IMAAMATI 18 - KITABI HABARI MOPIOHE

Polou̒ulauwa udini-dini

¹ Eeya lopoa̒hu olei Musa

² mopo tunggulao̒ ode bangusa lo Isirai̒lu palenta botie, “Wau̒ Eeya Allahu Taa̒ala limongoli.

³ Diila mao̒ podudua̒ huhutu taulo Masiri, tambati u mapee̒enta pilo tibiluloa̒ limongoli, meaalo taulo Kanaa̒n, ode utoonu Wau̒ botia modelo mota olimongoli.

⁴ Dungohe mao̒ butoo̒o-U̒ wau pohutua mao̒ wolo upilo malentaa-U̒ mai. Wau̒ Eeya Allahu Taa̒alamu.

⁵ Dungohe mao̒ wuwuu-uduwaalo wau butoo̒o-U̒ uwohi-U̒ mai olemu. Wonu timongoli mohutu mao̒ odito, tutumulumu moa̒ahu. Wau̒ Eeya.”

⁶ Eeya longohi mai wuwuu-uduwaalo botie. Diila mao̒ pou̒ulauwa wolo tala ngota lo ilaatamu.

⁷ Diila mao̒ pou̒ulauwa woliilamu, dile liyamamu, sababu tio haku liyamamu.

⁸ Diila mao̒ pohina oliyamamu lou̒ mou̒ulauwa wolo tala ngota lodilelio uwewo.

⁹ Diila mao̒ pou̒ulauwa wolo wutatumu taabua meaalo wutatumu watoo̒, mopio tapilo udaa̒ ngobele wolemu meaalo tapilo udaa̒ tobele wewo.

¹⁰ Diila mao̒ pou̒ulauwa wolo wombumu; uito mamoo̒olito batangamu lohihilao.

¹¹ Diila mao̒ pou̒ulauwa wolo wutatumu taabua u ngotiyamo wewo tiilo meaalo ngotiilo wewo tiyamo, sababu tio wutatumu olo.

^12-13 Diila mao̒ pou̒ulauwa wolo titantemu, mopio tio wutato liyamamu meaalo wutato liilaamu.

¹⁴ Diila mao̒ pou̒ulauwa wolo dile lo pou̒wamamu, sababu tio pou̒laamu olo.

¹⁵ Diila mao̒ pou̒ulauwa wolo walao̒ moluhengumu

¹⁶ meaalo wolo dile lo tahulangumu.

¹⁷ Diila mao̒ pou̒ulauwa wolo walao̒ meaalo wombu lotaabua ngota tamaa pee̒enta pilodilemu. Tanu timongolio waitumu, wau uito huhutu udiila patuti.

¹⁸ Diila podiilea wolo wutato dilemu ngotilonggadu dilemu lohihilao donggo tumu-tumulo.

¹⁹ Diila pou̒ulauwa wolo taabua ngota ngotilinggadu tio donggo dula-dulahu, sababu tio todelomo owowoluwoa unajisi.

²⁰ Diila mao̒ pou̒ulauwa wolo dile lotaa wewo; huhutu boito mopowali mao̒ olemu najisi.

²¹ Diila mao̒ tala ngota lowalau̒mu u pobakeelo todelomo pomujaalo Molokh, sababu huhutu boito mohina tanggulo Allahu Taa̒ala Eeyaamu.

²² Talolai̒ diila mowali mou̒ulauwa wolo talolai̒; Allahu Taa̒ala molonuo̒ huhutu boito.

²³ Talolai̒ meaambo taabua, sama-samaata diila mowali mou̒ulauwa wolo binatangi; huhutu moleeto boito mopo najisi olimongoli.

²⁴ Diila mao̒ ponajisia batangamu wolo huhuu-tuwaalo boito, sababu wolo dudelo boito babaa-ngusawalo tahi biluloa̒awa to Kanaa̒n tou̒ diipo timongoli, malo ponajisi mao̒ batanga limongolio. Sababu uito timongolio pilopolahi lo Eeya, alihu timongoli mowali motibiluloa̒ tolipu boito.

^25-27 Timongolio malohutu ngoa̒amila huhutu umoo̒jijio̒ boito, tilinggula huta limongolio lowali najisi. Yi Eeya lohukuumani olimongolio wau diila lopoluasi olimongolio lotibiluloa̒ mola teto. Bo timongoli sama-samaata diila mao̒ pohutu huhuu-tuwaalo boito. Timongoli ngoa̒amila, taulo Isirai̒lu wau tau deli tadebo pee̒-pee̒enta woli mongoli, musi modungoheo̒ wuu̒du wau palenta lo Eeya,

²⁸ alihu timongoli diila mao̒ hukuu-maniyo lo EEYA wau polahio-Lio monto huta boito debo odelo tau-tauwalo tahi totaawa to Eeya, tabilu-biluloa̒ mola teto tou̒ diipo timongoli.

²⁹ Otaawa limongoli deu̒ titaalo tita tamohutu mao̒ huhutu umoo̒jijio̒ boito diilalo anggapuolo pongawaa̒ umati lo Allahu Taa̒ala.

³⁰ Yi Eeya lotahuda mai, “Dungohi mao̒ wuwuu-uduwaalo uilohi-U̒ mai wau diila mao̒ podudua̒a huhutu lotau-tauwalo tahi biluloa̒awa tohuta lo Kanaa̒n tou̒ diipo timongoli. Diila mao̒ ponajisia batangamu lohihilao wolo mohutu huhuu-tuwaalo boito. Wau̒ Eeya Allahu Taa̒alamu.”