ILOOWALI 4 - KITABI HABARI MOPIOHE

Tei Kain wau tei Habel

¹ Lapatao̒ tei Adamu lo sootubua woli Hawa, dilelio, wau ilombodaa̒lo mola taabua boito. Tio lopotutu mai talolai̒ ngota wau loloi̒ya, “Wolo tilulungia lo Eeya wau̒ maloo̒tapu walao̒ talolai̒ ngota.” Yi iluntelio walao̒ boito tei Kain.

² Lapatao̒ ti Hawa luli lopotutu mai walao̒ talolai̒ ngota tanggulio Habel. Tei Habel lowal diti lohimba, bo tei Kain lowali tamoomengia.

³ Dengolo saaa̒ti lapatio mao̒ tei Kain malohama ngotayadu lonto tilapulo ilengilio tulusi pilopo dewolio ode Eeya.

⁴ Lapatao̒ tei Habel malohama walao̒ himba hulango lonto tala tuwau lo himbalio, ilolotio mao̒, tulusi pilopo dewolio ngobutao̒ u mopiohe daa̒ to Eeya. Eeya aahudu olei Habel wau dewolio,

⁵ bo diila lololimo olei Kain wau dewolio. Tei Kain maloingo daa̒, bayalio debo odelo mamongantau.

⁶ Yi malo tahuda Eeya to olei Kain, “Yilongola yio̒ moingo? Yilongola bayamu debo odelo mamongantau?

⁷ Wonu yio̒ mohutu u mopiohe, tantu yio̒ imiyomo; bo wonu yio̒ mohutu u moleeto, yi dusa mohima u tumuwotao̒ ode delomo hilaamu. Dusa mamotolo kawasa to batangamu, bo yio̒ musi mopo olaaheo̒ dusa boito.”

⁸ Lapatao̒ tei Kain loloi̒ya mao̒ odelei Habel, tawali-yaliilio, “Dulo ito monao̒ ode halabolu.” Tou̒ timongolio leidungga mota teto, tei Kain loluhu wau lomate yila-yilateelo mao̒ olei Habel tawali-yaliilio.

⁹ Eeya lotahuda mao̒ olei Kain, “Tou̒toonu tei Habel, tawali-yaliimu?” Tei Kain lolametao̒, “Diila otaawa lo watotia. Wolo watotia mamusi modaha mao̒ tawali-yali lo watotia?”

¹⁰ Lapatao̒ Eeya lotahuda, “Yilongola yio̒ malohutu sua̒li u moo̒tihela hapato boito? Duhu lo tawali-yaliimu malo ngiibode ola-U̒ lonto huta, debo odelo suala u wuwa-wuwaatia̒ mei̒ tontuli.

¹¹ Yio̒ malaa̒-laa̒nati tilinggula diilalo mowali motolo kelakela huta. Huta boito malo ngintopaa duhu lo tawali-yaliimu, debo odelo hiluo̒olio ngangolio u mololimo duhu lo tawali-yaliimu boito tou̒ yio̒ lomate olio yila-yilateelo mao̒.

¹² Wonu yio̒ mokela-kela mopomulo pilomulo, huta diilalo mongohi mai tilapulo wolo-wolo; yio̒ mamowali tamoonao̒wa ode utoonulalo mao̒ udiila o biluloa̒ todunia.”

¹³ Yi tametao̒ lei Kain ode Eeya, “Hukumani boito mobuheto daa̒ diila o bantaawa lo watotia.

¹⁴ Eeya tamo pohinggi olo watotia monto huta botie, molamingo monto owoluo lo Eeya. Watotia mamowali tamoonao̒wa ode utoonulalo mao̒ tadiila o biluloa̒ todunia, wau watotia mapateelio mate-mateelo mao̒ boli tatoonu wambao̒ tamoo̒ dungga olo watotia.”

¹⁵ Bo Eeya lotahuda, “Diila. Wonu yio̒ pateelio mate-mateelo mao̒, yi odelo tontuliilio, pitu lota meituwoto tamomate olemu mate-mateelo mao̒ boito mapateelio mate-mateelo mao̒ olo.” Lapatao̒ Eeya lopodutu mao̒ tuoto tolei Kain alihu boli tatoonu wambao̒ tamo dunggaya wolio diila tamomate olio mate-mateelo mao̒.

¹⁶ Lapatao̒ lonao̒olo tei Kain lonto talu lo Eeya wau lotibiluloa̒ tohuta u ilunte huta lo “Tamoohuata” to ambahu Tiimuru Eeden.

Wali mai lei Kain

¹⁷ Tei Kain wau dilelio loo̒tapu walao̒ talolai̒, tai̒lunte Heno. Lapatao̒ tei Kain lopotihulao̒ kota tuwau wau ilunteelio kota boito loduduo̒ tanggulo walai̒o boito.

¹⁸ Tei Heno tiyamo lei Irad. Tei Irad tiyamo lei Mehuyael. Tei Mehuyael tiyamo lei Metusael, wau tei Metusael yito tiyamo lei Lame.

¹⁹ Tei Lame odile duulota, ti Ada wau ti Jila.

²⁰ Ti Ada lopotutu mai olei Yabal, wau wali mai lei Yabal boitolo bangusa talo malihala bibiyahe wau lotibiluloa̒ to delomo kema.

²¹ Tawali-yaliilio ilunte Yubal, wau wali mai lei Yubal yito tamoiitohe muusiki kocapi wau tulali.

²² Ti Jila lopotutu mai olei Tubal-Kain, wau waliilio mai helohutu totoonulalo pakaakasi u hidala-dalaala lonto tombaha wau wate. Taabua tawali-yali lei Tubal-Kain ilunte Naa̒ama.

²³ Tei Lame malo loi̒ya mao̒ to dilelio duduulota, “Ada wau Jila, dungohi mai! Tabohulotau ngota pilateu̒ yila-yilateelo mao̒ kalana malo lotaa̒a olau̒.

²⁴ Wonu pitu lota pateelo mate-mateelo mao̒ u momaalasi pilomatea olei Kain yila-yilateelo mao̒, yi pitu lopulaa pitu lota mapateelo mate-mateelo mao̒ wonu momate olau̒ mate-mateelo mao̒.”

Tei Set wau tei Enos

²⁵ Tei Adamu wau dilelio luli loo̒tapu walao̒ talolai̒ ngota. Uali Hawa, “Allahu Taa̒ala malongohi mai olau̒ walao̒ talolai̒ odelo tuloi̒o lei Habel, tamaa pilatelio yila-yilateelo mao̒ lei Kain.” Sababu uito ti Hawa longunte to walao̒ boito tei Set.

²⁶ Tei Set o walao̒ talolai̒ tailohialio tanggula Enos. To jamani boitolo tau lolumulo hemo langgulo tanggulo Eeya wonu molubo.