IMAAMATI 2 - KITABI HABARI MOPIOHE

Bake pohinta

¹ Wonu bolo tahingota-ngotaawa mopodewo mao̒ bake pohinta ode Eeya, bake boito musi debo odelo labu u mopiohe daa̒ u tuangalo winulo jaitun wau wohiyalo alama toitaatio.

² Tio musi modelo mao̒ ode mongo iimamu wali lei Haruna. Iimamu tao̒ tuugasi musi mohama mao̒ labu ngaau̒po boito wolo winulo jaitunilio wau ngoa̒amila alamalio, lapatao̒ momobu mao̒ toitaato mesba odelo tuoto deu̒ ngoa̒amilalo mapilodewo ode Eeya. Boolo bake lou̒ aalo boito moo̒sanangi hilaa lo Eeya.

³ Bake pohinta ulebelio yito duo̒lo mongo iimamu. Bake boito mantali daa̒ sababu hilama lonto ua̒alo u mapilodewo ode Eeya.

⁴ Wonu u podewolo boito roti u lalangolo todelomo polalangalo, roti boito musi pohutuwola diila oragi. Roti boito mowali mohulodu, pohutuwola monto uu̒ulau lolabu moa̒aluti wolo winulo jaitun, mowali olo kuukisi u bo paidelaa winulo jaitun.

⁵ Wonu u podewolo boito roti u pilanggangi toitaato pomanggangiyalo, roti boito musi pohutuwola monto labu u moa̒aluti wolo winulo jaitun, bo diila pakeyalo ragi.

⁶ Roti u podewolo boito musi buta-butao̒lo, lapatao̒ poluwatalo winulo jaitun.

⁷ Wonu u podewolo boito roti u tilubu todelomo bulonggo, roti boito musi pohutuwola monto labu moa̒aluti wau winulo jaitun.

⁸ Roti u pohutuwola wolo dudelo boito musi podewolo ode Eeya wau wuduwolo odeli iimamu tamodelo mota ode mesba.

⁹ Ti iimamu mohama mao̒ ngotayadu monto roti boito lapatao̒ molalangao̒ toitaato mesba odelo tuoto deu̒ ngoa̒amilalo mapilodewo ode Eeya. Boolio moo̒sanangi hilaa lo Eeya.

¹⁰ Lebelio yito duo̒lo mongo iimamu. Roti boito mantali daa̒ sababu hilama lonto ua̒alo u mapilodewo ode Eeya.

¹¹ Bake pohinta duo̒lo Eeya diila mowali ulauwala wolo hula lotiia̒ meaalo ragi, sababu hula lotiia̒ wau ragi diila mowali lalangolo duo̒lo dewo ode Eeya.

¹² Monto bohulo tilapulo huta timii̒du taunu, ngotayadu musi podewolo ode Eeya, bo diila mowali lalangolo toitaato mesba.

¹³ Timii̒du bake pohinta musi watingaalo, sababu watingo odelo tuoto Daantia lo Allahu Taa̒ala woli mongoli. Oditolio ngoa̒amila dewo musi watingaalo.

¹⁴ Wonu bolo timongoli mopodewo ode Eeya pale ubohulo ilotoolai limongoli, delowa mao̒ pale bohu u mailobuo̒ moa̒aluti meaalo u pilanggani.

¹⁵ Pale boito musi poluwatalo winulo jaitun wau wohiyalo alama toitaatio.

¹⁶ Ti iimamu musi molalangao̒ ngotayadu monto pale wau winulo boito wau ngoa̒amila alamalio, debo odelo tuoto deu̒ ngoa̒amilalo mapilodewo ode Eeya.