IMAAMATI 20 - KITABI HABARI MOPIOHE

Hukuumani totaa udiila modungohe

¹ Eeya lopoa̒hu olei Musa

² moloi̒ya mao̒ sua̒li botie ode bangusa lo Isirai̒lu, “Ngota-ngota towolota limongoli meaalo tau deli tadebo towolota limongoli tamo pobake mao̒ walai̒o ode Molokh, musi pai̒yola wolo botu tunggula mate lo ngoilanggubu ulipu.

³ Taa udiila mopobake mao̒ walai̒o ode Molokh, moponajisi Kema-U̒ wau mohina tanggulu-U̒ umantali. Tio hukuu-maniyo-U̒ wau diilalo anggapuwo-U̒ pongawaa̒ lo umati-U̒.

⁴ Wonu ulipu momitoa̒a mato tohuhutu lotau boito wau diila moponao̒ mao̒ hukuumani mate to olio,

⁵ yi Wau̒ lohihilao tamamo hukuumani olio, ngoa̒amila ngaalaa̒lio, wau ngoa̒amila taa upee̒-pee̒enta wolio mololaa mao̒ ola-U̒ molubo Molokh. Timongolio diilalo pongawaa̒ lo umati-U̒.

⁶ Taa u monao̒ mei̒ naseehati tohulango tamopo woluo wumbuta wolo roroo-huwaalo lotaa yilate mahukuu-maniyo-U̒ wau diilalo anggapuwo-U̒ pongawaa̒ lo umati-U̒.

⁷ Poo̒dahailo alihu timongoli debo mantali, sababu Wau̒ Eeya Allahu Taa̒ala limongoli.

⁸ Dungohi mao̒ butoo̒o-U̒, sababu Wau̒ Eeya talo poheetu olimongoli ode ola-U̒.”

⁹ Eeya longohi mai wuwuu-uduwaalo botie, “Taa u molaa̒anati oliyamolio meaalo oliilolio musi hukuu-maniyolo mate. Tio mate sababu totalaalio lohihilao.

¹⁰ Wonu bolo ngotaalio lo Isirai̒lu mojina wolo dile taabua lotaa ngobangusa wolio, yio tio wau taabua boito musi hukuu-maniyola mate.

¹¹ Talolai̒ ngota tamo uulauwa wolo tala ngota lodile liyamolio, momolokosa haku liyamolio. Talolai̒ wau taabua boito musi hukuu-maniyolo mate. Timongolio mate sababu totala limongolio lohihilao.

¹² Wonu bolo talolai̒ ngota mou̒ulauwa wolo moluhengio bua, duduulotalo boito musi hukuu-maniyolo mate. Timongolio malojina, wau mate sababu totala limongolio lohihilao.

¹³ Wonu bolo talolai̒ ngota mou̒ulauwa wolo talolai̒ wewo, timongolio mohutu huhutu u mokootoro wau hina, wau duduulotalo musi hukuu-maniyolo mate. Timongolio mate sababu totala limongolio lohihilao.

¹⁴ Wonu bolo talolai̒ ngota modiilea wolo taabua ngota meaalo tiilo lotaabua boito, tou-toulotalo musi tumbilalo tunggula mate, sababu timongolio helohutu huhutu, udiila patuti. Huhutu debo odelo uito diila mowali woluo towolota limongoli.

¹⁵ Wonu bolo talolai̒ ngota mou̒ulauwa wolo binatangi, yi tau wau binatangi boito musi pateelo mate-mateelo mao̒.

¹⁶ Wonu bolo taabua ngota mou̒ulauwa wolo binatangi, taabua wau binatangi boito musi pateelo mate-mateelo mao̒. Timongolio mate sababu totala limongolio lohihilao.

¹⁷ Wonu bolo talolai̒ ngota mou̒ulauwa wolo wutatio taabua meaalo wolo wutatio tangotiyamo wewo tiilo wewo meaalo ngotiilo wewo tiyamo, timongolio diilalo anggapuwo-U̒ pongawaa̒ lo umati-U̒. Timongolio malohutu huhutu udiila patuti wau musi momanta akiibatilio.

¹⁸ Wonu bolo talolai̒ ngota mou̒ulauwa wolo taabua ngota tadonggo dula-dulahu, yi timongolio diilalo anggapuwola pongawaa̒ lo umati-U̒.

¹⁹ Wonu bolo talolai̒ ngota mou̒ulauwa woli tantelio duduulotalo musi momanta akiibati monto totala boito.

²⁰ Wonu bolo talolai̒ ngota mou̒ulauwa wolo dile lo pou̒wamaalio, yi tio mohina pou̒wamaalio. Talolai̒ wau taabua boito musi momanta hukuu-manilio. Tunggula mate timongolio diila moo̒tapu walao̒.

²¹ Wonu bolo talolai̒ ngota moheehu dile lowutatio, yi tio mohina wutatio wau lohutu huhutu udiila patuti. Tunggula mate diila moo̒tapu walao̒.”

²² Eeya lotahuda mai, “Dungohi mao̒ ngoa̒amila butoo̒ wau palentaa-U̒, alihu timongoli diila polahiyolo monto lipu lo Kanaa̒n, ode utoonu Wau̒ modelo olimongoli.

²³ Diila mao̒ poduduo̒ uu̒udu bangusa lotahi biluloa̒wa mola teto. Timongolio loo̒otolu ola-U̒ wolo totoonulalo huhutu limongolio u moleeto. Uitolo sababuulio timongolio pilopolahi-U̒, alihu timongoli mowali tumuwoto ode lipu boito.

²⁴ Huta ukaya wau molomiodu boito mapilo danti-U̒ mai olimongoli, oditolio wohi-U̒ mai olimongoli mowali haku limongoli. Wau̒lo Eeya Allahu Taa̒ala limongoli talo pohalahe olimongoli lonto babaa-ngusawalo wewo.

²⁵ Masababu uito timongoli musi mopo hiihedeo̒ wolo pintala binatangi u haramu monto udiila haramu. Diila mao̒ polamela binatangi u haramu. Binatangi boito poo̒taa-U̒ mai haramu, oditolio wonu tamelo limongoli yi timongoli mowali najisi.

²⁶ Timongoli pilopo wiwi-U̒ lonto babaa-ngusawalo wewo alihu mowali hakuu-U̒. Timongoli musi mantali sababu Wau̒lo Eeya, wau Wau̒ mantali.

²⁷ Timii̒du talolai̒ meaalo taabua tamopo woluo wumbuta wolo roroo-huwaalo lotaa mate musi pai̒yola lobotu tunggula mate. Tau boito mate sababu totalaalio lohihilao.”