IBRANI 5 - KITABI HABARI MOPIOHE

¹ Timii̒du iimamu daa̒ tilulaoto towolota lo umati, wau piluduo̒ u momaya Allahu Taa̒ala odelo wakili limongolio. Tuugasilio yito mopodewo ode Allahu Taa̒ala wowoo-hiyaalo wau babaa-keyaalo u pongambunguwalo dusa.

² Ti Iimamu daa̒ boito lohihilao molulupuhu todelomo dadaata sua̒li, wau sababu uito tio mowali motihutu molumboyoto lohilao totau-tauwalo tadiila hitootawa lolo-loolo wau tailapalo dalalio.

³ Wau sababu tio lohihilao molulupuhu, yi tio musi mopodewo bake, diila bo sababu duduu-sawaalo lo umati, bo olo sababu duduu-saalio lohihilao.

⁴ Diaaluo penu boli ngotaa mao̒ tamomudua̒ batangalio lohihilao mowali iimamu daa̒. Taa mowali iimamu daa̒, wonu Allahu Taa̒ala motianga olio woleeto boito – tutuuwauwa debo odelo tei Haruuna.

⁵ Odito olo ti Almasi. Tio diila lomudua̒ batanga-Lio lohihilao lowali Iimamu Daa̒. Allahu Taa̒ala lohihilaolo talo mudua̒ o-Lio. Allahu Taa̒ala lotahuda mao̒ o-Lio, “Yio̒olo Wala-U̒; todulahe botie Wau̒ mowali ti Paapa-Mu.”

⁶ Totambati uwewo Allahu Taa̒ala lotahuda olo, “Yio̒ yito Iimamu ohiheo-hiheolo mao̒, debo odelo ti Iimamu Melkisedek.”

⁷ Tomaasa li Isa tumutumulo todunia botie, Tio helodua̒ wau lomolohone wolo watiwaatio̒ wau hiyongo ode Allahu Taa̒ala, tamambo lopoa̒ahu o-Lio lonto opopate. Wau sababu Tio taa̒luku to Allahu Taa̒ala wolo hulumati u lealeaatulo mao̒; yi Tio dilungohe-Lio.

⁸ Ti Isa yito Walao̒ Allahu Taa̒ala, bo eleponu odito Tio helo balajali lowali lodungohe lotimbulude to dudutoo-Lio.

⁹ Yi lapatio mao̒ Tio pilopowali tamoo-poa̒ahua tawimu-wimumuto tutu, Tio lowali pilobutua mai lo oa̒ahu u hiheo-hiheolo mao̒ ode ngoa̒amila tau tamo dungohe o-Lio,

¹⁰ wau Allahu Taa̒ala olo lopoi̒laalo o-Lio odelo Iimamu Daa̒, debo odelo ti Iimamu Melkisedek!

Poe̒ela

¹¹ Tomimbihu huhuloa̒ li Isa odelo Iimamu Daa̒, maito dadaata upalalu poo̒taa mai lamiaatia olimongoli, bo mototolo u motombangai sababu timongoli moboyu daa̒ mongalati.

¹² Otutuulio mao̒ mawakutuulio timongoli mowali guru, bo malo ilaalo timongoli debo donggo palalu mobalajali monto taa wewo pasali dadaa-saliyalo bohulo pongaajali lo Allahu Taa̒ala. Timongoli diipo mowali mololimo ua̒alo u motoheeto; timongoli donggo musi mongilu susu wambao̒.

¹³ Taa udonggo hipongiluma susu, boliilio tio donggo unge; tio diipo loo̒laasa pasali wolo u otutu wau wolo u talatala.

¹⁴ Ua̒alo u motoheeto yito ode taa leidaa̒ u sababu pongalamani, maloo̒ pohihiideo̒ toonu u mopiohe wau toonu u moleeto.