IMAAMATI 13 - KITABI HABARI MOPIOHE

Wuu̒du pasali ngongoto lo alipo umoo̒ topotala

¹ Eeya longohi odelei Musa wolei Haruna wuwuu-uduwaalo botie:

² Wonu bolo tahingota-ngotaawa himunggu-munggula neneei̒, meaalo ambalowuta meaalo hibonto-bontoa̒ lanta to alipio u mowali ngongoto lo alipo umoo̒ topotala, tio musi deloolo odeli iimamu wali lei Haruna.

³ Ti iimamu musi momalakisao̒ wimbihu u mongongota to alipo tau boito. Wonu hapato uwoluo towimbihu leeto boito maailanta, wau wimbihu u mongongota oontonga lebe modelomao̒ lo alipo topalitio, yi tau boito modutolo ngongoto lo alipo umoo̒ topotala. Ti Iimamu musi mopoo̒taa mao̒ deu̒ tau boito najisi.

⁴ Bo wonu towimbihu u mongongota olanta wau diila lebe modelomao̒ lo alipo topalitio, wau hapato towimbihu leeto boito olo diila lowali yilanta, yi tau boito musi potihiyolo ngotilonggadu pitu hui mola.

⁵ Todulahee u opitulio, ti iimamu musi muli momalakisao̒ olio. Wau wonu modudua̒ huhamaalio ngongoto boito donggo tutuuwauwa owowoluwoalio wau diila moloo̒po, yi tau boito musi muli potihiyolo ngotilonggadu pitu hui mola.

⁶ Todulahee u opitulio ti iimamu musi muli momalakisao̒ olio, wau wonu towimbihu u mongongota boito malo tambutio̒ wau diila loloo̒po, ti iimamu musi mopoo̒taa mao̒ deu̒ tau boito belesi. Uito ngongoto lo alipo udiila moo̒ topotala. Tau boito musi mongulo mao̒ pakeyangilio wau tio mowali belesi.

⁷ Bo wonu lapatao̒ poi̒laalo mao̒ belesi li iimamu ngongoto lotau boito moloo̒po, tio musi muli motaalua woli iimamu.

⁸ Ti iimamu musi muli momalakisao̒ olio, wau wonu ngongotio memangi malo loo̒po, yi tau boito musi poi̒laalolo najisi; tio modutolo ngongoto lo alipo umoo̒ topotala.

⁹ Tahingota-ngotaawa taduto-dutolaa ngongoto lo alipo umoo̒ topatala musi deloolo odeli iimamu.

¹⁰ Wonu moduduo̒ u pilalakisao̒ li iimamu to alipo tau boito woluo munggulo lanta u olala mohutodu wau hapato towimbihu leeto boito lowali lanta,

¹¹ yi tau boito modutolo ngongoto lo alipo umoo̒ topotala. Ti iimamu musi mopoo̒taa mao̒ tau boito najisi. Diila palalu mopotihi olio, sababu malo patato deu̒ tio najisi.

¹² Wonu ti iimamu moo̒onto mao̒ deu̒ hibonto-bontoa̒a lanta boito malo loo̒po lonto lunggongo demola oa̒ato,

¹³ wau modudua̒ u tululetelio deu̒ ngongotio boito maa ngangaawaa̒lo mao̒ wau ngoa̒amila alipio malowali lanta, yi tau boito poo̒taalo belesi.

¹⁴ Bo wonu tumoodei ambalowuta, ti iimamu musi muli momalakisao̒ olio.

¹⁵ Wonu uito memangi ambalowuta, tau boito musi poilaalolo najisi, sababu tio modutolo ngongoto lo alipo umoo̒ topotala.

¹⁶ Bo wonu ambalowuta boito moluli wau muli mowali lanta, tau boito musi motaalua woli iimamu

¹⁷ u muli palakisaalio. Wonu ambalowuuta boito memangi malowali lanta, ti iimamu mopoilaalo mao̒ deu̒ tau boito belesi.

¹⁸ Wonu tahingota-ngotaawa obohe u maloluli,

¹⁹ bo to bakasiilio lomatangai lanta meaalo hibonto-bontoa̒ lanta monto welamo, yi tau boito musi motaalua woli iimamu

²⁰ u palakisaalio. Wonu u hibonto-bontoa̒ boito oontonga mao̒ lebe modelomo monto alipo topalitio wau hapato towimbihu leeto boito mailanta olo, ti iimamu musi mopoi̒laalo mao̒ deu̒ tau boito najisi. Bohe boito tumulo ngongoto lo alipo umoo̒ topotala.

²¹ Bo wonu moduduo̒ u pilalakisao̒ li iimamu deu̒ hapato towimbihu leeto boito diila lowali yilanta, wau to wimbihio leeto boito diila boti modelomao̒ monto alipo to palitio, bo lebe motambuti lakulio, yi tau boito musi potihiyolo ngotilonggadu pitu hui mola.

²² Wonu bontoo̒ lanta boito moloo̒po, ti iimamu musi mopoi̒laalo mao̒ deu̒ tau boito najisi sababu tio modutolo ngongoto lo alipo umoo̒ topotala.

²³ Bo wonu bontoo̒ lanta boito diila lobolio̒ wau diila olo loloo̒po, uito bo bakasi lobohe, oditolio tau boito poilaalolo belesi.

²⁴ Wonu bolo tahingota-ngotaawa ilotuhata lopali yilaalabu, lapatao̒ alipo topali boito lowali lanta meaalo lanta u hiwela-welaama,

²⁵ ti iimamu musi momalakisao̒ olio. Wonu hapato towimbihu leeto boito lowali lanta wau paliilio lebe modelomao̒ wolo alipo topalitio, yi ngongoto lo alipo umoo̒ topotala boito malo oombita topali u yilaalabu boito, wau ti iimamu musi mopoi̒laalo mao̒ deu̒ tau boito najisi.

²⁶ Bo wonu hapato totambati boito diila lowali lanta wau wimbihu leeto boito lebe modelomao̒ lo alipo topalitio, bo lebe motambutio̒ lakulio, yi tau boito musi potihiyolo ngotilonggadu pitu hui mola.

²⁷ Todulahee u opitulio ti iimamu musi muli momalakisao̒ olio. Wonu bontoo̒ lanta boito moloo̒po, yi tau boito modutolo ngongoto lo alipo umoo̒ topotala, wau musi poilaalolo najisi.

²⁸ Bo wonu bontoo̒ lanta boito diila lobolio̒ wau diila olo loloo̒po, bo lebe lanta mao̒ lakulio, uito diila ngongoto lo alipo umoo̒ topotala. Ti iimamu musi mopoi̒laalo mao̒ deu̒ tau boito belesi, sababu laku lolanta boito bo bakasi lopali u yilaalabu.

²⁹ Wonu talolai̒ ngota meaalo taabua ngota modutolo ngongoto lo alipo to lunggongio meaalo to danggulio,

³⁰ tio musi palakisao̒ li iimamu. Wonu towimbihu u mongongoto boito oontonga lebe modelomao̒ wolo alipo topalitio, wau huwoo̒ meaalo danggu towimbihu leeto boito lowali monto lalahe tulusi loduduulahu, yi tau boito modutolo ngongoto lo alipo umoo̒ topotala wau musi poilaalolo najisi.

³¹ Wonu moduduo̒ u pilalakisao̒ li iimamu towimbihu u mongongoto diila oontonga lebe modelomao̒ wolo alipo topalitio, bo diila olambuto meaalo danggu u seehati towimbihu leeto boito, yi tau boito musi potihiyolo ngotilonggadu pitu hui mola.

³² Todulahee u opitulio, ti iimamu musi muli momalakisao̒ towimbihu u mongongoto, wau wonu ngongoto boito diila moloo̒po wau diila o huwoo̒, meaalo danggu u monto lalahe towimbihu leeto boito, donggo poli oontonga mao̒ diila boti modeloma monto alipo topalitio,

³³ tau boito musi monguluheo̒ huwoo̒ meaalo danggu topalito lotambati u mongongoto boito. Lapatao̒ tio musi muli potihiyolo ngotilonggadu pitu hui mola.

³⁴ Todulahee u opitulio, ti iimamu musi muli momalakisao̒ olio. Wonu ngongotio diila moloo̒po wau to wimbihu leeto boito oontonga mao̒ diila boti modelomao̒ monto alipo topalitio, yi tau boito poilaalolo belesi wau musi mongulo pakeyangilio.

³⁵ Bo wonu lapatao̒ poilaalo mao̒ belesi ngongotio moloo̒po,

³⁶ yi ti iimamu musi muli momalakisao̒ olio. Wonu ngongoto boito memangi moloo̒po, diilalo palalu ti iimamu momalakisao̒ wolo huwoo̒ meaalo danggu lotau boito lowali lalahu, sababu malo patato deu̒ tio najisi.

³⁷ Bo wonu moduduo̒ huhama li iimamu ngongotio diila moloo̒po, wau lobutu mai huwoo̒ meaalo danggu useehati totambati boito, yi ngongota boito maloluli, wau ti iimamu musi mopoi̒laalo mao̒ olio belesi.

³⁸ Wonu bolo talolai̒ ngota meaalo taabua ngota o himunggu-munggula lanta to alipio,

³⁹ ti iimamu musi momalakisao̒ tau boito. Wonu himunggu-munggula boito oontonga mao̒ lanta motambuti, tio bo iloo̒ombita lo lolapo, wau poilaalolo belesi.

^40-41 Wonu talolai̒ ngota lowali dayato towimbihu longungu meaalo wimbihu tau̒ lo lunggongio, dayato boito diila mopowali olio najisi.

⁴² Bo wonu mobutu mai munggulo lanta monto welama totambati u odayato, yi tio modutolo ngongoto lo alipo umoo̒ topotala.

⁴³ Ti iimamu musi momalakisao̒ tau boito, wau wonu memangi woluo munggulo lanta monto welama,

⁴⁴ ti iimamu musi mopoi̒laalo mao̒ deu̒ tio najisi kalana tio modutolo ngongoto lo alipo umoo̒ topotala, to lunggongio.

⁴⁵ Tahingota-ngotaawa taduto-dutolo ngongoto lo alipo umoo̒ topotala, musi momake mao̒ pakeyangi u hikada-kadanga wau mopoluli mao̒ huwoi̒o moa̒puto. Tio musi molanggu mao̒ ambahu walungo bayalio wau monguwa-nguwaatia̒ mola, “Najisi! Najisi!”

⁴⁶ Ngotilonggadu duto-dutolo lo ngongota boito tio najisi wau musi motitolaa to bulemengo kekee-mawaalo, molamingo monto tau-tauwalo wewo.

Wuu̒du pasali lou̒ motupo

⁴⁷ Wonu woluo motupo to pakeyangi meaalo kaingi monto lambuto himba umoa̒aluti meaalo lineni,

⁴⁸ meaalo towalito meaalo penu boli wolo wambai̒o upilohutu monto walito,

⁴⁹ wau laku lou̒ motupo boito monto yiduma meaalo monto welama, yi motupo boito pange lou̒ moloo̒po wau musi pobilohulo odeli iimamu.

⁵⁰ Ti iimamu musi momalakisao̒ upango boito, lapatao̒ mopotihi mao̒ ngotilonggadu pitu hui mola.

⁵¹ Todulahee u opitulio tio musi muli momalakisao̒, wau wonu umotupo boito memangi malo loo̒po, yi upango boito najisi.

⁵² Ti iimamu musi molumbilao̒ balangi boito, sababu umotupo boito pange lou̒ moloo̒po, oditolio musi pomaahulo wolo tulu.

⁵³ Bo wonu moduduo̒ u pilalakisao̒ li iimamu umotupo boito diila moloo̒po to upango boito,

⁵⁴ tio mopoa̒hu mao̒ alihu upango boito wulowalo wau potihiyolo ngotilonggadu pitu hui mola poli.

⁵⁵ Lapatao̒ ti iimamu musi muli momalakisao̒. Wonu umotupo boito diila moloo̒po bo lakulio debo tutuuwauwa, upango boito donggo najisi wau musi tumbilalo, eleponu umotupo boito bo woluo towimbihu talu meaalo to dibalakalio.

⁵⁶ Bo wonu moduduo̒ pilalakisao̒ li iimamu umotupo boito malo tambutio̒, wimbihu umotupo monto kaingi meaalo walito boito musi kedengolo.

⁵⁷ Wonu lapatio mao̒ muli mobutu mai, yi umotupo boito moloo̒po, wau taa ohuwolio musi molumbilao̒ upango boito.

⁵⁸ Wonu lapatio mao̒ yilulowa laku lo umotupo to upango boito yileenggi, yi upango boito musi muli wulowalo, deu̒ito anggapuolo belesi.

⁵⁹ Odi-odieello mola wuwuu-uduwaalo pasali lo umotupo uwoluo to pakeyangi meaalo kaingi monto lineni meaalo lambuto himba umoa̒aluti, meaalo to wolo wambai̒o u pohutuwolo monto walito.