IMAAMATI 1 - KITABI HABARI MOPIOHE

Bake yilalango

¹ Lonto Kema-Lio, Eeya lotianga olei Musa wau longohi olio wuwuu uduwaalo

² u musi dungohe mao̒ taulo Isirai̒lu. Wonu bolo tahingota-ngotaawa mopodewo binatangi ode bake yilalango duo̒lo Eeya, tio mowali mopodewo mao̒ sapi, himba, meaalo batadelio.

³ Wonu u podewolo yito sapi tuwau, binatangi boito musi ulai̒ wau diila o tailolio. Sapi boito musi deloolo ode huhebu Kema lo Eeya, alihu Eeya motuhatawa wolo tau boito.

⁴ Lapatao̒ tio musi mopodutu mao̒ uluu̒lio toitaato lunggongo binatangi boito, yi dewolio matolimo lo Eeya duo̒lo pongambungualo dusalio.

⁵ Lapatao̒ sapi boito musi olotolo totalu huhebu lo Kema. Duhulio musi podewo lomongo iimamu wali mai lei Haruna ode Eeya, lapatao̒ potoohulo to opato biihu mesba totalu huhebu lo Kema.

⁶ Lapatao̒ tau boito musi mongalita wau mongolo-ngolongao̒ binatangi boito.

⁷ Mongo iimamu musi mopolei̒to tulu toitaato mesba tulusi mopo woludeo̒ ayu podiio̒ toitaatio.

⁸ Timii̒du olongo bake, leituwoto lunggongo wau tabolio, musi podutuo mao̒ limongolio toitaato tulu.

⁹ Lapatao̒ tau boito musi mongulo mao̒ tuango ombongio wau bungolopa losapi boito, wau ti iimamu tao̒ tuugasi musi molalangaao̒ ngoa̒amilalo. Boolo bake yilalango boito moo̒sanangi hilaa lo Eeya.

¹⁰ Wonu u podewolo himba tuwau meaalo batade, binatangi boito musi ulai̒ wau diila o tailolio.

¹¹ Tau boito musi mongolotao̒ binatangi boito to ambahu tilayo lo mesba, lapatao̒ mongo iimamu musi molooheo̒ duhulio to opato biihu mesba.

¹² Tou̒ binatangi boito mai̒lo-ilolongo, ngoa̒amila olongo, tuwotuwoto lunggongo wau tabolio, musi podutuo mao̒ li iimamu toitaato tulu lomesba.

¹³ Lapatao̒ tau boito musi mongulo mao̒ tuango ombongio wau bungolopa lo binatangi boito. Lapatao̒ ti iimamu musi mopodewo ngoa̒amilalo ode Eeya, wau molalangao̒ toitaato mesba. Boolo bake yilalango boito moo̒sanangi hilaa lo Eeya.

¹⁴ Wonu u podewolo bulungi tuwau, musi bulungi tarakuku meaalo bulungi poombo muda.

¹⁵ Ti iimamu tamusi modelo mao̒ bulungi boito ode mesba, lapatao̒ momimideo̒ buloo̒lio wau molalango lunggongio toitaato mesba. Duhu lobulungi boito musi pitiloolo ode bulemengio totili lomesba.

¹⁶ Toombolo wolo ngoa̒amila tuangio musi yinggilolo, lapatao̒ tapilolo ode ambahu tiimuru lomesba totambati lo peaahuo̒.

¹⁷ Lapatao̒ bulungi boito musi antangolo tobungo lo polipii̒o, bo polipii̒o diila mowali tunggula moputu. Lapatao̒ bulungi boito musi lalangolo toitaato mesba. Boolo bake yilalango boito moo̒sanangi hilaa lo Eeya.