IMAAMATI 11 - KITABI HABARI MOPIOHE

Bibii-natangiyalo uhalale wau uharamu

¹ Eeya longohi mao̒ olei Musa wolei Haruna wuwuu-uduwaalo botie

^2-3 ode bangusa lo Isirai̒lu. Ngoa̒amila binatangi u hitumula totudu lohuta u hemoheede wau luo̒bio hibutaa̒, deu̒yito-yito halale wau mowali tamelolo.

^4-6 Diila mao̒ polamela unta, polandu meaalo udu lo walanta. Binatangi boito haramu sababu eleponu hemoheede, luo̒bio diila hibutaa̒.

⁷ Diila mao̒ polamela boi. Binatangi boito haramu, sababu eleponu luo̒bio hibutaa̒, binatangi boito diila hemoheede.

⁸ Tapulio diila mowali tamelolo wau patelio olo diila mowali dedetolo sababu binatangi boito haramu.

⁹ Timongoli mowali molamela totoonulalo tola u hidala-dalaala obulihu wau otolitio̒.

^10-12 Binatangi u hitumula todelomo taluhu bo diila obulihu wau diila otolitio̒ yito haramu, oditolio diila mowali tamelolo, wau patelio diila mowali dedetolo.

^13-19 Towolota lo bubuu-rungiyalo, uwumbutio mola botie diila mowali tamelolo sababu najisi: bulungi rajawali, maluo̒ moluluwola, totoonulalo bulia u hidala-dalaala, nasari, paao̒ bulungi unta, camari, bitu-bitua, wau totoonulalo duwayo u hidala-dalaala, undani, bulungi kasa wau abuhu.

²⁰ Ngoa̒amila buhudu u opolipii̒o yito haramu,

²¹ ngopohia umowali lumantio̒.

²² Oditolio bulita, ngia-ngia, wau bulita moidu mowali tamelolo.

²³ Bo ngoa̒amila buhudu wewo u opolipio̒ wau olo hia̒lapa yito haramu.

^24-28 Tahingota-ngotaawa mowali najisi dilumutu dulahee tumolopaa mota wonu tio modedeta pate lotala tuwau lo binatangi botie: binatangi u oluo̒bu, ngopohia u luo̒bio hibutaa̒ wau hemoheede, wau binatangi u o oa̒tio wopato wau odanggapio. Titaalo tita tamodelo pate lo binatangi u odito musi mongulo mao̒ pakeyangilio, bo tio debo donggo najisi dilumutu dulahee tumolopaa mota.

^29-30 Udu lohuta, udu leidaa̒, udu kikiio̒, tombaao̒, totoonulalo tumbihe u hidala-dalaala, landa, biyawao̒, buliaa̒ata, buo̒yo, bua̒bide yito haramu.

³¹ Titaalo tita tamo dedetao̒ binatangi boito meaalo patelio mowali najisi dilumutu dulahee tumolopaa mota.

³² Wonu pate lo binatangi boito modehu toitaato hitua-tuawua lo upango, yi upango boito mowali najisi. Sua̒li boito pohu-pohutu duo̒lo totoonulalo upango u hidala-dalaala monto ayu, kaingi, walito, meaalo kaingi yute, wau diila mowali sua̒li ode wolo upango boito pomake. Upango boito musi wahumolo todelomo taluhu, bo debo najisi dilumutu dulahee tumolopaa mota.

³³ Wonu bolo pate boito modehu ode delomo ulongo huta, ngoa̒amilalo uwoluo todelomo ulongo boito mowali najisi, wau ulonga boito musi poo̒olo.

³⁴ Ua̒alo u otuhaata lotaluhu monto ulongo boito mowali najisi, wau minumani uwoluo todelomo ulongo boito olo mowali najisi.

³⁵ Penu boli wolo u odehuwa lopate boito mamowali najisi. Popaluwa meaalo tambati polalangalo monto huta u odehuwa lopate boito musi poo̒olo sababu najisi.

³⁶ Ngopohia butu lotaluhu meaalo ali, totoonulalo u wewolio mowali najisi wonu otuhaata lopate.

³⁷ Wonu pate boito modehu toitaato bili umapo mua̒yadeo̒, yi bili boito debo belesi.

³⁸ Bo wonu bili boito donggo wahu-wahumo todelomo taluhu lapatao̒ odehuwa lopate boito, yi bili boito mowali najisi.

³⁹ Titaalo tita tamo dedetao̒ pate lo binatangi u halale mowali najisi dilumutu dulahee tumolopaa mota.

⁴⁰ Taa u modelo meaalo molamela pate lo binatangi boito musi mongulo mao̒ pakeyangilio, bo tio debo najisi dilumutu dulahee tumolopaa mota.

^41-42 Ngoa̒amila binatangi u hiu̒uu̒pa daata-daatalo mao̒ toitaato huta, mopio u hialapa u o oa̒ato wopato meaalo u o oa̒ato dadaata, deu̒yito-yito haramu wau diila mowali tamelolo.

⁴³ Diila mao̒ ponajisia batangamu lou̒ molamela binatangi u odito boito.

⁴⁴ Wau̒lo Eeya Allahu Taa̒ala limongoli, sababu uito dahai mao̒ alihu timongoli debo mantali, sababu Wau̒ mantali.

⁴⁵ Wau̒lo Eeya talodelo olimongoli yilumualai lonto Masiri, alihu Wau̒ mowali Allahu Taa̒ala limongoli. Mamusi timongoli mantali, sababu Wau̒ mantali.

⁴⁶ Ui-uitolo wuu̒du pasali lo binatangi tuwo-tuwoto bulungi, binatangi u hitumula todelomo taluhu wau u hiu̒uu̒pa daata-daatalo mao̒ toitaato huta.

⁴⁷ Timongoli musi mowali mopo hiihedeo̒ towolota ubelesi wau unajisi, towolota lo binatangi umowali tamelolo wau binatangi udiila mowali tamelolo.