ILOOWALI 9 - KITABI HABARI MOPIOHE

Daantia lo Allahu Taa̒ala wolei Noho

¹ Allahu Taa̒ala lobalakati olei Noho wau mongo walai̒o wau lotahuda, “Potiwala-walao̒olo wau potiwombu-wombulo mola u dadaata, alihu waliimu mai motibiluloa̒a to ngoilanggubu dunia.

² Totoonulalo bulungi wau tola wau binatangi uwewo mamoohe olemu. Ngoa̒amilalo woluo todelomo kawasaamu.

³ Ngoa̒amilalo boito mowali ua̒alomu, debo odelo olo pipii-lomulowalo u moidu; ngoa̒amilalo boito wohi-U̒ mai olemu u mowali ua̒alomu.

⁴ Tuwa-tuwaulo u diila mowali aalomu yito tapu u donggo oduhulio, sababu nyawa boito woluo todelomo duhu.

⁵ Timii̒du tau wau binatangi u momate manusia mate-mateelo mao̒ mahukuu-maniyo-U̒ mate.

⁶ Manusia pilopowali mai debo odelo Wau̒; sababu uito, titaalo tita tamomate manusia mate-mateelo mao̒, tio olo mapatee lomanusia mate-mateelo mao̒.

⁷ Ooo̒, timongoli musi moti walao̒olo wau moti wombulo mola u dadaata, alihu waliimu mai motibiluloa̒a to ngoilanggubu dunia.”

⁸ Allahu Taa̒ala lotahuda mai odelei Noho wau mongo walai̒o,

⁹ “Botia, Wau̒ mohutu mai daantiya-U̒ wolimongoli wau wolo waliimu,

¹⁰ wau wolo totoonulalo mahaluku u hitumula, deu̒yito-yito bubuu-lungiyalo wau ngoa̒amila binatangi lo tudulio, ooo̒ ngoa̒amilalo u yilumualai lonto kapali boito pee̒-pee̒enta wolimongoli.

¹¹ Uti-utieelo daantiya-U̒ wolimongoli: Wau̒ modanti mai deu̒ ngoa̒amila mahaluku u hitumula diilalo pobinasa-U̒ mai wolo taluhee daa̒. Madiduu̒ taluhee daa̒ u mopobinasa mai dunia botie.

¹² Odelo tuoto lo daantia u ohiheo-hiheolo mao̒, u pohutuwo-U̒ mai wolimongoli wau wolo totoonulalo mahaluku u hitumula,

¹³ yi madutuwo-U̒ duhi lo butuu-U̒ to heengo odelo tuoto lo daantiya-U̒ wolo dunia.

¹⁴ Timii̒du, wonu Wau̒ molau̒be hulungo wolo heengo, lapatao̒ duhi lo butu boito oontonga,

¹⁵ Wau̒ mamoe̒elai danti-U̒ olemu wau to ngoa̒amilalo mahaluku u hitumula, deu̒yito-yito deu̒ taluhe daa̒ diilalo mopobinasa mai totoonulalo u hitumula.

¹⁶ Wonu bolo duhi lo butu oontonga to heengo, Wau̒ mamo miloheeo̒ wau moe̒ela mola daantia u ohiheo-hiheolo mao̒ boito to wolota-U̒ wolo totoonulalo mahaluku u hitumula to dunia.

¹⁷ Ui-uitolo tuotio lo danti-U̒ uwohi-U̒ mai ode totoonulalo mahaluku u hitumula todunia.”

Tei Noho wau mongo walai̒o

¹⁸ Mongo walae̒e Noho tailumualai lonto kapali boito deu̒yito-yito tei Sem, Yapet, Ham. (Tei Hamu yito tiyamo lei Kanaa̒n.)

¹⁹ Walae̒e Noho toulota boito yito tinenemoya lo ngoa̒amila taa todunia.

²⁰ Tei Noho yito ngotaalio lo tamoomengia, wau tiolo tabohu-bohulio helohutu ilengi lo angguru.

²¹ Lapatao̒ tei Noho longilu anggurulio, tio mahiluwoa̒. Yilinggilio pakeyangilio ngoa̒amila tulusi lotuluhuulo mola tio laalaala todelomo kemalio.

²² Tou̒ tei Ham, deu̒yito-yito tiyamo lei Kanaa̒n, loo̒onto mao̒ deu̒ tiyamolio laalaala, tio mailumualao̒ wau lopoo̒taa mao̒ sua̒li boito to wutatio duulota.

²³ Lapatao̒ tei Sem wolei Yapet malohama jumba tuwau wau lomua̒deo̒ to binggungi mongolio. Timongolio lonao̒ tou-touli tilumuwota ode kema boito wau lopo hulotao̒ oliyamo limongolio jumba boito. Timongolio lomalingao̒ baya alihu diila moo̒onto oliyamo limongolio u laalaala boito.

²⁴ Lapatao̒ tei Noho lotota mai lou̒ tau lonto huwoi̒o wau lotota mao̒ wolo u pilohutu lo walai̒o tawali-yali daa̒ to batangalio,

²⁵ tio malo loi̒ya, “Malaa̒-laa̒anatilo tei Kanaa̒n! Tio mamowali wato u hina-hina duo̒lo mongo wutatio.

²⁶ Pujiaalo mola Eeya, Allahu Taa̒ala lei Sem! Tei Kanaa̒n mamowali wato lei Sem.

²⁷ Hinta Allahu Taa̒ala moduhengai balakati tolei Yapet wolo mopoluasi tambati poti biluloa̒lio. Hinta waliilio motibiluloa̒ pee̒-pee̒enta wolo wali lei Sem. Kanaa̒n mamowali wato lei Yapet.”

²⁸ Lapatao̒ taluhe daa̒ boito, tei Noho donggo tilumumula mola tolo hetuto limo lopulu lotaunu poli.

²⁹ Tio yilate to umulu tio lohetuto limo lopulu lotaunu.