ILOOWALI 7 - KITABI HABARI MOPIOHE

Taluhe daa̒

¹ Lapatao̒ malo tahuda mai Eeya odelei Noho, “Wau̒ loo̒onto deu̒ yio̒ tuwa-tuwaulo taa u helohutu kahandaki-U̒. Oditolio, tuwotolo mao̒ ode delomo kapali boito pee̒-pee̒enta wolo ngoa̒amila ngaalaa̒mu.

^2-3 Podelo mao̒ olo pitu lo panggalo monto timii̒du bulungi u ngodalaala wau binatangi wewolio u halale, hiambola monto u haramu bo ngopanggalo wambao̒ monto timii̒du ngodalaala. Pohutualo mao̒ uito alihu monto timii̒du binatangi ngodalaala woluo u molopato monto obobinasa wau mowali lebe motonggalao̒ poli to dunia.

⁴ Donggo pitu hui mola poli Wau̒ mamopo tuhutai didi u diila tamoole ngotilonggadu wopato pulu hui wau dulahu alihu mahaluku tumu-tumulo u mapilopo wali-U̒ mai boito binaasa.”

⁵ Lapatao̒ tei Noho helo pohutu mao̒ totoonulalo u pilomalenta mai lo Eeya olio.

⁶ Tei Noho o umulu wolomo hetuto lotaunu tou̒ lotoduo mai taluhe daa̒ to dunia.

⁷ Tei Noho wau dilelio, wau mongo walai̒o wolo dile limongolio bua, matilu muwotao̒ ode delomo kapali boito, u mopoa̒ahu lobatanga monto taluhe daa̒.

⁸ Bangge tuwau teelo tuwau monto timii̒du bulungi ngodalaala wau binatangi wewolio – mopio u halale meaalo u haramu –

⁹ tilumuwotao̒ ode delomo kapali boito pee̒-pee̒enta wolei Noho, tutuuu̒de wolo palenta lo Allahu Taa̒ala.

¹⁰ Pitu hui mala lapatio mao̒ taluhe daa̒ loloo̒polo mola todunia.

¹¹ Tou̒ tei Noho o umulu wolomo hetuto lotaunu, todulahu opulaa pitulio to hulala oluolio, lopoo̒olo mola totoonulalo butu lo taluhu to walungo huta. Totoonulalo huhebu lo taluhe to hulungo lohuo̒,

¹² wau didi lodehu ngotilonggadu wopato pulu hui wau dulahu.

¹³ To dulahuulo boito, tei Noho wau dilelio tilumuwotao̒ ode delomo kapali boito pee̒-pee̒enta wolo walai̒o toulota, deu̒yito-yito tei Sem, Yapet walei Ham wolo dile limongolio.

¹⁴ Pee̒-pee̒enta woli mongolio tilumuwotao̒ olo timii̒du bulungi ngodalaala wau binatangi wewolio, mopio u moluamo meaalo u molinggelo, u hulinta meaalo u mooyoto.

¹⁵ Bangge tuwau wau teelo tuwau monto timii̒du ngodalaala mahaluku u tumu-tumulo tilumuwotao̒ ode delomo kapali boito pee̒-pee̒enta wolei Noho,

¹⁶ tutuuu̒de wolo palenta lo Allahu Taa̒ala olio. Lapatao̒ ngoa̒amilalo tilumuwotao̒, Eeya loheu̒tao̒ huhebu lo kapali.

¹⁷ Taluhee daa̒ boito loo̒-loo̒opo tulusi ngotilonggadu wopato pulu hui mola, wau taluhu malowali lolanggata daa̒ tilinggula kapali boito yilumantunga.

¹⁸ Taluhu lebe hemo langgata mola, wau kapali boito mailu mantunga totudu lotaluhu.

¹⁹ Taluhu boito tulusi he oduhenga mola langgatio, tilinggula loa̒humo lomola huhuu-iduwaalo u molanggato daa̒.

²⁰ Taluhu botu-botulaa tulusi tunggula langgatio loo̒oma pitu lo meeteri toitaato booboli-tutuo̒walo hui̒du.

^21-23 Eeya lopobinasa mai totoonulalo mahaluku u hitumula todunia botie: Manusia, bulungi wau binatangi lotudulio mopio u kekeei̒ meaalo u duduulaa̒. Tadiila bilinasa bo tei Noho wambao̒ wau ngoa̒amila tawoluo pee̒-pee̒enta wolio todelomo kapali boito.

²⁴ Taluhu boito diila lopowoti-wooti ngotilongadu ngohetuto limo lopulu hui mola hiheolio.