IMAAMATI 24 - KITABI HABARI MOPIOHE

Dudelo molaala tohe

¹ Eeya lopoa̒hu olei Musa

² mongohi mao̒ papaa-rentaalo botie ode bangusa lo Isirai̒lu: Delowalo mota wimulo jaitun tutu wau ulaba-labaalo mopiohu ode tohe todelomo Kema lo Eeya, alihu mowali polei̒tolo wau lumei̒ta tulusi.

³ Tei Haruna musi mongatulu mao̒ totoo-heyaalo boito tumulalo mai lolaango dilumutu dumodupo mola totambati lo Eeya woluo, to bulemengo podehu u molau̒be Bulua Daantia to Dulahu Laba-labaalo Mantali. Palenta boito musi pohutuwolo u ohiheo-hiheolo mao̒.

⁴ Tei Haruna musi mongulusi mao̒ totoo-heyaalo to oa̒ato tohe monto hulawa tutu alihu debo lei̒-lei̒ita todelomo Kema lo Eeya.

Roti pohinta

⁵ Hamawa mao̒ labu mopulaa dulokilo ulaba-labaalo mopiohu wau pohutua mao̒ roti hihulula mopulaa dulobotu, ngobotu-ngobotu monto labu ngokilo.

⁶ Dutuwa mao̒ roti boito dulo suusungi, motii̒du ngosuusungi wolomo botu, toitaato meja uwolu-wolude hulawa tutu uwoluo todelomo Kema lo Eeya.

⁷ Dutui mao̒ alama tutu to motii̒du suusungi loroti u motuotaao̒ deu̒ roti boito bake lou̒ aalo ode Eeya.

⁸ Motii̒du dulahu Saabati musi woluo roti u pohintaalo todelomo Kema lo Eeya. Ui-uitolo uwajibu tobangusa lo Isirai̒lu ohiheo-hiheolo mao̒.

⁹ Roti boito yito uolei Haruna wau waliilio mola. Timongolio musi molamelao̒ totambati umantali, sababu roti boito debo odelo tayadu umantali daa̒ monto bake lou̒ aalo u podewolo ode Eeya duo̒lo mongo iimamu.

Hukuumani duo̒lo taa u molaa̒anati Allahu Taa̒ala wau hukuumani polontuli

^10-11 Tokema taulo Isirai̒lu woluo talolai̒ ngota. Tiyamolio taulo Masiri wau tiilolio taulo Isirai̒lu tai̒lunte Selomit, walae̒e Dibri lonto suku Dan. Todulahee tuwau tau boito lohahaamawa wolo ngotaalio lo Isirai̒lu tokema. Tou̒ lohahaamawa, tio helo laa̒anati Allahu Taa̒ala. Sababu uito tau-tauwalo Isirai̒lu lodelo olio mota lotaalua wolei Musa,

¹² wau lolaahangi mao̒ olio sambela helohima putusani mai lo Eeya tomimbihu wolo umusi pohutuo limongolio to olio.

¹³ Eeya lotahuda mao̒ odelei Musa,

¹⁴ “Delowa mota tau boito ode bulemengo kema. Motii̒du taa u maloo̒ dungohu olio helo laa̒anati, musi mopodutu uluu̒lio toitaato lunggongo tau boito u mongohi sakusi deu̒ tio ototala. Lapatao̒ ngoilanggubu umati musi momai̒ olio wolo botu tunggula mate.

¹⁵ Lapatao̒ uito pomalalumualo mota utie ode bangusa lo Isirai̒lu; titaalo tita tamo laa̒anati Allahu Taa̒ala musi momanta akiibatilio

¹⁶ wau hukuu-maniyolo mate. Boli tita tamo laa̒anati to Eeya musi pai̒yolo wolo botu tunggula mate lo ngoilanggubu jamaa̒. Butoo̒ boito pohu-pohutu ode taulo Isirai̒lu meaalo ode tau deli tamalo titatapu to Isirai̒lu.

¹⁷ Titaalo tita tamomate taa wewo mate-mateelo mao̒ musi hukuu-maniyolo mate.

¹⁸ Titaalo tita tamomate binatangi lotaa wewo mate-mateelo mao̒ musi moluloa̒ao̒. Daasarilio yito ‘nyawa tuloa̒lo wolo nyawa’.

¹⁹ Wonu bolo tahingota-ngotaawa mohutu mao̒ tawewo topotala, boli wolo wambai̒o u mapilo hutulio, musi pohutuwola olo ode olio.

²⁰ Wonu tio momoli mao̒ tulalio, oditolio tulalio olo musi boliyolo. Wonu tio mohutu mao̒ mato lotaa wewo pitoo̒ ngotuali, yi matolio olo musi pontuloolo ngotuali. Wonu tio momate taawewo tunggula moboli dungitio, yi dungitio olo musi boliyolo. Boli wolo u pohutuolio unggula tawewo o aibu musi olo pohutuwola to olio odelo tontuli.

²¹ Titaalo tita tamomate binatangi mate-mateelo mao̒ musi tuloo̒lio, bo titaalo tita tamomate manusia mate-mateelo mao̒ musi hukuu-maniyolo mate.

²² Butoo̒ boito pohu-pohutu ode limongoli ngoa̒amila wau olo ode tau deli tadebo towolota limongoli, sababu Wau̒lo Eeya Allahu Taa̒ala limongoli.”

²³ Lapatao̒ tei Musa helopo tunggulao̒ loi̒ya boito ode bangusa lo Isirai̒lu, timongolio lodelo mota taa umalo laa̒anati Allahu Taa̒ala boito ode bulemengo kema, lapatao̒ tio hepilai̒lio wolo botu tunggula yilate. Wolo dudelo boito bangusa lo Isirai̒lu helohutu mao̒ wolo u mapilo malentai lo Eeya odelei Musa.