IMAAMATI 25 - KITABI HABARI MOPIOHE

Taunu opitulio

¹ Toitaato Hui̒dee Sinai Eeya helo tahuda odelei Musa wau lopoa̒hu olio

² mopo tunggulao̒ wuwuu-uduwaalo botie ode bangusa lo Isirai̒lu. Wonu bolo timongoli tumuwota mola ode lipu u mawohi lo Eeya olimongoli, timongoli musi mohulumati to Eeya wolo dudelo botie: Timii̒du taunu opitulio timongoli diila mowali mokalaja mao̒ huta utolo kela-kelaalo.

³ Ngotilonggadu wolomo taunu mola timongoli musi mopomulo hahaa-labolumu, momopoto ii̒i-lengiyalo anggurumu wau mohimoa̒a tilapulo hutamu.

⁴ Bo timii̒du taunu u opitulio pohetuwola ode Eeya. Oditolio ngohilayao̒ taunu huta boito musi poluli mao̒ diila mowali kalajaalo. Diila mao̒ pomuloi hahaa-laboluwalo wau diila mao̒ popoti bungo lo angguru limongoli.

⁵ Tumbao̒ pale umobutu wolo hilaalio meaalo angguru monto bungo lo angguru limongoli udiila pilopoto, diila mowali wimoo̒ wau tahuwo limongoli, sababu taunu boito yito taunu pohuheliyalo, duo̒lo huta.

⁶ Eleponu odito, huta boito mamongohi mai tilapula olo u powaliyolo ua̒alo ode limongoli, mongo watomu, tahe wuupamu, wau tau deli tahi biluloa̒wa woli mongoli.

⁷ Wau olo ode bibii-natangiyalo bibiahumu wau binatangi molinggelo tolipumu. Ngoa̒amilalo tilapulo huta boito diila mowali tamelolo.

Taunu powuwalingalo

⁸ Reekenia mola poo̒opitu piu̒wa lotaunu, ngodaata wopato pulaa tio lotaunu.

⁹ Lapatao̒ todulahu opululio hulalo opitulio, deu̒yito-yito dulahee pongambungual dusa, ahuli mao̒ tau mopo tingohe mola torompeti penu boli tou̒toonu to ngoilanggubu lipu.

¹⁰ Timongoli musi mopoheetu mao̒ taunu u olimo lopulu boito, wau mopo malalumu mola obebasi ode ngoilanggubu tuango lipu. Todelomo taunu boito totoonulalo halata milililiki u mapilotali musi powalingolo ode taa ohuu̒woli ubohu-bohulio meaalo ode waliilio. Tita tapilotali odelo wato musi powalingolo ode ngaalaa̒lio.

¹¹ Diila mao̒ pomuloi halabolumu. Pale umobutu mai wolo hilaalio meaalo hungo lo angguru monto bungo lo anggurumu udiila pilopoto diila mowali wimoo̒lo wau tahuwo limongoli.

¹² Taunu boito debo odelo taunu umantali ode limongoli. Timongoli bo mowali molamelao̒ wolo umobutu mai wolo hilaalio to halabolumu.

¹³ Todelomo taunu boito ngoa̒amila huta u mapilotali musi powalingolo ode taa ohuu̒wolio ubohu-bohuolio.

¹⁴ Oditolio wonu timongoli mopotali mao̒ huta boito to timongotamu taulo Isirai̒lu, meaalo motali huta boito monto olio, diila mao̒ potatalia wolo diila hilaa motulidu.

¹⁵ Halaga lohuta boito musi tantuwola modudua̒ jumula taunu ngotilonggadu huta boito mowali mongohi tilapulo dilumutu Taunu Powuwalingalo utalu-talu.

¹⁶ Wonu jumulaa lo taunulio dadaata, halaga lohuta boito diila mahale. Bo wonu jumula lo taunulio ngoi̒di, halagaalio musi muula, sababu u pilotali yito jumulaa lo pongotolalo.

¹⁷ Diila mao̒ pohimbulo ode timongotamu taulo Isirai̒lu, bo mamusi timongoli moohe to Eeya, Allahu Taa̒ala limongoli.

Sua̒li lotaunu u opitulio

¹⁸ Dungohi mao̒ butoo̒ wau palenta lo Eeya, alihu timongoli tumumulo wolo aamani tolipu boito.

¹⁹ Huta tolipu boito mamongohi mao̒ tilapulio tilinggula timongoli o ua̒alo u motuheta wau motibiluloa̒ mola teto wolo aamani sontosa wau maa̒amulu.

²⁰ Bo tanu woluo tamohintu mai wolo u matamelolo ngotilonggadu taunu opitulio mola tou̒ huta diila pilomuloa wau tilapulio diila hilama.

²¹ Todelomo taunu olomolio Eeya mamo balakati mai huta tilinggula tilapulio motuheta utolo taunu mola.

²² Wau tou̒ timongoli mopomulo mao̒ halabolumu todelomo taunu owalulio, otoolo monto taunu olomolio donggo woluo u mowali tamelo limongoli. Tumbao̒ polodapato lou̒ aalo limongoli mamotuheta dilumutu meidungga mai wakutuulio timongoli mohimoa̒a tilapulo totaunu boito

Powuwalingalo huta wau bele

²³ Hutamu diila mowali potali mao̒ u tulu-tulusi mola, sababu huta diila hakuumu, bo haku lo Allahu Taa̒ala. Timongoli bo debo odelo tau deli taloo̒tapu luasi u momake mao̒ huta boito.

²⁴ Wonu huta ngopita potali, musi akuwolo haku lotaa ohuu̒wolio ubohu-bohulio u motolotao̒ huta boito.

²⁵ Wonu ngotaalio lo Isirai̒lu modehu mosikini tilunggula tio bolo pakusa mopotali hutalio, yi ilaatolio tamodudula daa̒ wajibu motolotao̒ huta boito.

²⁶ Wonu diaaluo tau u motolotao̒ bo taa ohuu̒wo boito todulahee momooli maa mambo wau odoi motuheta u motolotao̒ hutalio,

²⁷ yi tio musi momayali mao̒ ode taa u malotali hutalio ngohalaga tilapulo huta boito ngotilonggadu tataau-nuwalo u wumbutio mola tunggula Taunu Powuwalingalo u madungga-dungga mai. Lou̒ odito tio muli moo̒tapu mao̒ huta hakuulio.

²⁸ Bo wonu tio diila mambo motolotao̒ hutalio, taa umotali mao̒ debo okawasa tohuta boito tunggula Taunu Powuwalingalo u wumbutio mola. Todelomo taunu boito musi powalingolo ode taa ohuu̒wolio ubohu-bohulio.

²⁹ Wonu bolo tahingota-ngotaawa mopotali bele ngowale todelomo kota u pilalita lodingingo meeseli, yi tio ohaku motolotao̒ belelio todelomo wakutu ngotaunu mola tumulalo mao̒ monto wakutu tou̒ pilotali.

³⁰ Bo wonu bele boito diila tilolotalio todelomo wakutu ngotaunu mola yi mooli hakuulio u motolotao̒. Bele bo tio debo haku lotaa ulotali mao̒ wau waliilio mola. Todelomo Taunu Powuwalingalo, bele boito diila powalingolo.

³¹ Duo̒lo bele to kambungu udiila pilalita lo dingingo meeseli pohu-pohutu wuu̒du u tutuuwauwa debo odelo ode huta: ubohu-bohulio ohaku motolotao̒ wau bele boito musi powalingolo todelomo Taunu Powuwalingalo.

³² Bo taulo Lewi ohaku u penu boli omolua wambai̒o motolota halata miliki limongoli to kokoo-tawaalo utilantu mao̒ ode limongolio.

³³ Wonu bolo ngotaalio lo Lewi mopotali belelio totala tuwau lokota boito wau tio diila motolotao̒, yi bele boito musi powalingolo ode olio todelomo Taunu Powuwalingalo. Sababu bele taulo Lewi to kokoo-tawaalo limongolio yito miliki limongolio u debo towolota bangusa lo Isirai̒lu.

³⁴ Bo huta luasi u pilobutua lo huo̒yoto totili lo kokoo-tawaalo suku lo Lewi diila mowali potali. Uito yito duo̒lo taulo Lewi u ohiheo-hiheolo mao̒.

Bubulota totaa mosikini

³⁵ Wonu bolo taa ngobangusamu tabilu-biluloa̒ towolota limongoli modehu mosikini wau diila moo̒ oonggosi tutumulio, timongoli musi momantu mao̒ olio debo odelo tau deli ngota meaalo taa bo lonao̒ mai, alihu tio mowali tumumula tulusi towolota limongoli.

^36-37 Diila mao̒ pohilea wolo moo̒ohuu̒ bunga monto wolo upilo bulotao̒ limongoli olio, bo mamusi timongoli moohe to Allahu Taa̒ala limongoli, wau polulia mao̒ tau boito tumu-tumula towolota limongoli. Diila mao̒ pohama pae̒eda olo monto ua̒alo potali mao̒ limongoli olio.

³⁸ Ui-uitolo palenta lo Eeya Allahu Taa̒ala limongoli tamaa lodelo olimongoli yilumualao̒ lonto Masiri wau longohi lipu lo Kanaa̒n olimongoli, alihu Tio mowali Allahu Taa̒ala limongoli.

Polobebasi lowato

³⁹ Wonu bolo ngobangusamu tabilu-biluloa̒ towolota limongoli modehu mosikini tilinggula mopotali lo batangalio odelo wato olemu, tau boito diila mowali ahula limongoli mohutu mao̒ kalaja ngotaalio lowato.

⁴⁰ Tio musi motibiluloa̒ to olemu odelo ngotaalio lo tahe wuupalo wau mokalaja mao̒ to olemu dilumutu Taunu Powuwalingalo.

⁴¹ Tou̒ boito tio wau mongo walai̒o mowali mololaa mao̒ belemu wau muli mohualinga mota ode ngaalaa̒lio wau ode huta linene moyaalio.

⁴² Taulo Isirai̒lu yito mongo wato lo Eeya; Tio-tiolo talodelo olimongolio yilumualao̒ lonto Masiri, wau sababu uito timongolio diila mowali potali odelo wato.

⁴³ Oditolio taulo Isirai̒lu tamo potali batangalio ode limongoli diila mowali pohutuo limongoli wolo bangganga. Mamusi timongoli moohe to Allahu Taa̒ala limongoli.

⁴⁴ Wonu timongoli ohilaa owato, timongoli mowali motali monto babaa-ngusawalo tabilu-biluloa̒ totilimu.

⁴⁵ Timongoli olo mowali motali mongo walao̒ lotau deli tadebo bilu-biluloa̒ towolota limongoli. Mongo walao̒ lotau deli tapotutuo mai tolipumu mowali milikiimu

⁴⁶ wau mowali olo powarisio mao̒ limongoli ode mongo walau̒mu u mowali wato limongolio ngotupa lo tutumulo. Bo timongotamu taulo Isirai̒lu diila mowali pohutuo limongoli wolo bangganga.

⁴⁷ Wonu bolo tau deli ngota tabilu-biluloa̒ tohungi mongoli mowali kaya, wau woluo timongotamu taulo Isirai̒lu modehu mosikini tilinggula tio mopotali batangalio odelo wato ode tau deli boito meaalo ode ngaalaa̒lio,

⁴⁸ yi taulo Isirai̒lu boito debo ohaku u motolotao̒. Ngotaalio lo wutatio talolai̒,

⁴⁹ meaalo pou̒wamaalio, meaalo walao̒ mohutato wolio meaalo ngotaalio wewo monto sahabatilio tamodudulo, mowali motoloto olio. Meaalo wonu tio lohihilao lapatao̒ uito mambo, yi tio mowali motolotao̒ batangalio lohihilao.

⁵⁰ Wato boito musi modulohupa wolo taa u malotali mao̒. Timongolio musi moreekeni mola jumulaa lotaunu anggadu batangalio pilotali odelo wato dilumutu Taunu Powuwalingalo u wumbutio mola, lapatao̒ molantu mao̒ potolotio. Halaga boito musi tantuwola moduduo̒ reekeni lowuupa uwohi ode tahe wuupalo.

^51-52 Wato boito musi mopo walingao̒ halaga upilotali mao̒ batangalio ngodaata lo ngojumula wuupa lo ngotaalio tahe wuupalo ngotilonggadu tataau-nuwaalo udiipo nilao̒olio,

⁵³ debo odelo tio malo kalaja odelo taa wuupalo u yiluupa timii̒du taunu. Ti Tuanilio diila mowali mohutu olio wolo bangganga.

⁵⁴ Wonu tio diila otolota wolo tala tuwau lodudelo boito, tio wau mongo walai̒o musi bebasiyalo todelomo Taunu Powuwalingalo u wumbutio mola.

⁵⁵ Ngotaalio lo Isirai̒lu diila mowali wato ngotupa lo tutumulo sababu bangusa lo Isirai̒lu yito mongo wato lo Eeya. Eeyaalo talodelo olimongolio yilumualao̒ lonto Masiri. Tio-tiolo Eeya, Allahu Taa̒ala limongolio.