ILOOWALI 44 - KITABI HABARI MOPIOHE

Piyala uilooli

¹ Tou̒ donggo boito tei Yusu lomalentao̒ tau̒wa lou̒ tamoo-ngulusia ngaalaa̒lio, “Tuangilo mao̒ kado lotau-tauwalo boito wolo pale, ngodaata u mowali odelowa limongolio, wau potuwota mao̒ doi tokado limongolio ngota-ngota, toitaato pale boito.

² Potuwota mao̒ olo piyala talaa̒au̒ ode delomo kado lo tawaliyali daa̒ limongolio, pee̒-pee̒enta wolo doi umaa pilomayali mai palelio.” Tamoomayawa boito lopohutu mao̒ palenta boito.

³ Loloombulio mola, didimodupo daa̒, tei Yusu lobua̒ala wolo mongo wutatio, tulusi timongolio lomonggato wolo kolodai limongolio.

⁴ Timongolio diipo lolamingao̒ lonto kota boito, tou̒ tei Yusu loloi̒ya mao̒ ode tau̒wa lo tamoo-ngulusia ngaalaa̒lio “Aliheo̒ yilapita mota tau-tauwalo boito, wonu maa ilolapita, polelea mao̒ olimongolio, ‘Yilongola timongoli malo lontuli umopiohe wolo u moleeto?

⁵ Yilongola timongoli malotao̒ piyala talaa̒ li tuaniu̒? Piyala boito hepomakelio u pongilumalo wau odelo pakaakasi polamaliyalo. Timongoli malohutu u moleeto daa̒!’ ”

⁶ Tou̒ tamoomayawa boito leidungga mota ode mongo wutatee Yusu, pilolelelio mao̒ wolo u pilomalentai lei Yusu.

⁷ Tametao̒ limongolio ode olio, “Wolo makusudu li Tuani? Amiaatia motadia mai deu̒ amiaatia diila helohutu odito!

⁸ Otaawa li Tuani lohihilao deu̒ doi u ilodungga lamiaatia to delomo kakaa-dowaalo lamiaatia toitaato pale boito, mapilo hualingai lamiaatia odeli Tuani. Oditolio, diila pongalo aakali amiaatia motao̒ talaa̒ meaalo hulawa monto bele li gubolonulu!

⁹ Tuani, humayaalio upango boito odungga to talangota lamiaatia, huliilo mao̒ tio moo̒tapu hukuumani mate, wau amiaatia mowali wato li Tuani.”

¹⁰ Tamoomayawa boito loloi̒ya mao̒, “Ooo̒; bo wambao̒ to olio tou̒toonu piyala boito odungga, matio-tiolo tamowali watou̒; taa wewo mowali monao̒lo.”

¹¹ Lapatao̒ wolo ali-alihu timongolio ngota-ngota malo polaahu wau lomuo̒ mao̒ kadolio.

¹² Tamoomayawa olei Yusu boito malo malakisao̒ wolo ulintapo kakaa-dowaalo boito, tumulalo mai kado ohuu̒wo lo tahulangio daa̒ demola tawaliyali daa̒, wau piyala boito ilodunggaalio todelomo kado lei Benyamin.

¹³ Mongo hulangio masiluukali daa̒ tilinggula helo ngede-ngedengao̒ pakeyangi limongolio. Timongolio malopo buheetao̒ kolodai limongolio wau luli lohualinga mota ode kota.

¹⁴ Tou̒ tei Yehuda wau mongo wutatio leidungga mota ode bele lei Yusu, tio donggo woluo teto, wau timongolio losujudulo mola totalulio.

¹⁵ Yi malo loi̒ya tei Yusu, “Wolo u pilohutu limongolio boito? Wolo diila otaawa limongoli deu̒ taa u debo odelo wau̒ botie mowali motota mao̒ huhutumu u moleeto wolo ilimi mongisimu?”

¹⁶ “Wolo u mowali polele mai lo mongowatotia, Tuani lo watotia?” tametao̒ lei Yehuda. “Woloolo mola mongowatotia mowali mobuutola mai wau mopo otutu mao̒ batanga lo mongowatotia? Allahu Taa̒ala malopoo̒ patatai totala lo mongowatotia. Botia mongowatotia ngoa̒amila wato li Tuani, diila bo tio tapiloo̒ tapula piyala boito.”

¹⁷ Ualei Yusu, “Diila! Wau̒ diila motohilaa mohutu odito! Bo to olio tamaa piloo̒ tapula piyala boito tamowali watou̒. Tawewo mowali mohualingo wolo bebasi odeli paapamu.”

Tei Yehuda lopodulua olei Benyamin

¹⁸ Tei Yehuda malo himbideo̒ olei Yusu wau loloi̒ya mao̒, “Maa̒apu, Tuani lo watotia, poluasia mai watotia muli mobisala woli Tuani lo watotia. Diila mao̒ oingoi watotia; ti Tuani lo watotia debo odelo ti olongia lo Masiri lohihilao.

¹⁹ Ti Tuani lo watotia malohintu mai to mongowatotia botie, ‘Wolo timongoli donggo otiyamo meaalo owutato wewo?’

²⁰ Mongowatotia helo lametai, ‘Tiyamo lo mongowatotia mapanggola wau tawaliyali daa̒ lo mongowatotia pilotutulio mai tou̒ tiyamo lo mongowatotia maa o umulu panggola. Tamohuhula tangotiilo wolo tawaliyali lo mongowatotia boito mailate, oditolio botia bolo tio lohihilao wambao̒ tadonggo tumu-tumulo monto olimongolio duulota, wau ti paapa motolia̒ngo daa̒ olio.’

²¹ Ti Tuani lo watotia malopoa̒hu mota mongowatotia modelo mai olio, alihu ti Tuani lo watotia mowali momilohe olio,

²² tulusi mongowatotia helo lametai deu̒ walao̒ boito diila mowali mobua̒ monto li paapalio; wonu tio mobua̒ monto li paapalio, ti paapa maamate.

²³ Lapatao̒ ti Tuani lo watotia malo loi̒ya, ‘Timongoli diilalo mowali mai motaalua wolau̒ wonu diila modelo mai tawali-yaliimu daa̒ boito.’

²⁴ Tou̒ mongowatotia luli lohualinga mola odeli paapa lo mongowatotia pilopo tunggulao̒ lo mongowatotia ode olio loi̒ya li Tuani lo watotia boito.

²⁵ Lapatao̒ ti paapa lo mongowatotia luli lopoa̒hu mai mongowatotia mai motali ua̒alo.

²⁶ Bo mongowatotia helo lametao̒, ‘Amiaatia diila mowali monao̒ mola odito, sababu amiaatia diila mowali mola motaalua woli goboronuru wonu tawaliyali daa̒ lamiaatia diila moduduo̒. Amiaatia bo mowali monao̒ mola wonu tio monao̒ olo.’

²⁷ Lapatao̒ ti paapa lo mongowatotia malo loi̒ya, ‘Otaawa limongolio deu̒ ti Rahel, dileu̒ bo owalao̒ duulota.

²⁸ Tabohulio malo lolaa mao̒ olau̒. Tio tantulo mao̒ madilangapo lo binatangi mongantau, sababu tilinggula botia tio diilalo iloontongau̒.

²⁹ Wonu timongoli mohama mao̒ walao̒ tawaliyali daa̒ botie monto olau̒, wau wonu mowali mai wolo-wolo to olio, yi owooloolo u pilodungga mai limongoli ode olau̒ boito mamoo̒ akiibati opopateu̒, sababu wau̒ botie mapanggola.’ ”

^30-31 “Sababu uito, Tuani lo watotia,” ualio mao̒ lei Yehuda odelei Yusu, “wonu watotia muli mohualinga mola odeli paapa lo mongowatotia diila wolo tawaliyali daa̒ lo mongowatotia boito, tantulo mao̒ ti paapa lo mongowatotia maamate. Nyawalio bo wune-wunela to walai̒o boito, wau tio malo odito panggolalio tilinggula owooloolo u podungga mao̒ lo mongowatotia olio boito mamoo̒ akiibati opopatelio.

³² Tidiyolo mao̒, watotia malodanti toli paapa lo watotia deu̒ watotia tamowali pongaku to walao̒ boito. Watotia loloi̒ya mao̒ olio, deu̒ wonu watotia diila muli mopo walingai walao̒ boito ode olio, watotiyalo tamaa momanta hukuumani ngotupa lo tutumulo.

³³ Oditolio, watotia momolohone, Tuani lo watotia, poluasia mai watotia motibiluloa̒ tewe mowali wato li tuani lo watotia mobuulota wolo tawaliyali daa̒ lo mongowatotia botie; huliyalo mao̒ tio mohualinga mola pee̒-pee̒enta wolo mongo mohuhulalio.

³⁴ Woloolo mola watotia mowali mohualinga mola odeli paapa lo mongowatotia wonu walao̒ boito diila modudua̒ mola? Watotia diila moo̒ tahangi de moo̒onto mao̒ marapo u mamotoduo mai toli paapa lo mongowatotia boito.”