IMAAMATI 22 - KITABI HABARI MOPIOHE

Omantali lodewo

¹ Eeya lopoa̒hu olei Musa

² mopo tunggulao̒ palenta botie odelei Haruna wau mongo walai̒o, “Pohutua mao̒ lou̒ patuti wolo upodewo bangusa lo Isirai̒lu tolomodu ode Olau̒, alihu timongoli diila mopoleeto tanggulu-U̒ umantali. Wau̒lo Eeya.

³ Wonu ngotaalio monto walimu mai todelomo owowoluwoalio najisi mohimbideo̒ dedee-wowaalo mantali u potolomodu mao̒ bangusa lo Isirai̒lu ode Olau̒, yi tio diilalo mowali momaya tomesba. Wuu̒du boito pohu-pohutu u o hiheo-hiheolo mao̒. Wau̒ Eeya.

⁴ Ngotaalio lo wali lei Haruna taduto-dutolaa ngongoto lo alipo umoo̒ topotala, meaalo taa mongongoto lotilalua tilunggula mopo lualao̒ heeheto, dini-dini molamela dewo mantali wonu tio diipo pilo ilaalo belesi. Ngotaalio li iimamu mowali najisi wonu tio modedeta hitua-tuawua unajisi sababu ilotuhata lomilate. Tio olo najisi wonu manilio humeheto,

⁵ meaalo modedeta binatangi meaalo taa unajisi.

⁶ Ngotaalio li iimamu u wolo dudelo upenu boli woloolo mowali najisi, debo najisi dilumutu dulahee tumolopaa mota. Wau lapatao̒ dulahee tulumolopaa mota tio diipo mowali molamelao̒ u podewolo ode Eeya wonu tio diipo lolihu.

⁷ Lapatao̒ dulahee tulumolopaa mota tio belesi wau mowali molamelao̒, sababu ui-uitolo ua̒alolio.

⁸ Tio dini-dini molamela tapu uilate lohilhilo, meaalo uilate dilangapo binatangi mongantau. Wonu tio molamelao̒, yi tio mowali najisi. Wau̒lo Eeya.

⁹ Ngoa̒amila iimamu musi modungoheo̒ wuwuu-uduwaalo uilohi-U̒ mai. Wonu diila, timongolio ototala wau maamate, sababu molambanga wuwuu-uduwaalo umantali boito. Wau̒lo Eeya, wau Wau̒lo talo poheetu olimongoli ode Olau̒.

¹⁰ Dewo u piloheetu ode Olau̒ bo mowali tamelola longaalaa̒ li iimamu boito lohihilao; taa wewo diila mowali, eleponu tau boito ngobele woli iimamu boito meaalo taa hewuupalio.

¹¹ Bo mongo wato tatilali li iimamu boito wolo doilio lohihilao meaalo tapilotutu todelomo belelio, mowali molamela ua̒alo tayadi iimamu boito.

¹² Walao̒ taabua lo ngotaalio li iimamu tamonika wolo ngotaalio lo tadiila iimamu, diila mowali molamela dewo boito.

¹³ Bo walao̒ taabua li iimamu tamaa lowali janda meaalo tatilalaki wolo diila loo̒tapu walao̒ lapatao̒ luli lohualinga ode bele liyamolio wau lowali banta-banta olio, mowali molamelao̒ ua̒alo tayadu liyamolio. Bo ngaalaa̒ li iimamu wambai̒o tamowali molamela dewo boito.

¹⁴ Wonu ngotaalio tadiila pongawaa̒ longaalaa̒ li iimamu wolo diila lolunggai lomela ua̒alo upilodewo ode Eeya, tio musi mongohi mao̒ poluloo̒ odeli iimamu wau duhengalo dulopulu poloseni.

¹⁵ Mongo iimamu diila mowali moponajisi dewo upoheetu ode Olau̒

¹⁶ wolo mopoluli mao̒ lamelo lo ngotaalio tadiila ohaku molamelao̒. Sua̒li boito mopowali totau boito ototala wau moo̒toduo mai hukuumani to olio. Wau̒lo Eeya wau Wau̒ tamopo mantali mao̒ dewo boito.”

¹⁷ Eeya lopoa̒hu olei Musa

^18-19 mongohi mao̒ odelei Haruna, mongo walai̒o wau ngoilanggubu bangusa lo Isirai̒lu wuwuu-uduwaalo botie. Wonu bolo ngotaalio taulo Isirai̒lu meaalo ngotaalio tau deli tabilu-biluloa̒ motitatapu to Isirai̒lu mopodewo bake yilalango u pomayali loi̒ya meaalo duo̒lo bake iloheela lohilao, binatangi boito musi ulai̒ wau diila mowali otailio alihu mowali tolimoolo.

²⁰ Diila mao̒ podewowa binatangi u otailio, sababu Eeya diila mohuto mololimo uito.

²¹ Wonu tahingota-ngotaawa mopodewo ode Eeya bake lo polodame u pomayali loi̒yalio meaalo duo̒lo bake iloheela lohilao, yi binatangi boito diila mowali otailio, alihu mowali tolimoolo.

²² Diila mao̒ podewowa ode Eeya binatangi upitoo̒, uboli-boli tulalio meaalo upali-pali, u obohe wau olala, uduto-dutolaa ngongoto lo alipo meaalo kukudu. Binatangi u odito diila mao̒ podewowa duo̒lo bake lou̒ aalo toitaato mesba.

²³ Duo̒lo bake iloheela lohilao timongoli mowali mopodewo mao̒ binatangi udiila wimu-wimumuto pongawaa̒lio; bo pomayali loi̒ya, binatangi u odito diila mowali tolimoolo.

²⁴ Diila mao̒ podewowa ode Eeya binatangi ubotu lohutulio loruusa leihupeto, iloloto, pali lobubuhu meaalo tilapilio. Sua̒li boito diila mowali motoduo mai tolipumu.

²⁵ Bibiahe u motapu mai monto tau deli diila mowali podewolo duo̒lo bake lou̒ aalo. Binatangi boito anggapuwola oa̒abu wau diila mowali tolimoolo.

^26-27 Walao̒ sapi, walao̒ himba meaalo walao̒ batade u boheli pilotutu mai musi tolaalo to oliilolio ngotilonggadu pitu hui mola. Bolo lapatio mao̒ binatangi boito mowali tolimoolo duo̒lo bake lou̒ aalo.

²⁸ Diila mao̒ podewowa hitua-hituawua odelo bake lobatade pee-pee̒enta wolo walai̒o todulahee u tutuuwauwa.

²⁹ Wonu bolo timongoli mopodewo bake sukuru ode Eeya, pohutua mao̒ uito modudua̒ wuu̒du, alihu bakemu tolimoolo.

³⁰ Tameela mao̒ bake boito todulahee boito olo, wau diila mao̒ polabita penu boli bo ngoi̒di duo̒lo loombulio mola.

³¹ Eeya lotahuda mai, “Dungohi mao̒ totoonulalo palentaa-U̒; Wau̒lo Eeya.

³² Diila mao̒ pokootoroa tanggulu-U̒ umantali. Ngoilanggubu bangusa lo Isirai̒lu musi molubo ola-U̒ odelo Taa Laba-labaalo mantali. Wau̒lo Eeya wau Wau̒ mopowali mai olimongoli mantali.

³³ Wau̒ lodelo olimongoli yilumualao̒ lonto Masiri, alihu Wau̒ mowali Allahu Taa̒ala limongoli. Wau̒lo Eeya.”