IMAAMATI 21 - KITABI HABARI MOPIOHE

Omantali lomongo iimamu

¹ Eeya lopoa̒hu olei Musa lopo tunggulao̒ palenta botie ode mongo iimamu wali lei Haruna, “Ti iimamu ngota diila mowali moponajisi batangalio sababu moduduo̒ mohutu upacala polobungalo mongo ilaatolio,

² ngopohia wonu taamate boito tiilolio, tiyamolio, walai̒o, wutatio talolai̒,

³ meaalo wutatio taabua tadiipo lonika, wau bilu-biluloa̒ ngobele wolio.

⁴ Tio diila mowali moponajisi batangalio wolo moduduo̒ upacala polobungalo mongo ilaato lodilelio taabua.

⁵ Ti iimamu ngota diila mowali monguluhu ngotayadu monto lunggongio wau diila mowali mohuntinga danggulio meaalo mohutu pali to wawaai̒o wolo balangi molalito u mopo biloheo̒ deu̒ tio donggo limilimi.

⁶ Tio tolomodu hakuu-U̒, wau diila mowali mopokootoro tanggulu-U̒. Tio mopodewo mao̒ bake lou̒ aalo ode Olau̒, oditolio tio musi mantali.

⁷ Ti iimaamu ngota diila mowali monika wolo taabua ngota bakasi tasuuntali meaalo taabua ngota u diilalo tadulahu, meaalo tamalo bua̒aya, sababu ti iimamu yito hakuu-U̒.

⁸ Bangusa lo Isirai̒lu musi mongaku mao̒ toli iimamu odelo taa u pohetuwola ode Olau̒ sababu tio mopodewo bake lou̒ aalo ode Olau̒. Wau̒lo Eeya; Wau̒ botie mantali wau Wau̒ mopo mantali umati-U̒.

⁹ Wonu walao̒ taabua ngotaalio li iimamu mowali suuntali, yi tio mohina oliyamolio wau musi tumbilalo tunggula mate.

¹⁰ Ti Iimamu Daa̒ mapilo mantali wolo dudelo u lopo tooheo̒ winulo upacala toitaato lunggongio wau wolo lopopake mao̒ pakeyangi li iimamu daa̒ to olio. Sababu uito tio diila mowali mopoluli mao̒ huwoi̒o moa̒puto meaalo mongedenga pakeyangilio odelo tuoto limilimi.

^11-12 Tio mapilodewo ode ola-U̒ u lowali hakuu-U̒, oditolio tio diila mowali moponajisi batangalio. Tio diila mowali olo moponajisi Kema-U̒ lou̒ lumualao̒ monteeto u tumuwota ode bele uwoluo milatelio, eleponu uito milate liyamolio meaalo liilolio lohihilao.

^13-14 Tio bo mowali monika wolo tadulahu ngota monto sukulio lohihilao. Tio diila mowali monika wolo janda ngota meaalo wolo taabua ngota tamaa bilua̒aya, meaalo taabua ngota bakasi tasuuntali.

¹⁵ Wonu tio molambanga wuu̒du boito, yi mongo walai̒o tapatutilio mantali, mamowali najisi. Wau̒lo Eeya wau Wau̒ mapilo tolomodu mao̒ olio lowali Iimamu Daa̒.”

¹⁶ Eeya lopoa̒hu olei Musa

¹⁷ u moloi̒ya mao̒ utie odelei Haruna, “Ngotaalio lo walimu tao̒ aibu batangalio diila mowali mopodewo bake lou̒ aalo ode Olau̒. Uito pohu-pohutu u ohiheo-hiheolo mao̒.

¹⁸ Taa u mopodewo mao̒ bake diila mowali tao̒ aibu batangalio, deu̒yito-yito taa pitoo̒ meaalo tadiila mowali monao̒, taa u oa̒ibu bayalio meaalo pongawaa̒a lowawaai̒o,

¹⁹ tailate ngooa̒ uluu̒lio meaalo penggo oa̒atio,

²⁰ tabunggu meaalo keneo̒, tao̒ ngongoto lomato meaalo ongongoto lo alipo wau tabilutua.

²¹ Timii̒du wali li Iimamu Haruna tahi oa̒ibua wawaai̒o diila mowali mopodewo bake lou̒ aalo ode Olau̒.

²² Bo tio mowali molamela ua̒alo upilodewo, mopio bake lou̒ aalo umantali meaalo bake lou̒ aalo ulaba-labaalo Mantali.

²³ Sababu tau boito oa̒ibu wawaai̒o, yi tio diila mowali mohimbideo̒ podehu ulopo halahu Huwali Leidaa̒ Mantali wau mesba. Tio diila mowali moponajisi babaa-langiyalo u mapiloheetu ode Olau̒, sababu Wau̒lo Eeya, wau Wau̒lo tamo poheetu mao̒ uu̒u-pangowalo boito.”

²⁴ Ui-uitolo wuwuu-uduwaalo upilo tunggulao̒ lei Musa odelei Haruna wau mongo walai̒o, wau ode ngoilanggubu bangusa lo Isirai̒lu.