeteo̒ debo odelo heilapitalio todelomo polotuhua, lapatao̒ modehu eleponu diaaluo musu totili limongoli.

³⁷ Timongoli matumeteo̒ wau meiteduo̒ to ngotaalio ode taweewo, eleponu diaaluo tahemo hilapita. Wau timongoli diila tamambo moluwali mumuu-suwaalo limongoli.

³⁸ Timongoli maamate todelomo polayahu, pobinasaalio lolipu lo mumuu-suwaalo limongoli.

³⁹ Ngotayade kikiio̒ limongoli tadonggo tumu-tumulo tolipu lomusu limongoli mamo minggalato sababu dusa limongoli lohihilao wau dusa loluuhuru limongoli.

⁴⁰ Bo waliimu mai mamongaku mao̒ dusa limongolio wau dusa linene moya limongolio u malo tehengi ola-U̒ wau helo malakala to ola-U̒,

⁴¹ tilinggula Wau̒ helo luwali wau lopolahi olimongolio ode delomo polayahu tolipu lo mumuu-suwaalo limongolio. Pulitio mao̒, wonu bolo wali limongoli malo taa̒luku wau malo ponao̒ lo hukuumani sababu dusa wau polo malakala limongolio,

⁴² Wau̒ mamoe̒ela mola daantia-U̒ wolei Yako, Isihaka wau Abraham. Wau̒ mamo pobohu mai danti-U̒ u mongohi mao̒ huta boito ode bangusaa-U̒.

⁴³ Bo huta boito musi pokoo-songiyolo meimulo monto tuango lipulio, alihu otu-otutuulo mao̒ mowali pohuheliyalo. Wau umati-U̒ musi moponao̒ ngoa̒amila hukuumani u podehuwo-U̒ mai ode yitaati mongolio sababu diila mohuto modungohe wuwuu-uduwaalo wau papaa-lentaa-U̒.

⁴⁴ Bo tou̒ timongolio penu boli donggo woluo tolipu lomusu, timongolio diila tatolaa-U̒ meaalo pobinasa-U̒ sama-samaata. Sababu wonu timongolio pobinasa-U̒, uito boliilio Wau̒ momunto daantia-U̒ woli mongolio, hiambola Wau̒ botie Eeya, Allahu Taa̒ala limongolio.

⁴⁵ Wau̒ mamo pobohu daantia u pilohutu-U̒ wolo loluuhuru limongolio, tou̒ Wau̒ lopo biloheo̒ okokawasa-U̒ ode ngoilanggubu bangusa lou̒ lodelo umati-U̒ yilumualao̒ lonto Masiri, alihu Wau̒, Eeya, mowali Allahu Taa̒ala limongolio.”

⁴⁶ Ui-uitolo bubuu-too̒waalo wau papaa-lentawalo uilohi mai lo Eeya toitaato Hui̒dee Sinai odelei Musa duo̒lo bangusa lo Isirai̒lu.