IBRANI 10 - KITABI HABARI MOPIOHE

¹ Butoo̒ agama lo Yahudi bo mopo bayahei udiila mopatato pasali lo susuu-aliyaalo umopiohe u mamei dungga mai, wau diila bayahu u otutuulio mao̒ lo susuu-aliyaalo boito. Diila pongalo aakali butoo̒ boito mowali mopo wimumuto tutu taa u monao̒ mai molubo Allahu Taa̒ala lou̒ modelo podewo, eleponu timii̒du taunu tulusi hepilodewo babaa-keyaalo u tutuuwauwa.

² Humayaalio tau-tauwalo tahi polubowa Allahu Taa̒ala boito tio̒otutua mapiloo̒ belesi lonto dusa, yi timongolio diilalo opongolaasa odusa, wau bake diilalo podewolo olo.

³ Bo ilaalolio babaa-keyaalo u pilodewo timii̒du taunu boito tumbao̒ mopoe̒ela tau to duduu-sawaalo limongolio.

⁴ Sababu memangi duhu losapi wau duhu lobatade ulai̒ diila mowali moluluta dusa.

⁵ Uitolo sababuulio tou̒ ti Almasi tilumuwotai ode delomo dunia, Tio lobisala ode Allahu Taa̒ala, “Eeya diila mokahandaki bake wau dewo; bolii̒o mao̒ Eeya malo podapato batanga de ola-U̒.

⁶ Allahu Taa̒ala diila motuhatawa wolo bake yilalango meaalo bake u pongambungualo dusa.

⁷ Lapatao̒ Watia loloi̒ya, ‘Boti-botieelo Watia, oo Allahu Taa̒ala! Watia monao̒ mai mohutu kahandaki lo Allahu Taa̒ala, debo odelo u leitulade pasali batanga Laatia todelomo Kitabi.’ ”

⁸ Bohu-bohulio ti Almasi loloi̒ya, “Allahu Taa̒ala diila mokahandaki bake wau dewo; Allahu Taa̒ala diila motuhatawa wolo bake lo binatangi upilobu odelo dewo wau to bake u pongambungualo dusa.” Ti Almasi loloi̒ya odito, eleponu babaa-keyaalo boito pilodewo lodudua̒ butoo̒ agama lo Yahudi.

⁹ Lapatao̒ uito ti Almasi loloi̒ya. “Boti-botieelo Watia, oo Allahu Taa̒ala! Watia monao̒ mai u mohutu kahandaki lo Allahu Taa̒ala.” Oditolio Allahu Taa̒ala lolulutao̒ babaa-keyaalo udeedelo boito, wau lopotuloo̒ mao̒ wolo bake li Almasi.

¹⁰ Ti Isa Almasi malohutu wolo u kilahandaki lo Allahu Taa̒ala wau lopodewo batanga-Lio odelo bake. Wolo dewo boito, u pilohutu-Lio bo pee̒enta wamabai̒o u ohiheo-hiheolo mao̒, ito ngoa̒amila pilobelesi lonto dusa.

¹¹ Timii̒du iimamu lo Yahudi moponao̒ tuugasilio odelo iimamu timii̒du dulahu, wau wuwuulia tio hemo podewo babaa-keyaalo u tutuuwauwa. Bo babaa-keyaalo boito sama-samaata diila mowali moluluta dusa.

¹² Bolii̒o mao̒, ti Almasi lopodewo bo tuwau bake u pongambungualo dusa, wau bake boito pohupohutu u ohiheo-hiheolo mao̒. Lapatao̒ lopodewo bake boito, ti Almasi lotihuloa̒ to ambahu olowala lo Allahu Taa̒ala wau momalenta pee̒-pee̒enta wo-Lio.

¹³ Wau masaatia ti Almasi hemohima dilumutu Allahu Taa̒ala mohutu mumuusu-Lio taa̒luku to o-Lio.

¹⁴ Oditolio wolo bake tuwau, ti Almasi lopoo̒ wimumuto tutu tau-tauwalo tamaa pilobelesi lonto dusa.

¹⁵ Tomimbihu sua̒li boito Rohullah longohi olo osakusii-Lio to olanto. Rohullah lotahuda,

¹⁶ “ ‘Utieelo daantia umaa pohutuwo-U̒ woli mongolio to duduu-laheyaalo u mamei dungga,’ tahuda lo Eeya, ‘Wau̒ mamo podutu bubuu-too̒o-U̒ todelomo hilaa limongolio, wau moluladeo̒ todelomo pikiilangi limongolio.’ ”

¹⁷ Allahu Taa̒ala olo lotahuda, “Wau̒ mamo malongao̒ duduu-sawaalo wau totoonulalo ololeeti mongolio.”

¹⁸ Oditolio, duduu-sawaalo wau totoonulalo ololeeto boito maa ilambungu, yi diilalo palalu mopodewo bake u pongambungualo dusa.

Duloolo ito mohimbide Allahu Taa̒ala

¹⁹ Naa, Mongo wutato, wolo opopate li Isa boito ito botia buheli tumuwoto ode Huwali Leidaa̒ Laba-labaalo mantali.

²⁰ Ti Isa malomuo̒ dalalo tuwau u bohu de olanto, deu̒ito-yito dalalo u mongohi tutumulo. Dalalo boito moli lalante, deu̒ito-yito batanga li Isa lohihilao.

²¹ Wau ito masaatia o ngotaalio iimamu tau̒daa̒, tatihu-tihula duo̒lo Bele lo Allahu Taa̒ala.

²² Sababu uito, duloolo ito mohimbide Allahu Taa̒ala wolo hilaa motulidu wau iimani motoheeto; wolo hilaa umaa pilomantali monto pongolaaasa utilala, wau wolo batanga u mapiloo̒ belesi wolo taluhe u mantali.

²³ Mamusi ito motidihu tio̒otutua to halapani upilo ngakuwanto, sababu Allahu Taa̒ala mowali palacayalo wau Tio mamoe̒elai danti-Lio.

²⁴ Wau mamusi ito mopoo̒ tutuuwoto, alihu ito mowali mohuhuuntula u motolia̒ngo ngota timongota wau mohutu susuu-aliyaalo u mopiohe.

²⁵ Mamusi ito debo moa̒mbua pee̒-pee̒enta, wau diila mao̒ pomalongo debo odelo taawewo. Ito tumbao̒ musi lebe tatapu wau molotolo hilao wau mopoo̒ lolootolo, sababu otaawanto deu̒ diilalo mohiheo Eeya mamei dungga mai.

²⁶ Sababu wonu habari u otutu monto Allahu Taa̒ala mapilo tunggulio mai olanto, bo ito debo hemohutu dusa wambai̒o wolo makusudu, yi diduu̒ bake u moluluta dusaanto.

²⁷ Tuwa-tuwaulo uwoluo to olanto yito motaalua wolo bubutoo̒ Allahu Taa̒ala wau tulu omulukaa-Lio umaa momobu tunggula maahu totau-tauwalo tahi polowalia o-Lio!

²⁸ Taa diila modungohe butoo̒ uilohi mai lei Musa, hukuu-maniyolo mate lou̒ diila o ambungulio, wonu to osakusi lo taduulota meaalo toulota, tio ilobukuti ototala.

²⁹ Malo lebe mobuuhetao̒ hukuumani u musi podehuwolo totaa u hemo dutadutaa̒ Walao̒ Allahu Taa̒ala. Tau boito hemo nganggapu hina duhu daantia lo Allahu Taa̒ala, deu̒ito-yito opopate li Almasi tamo poo̒belesi monto dusa. Tio mohina Rohu tamoongohia odehu hilao̒.

³⁰ Otaawanto tatoonu Tio talo tahuda, “Wau̒ mamo lontuli! Wau̒ mamo hukuumani!” wau talo tahuda, “Eeya mamo mutoa̒i umati-Lio.”

³¹ Malo moo̒tihela hapato wonu modehu to uluu̒ lo Allahu Taa̒ala Taa Tumutumulo!

³² Eelai mao̒ woloolo mola owowoluwoa lo Mongo wutato tou̒ yilalu mao̒. Tou̒ boito, lapatao̒ tinelo Allahu Taa̒ala lolinelai olimongoli, timongoli helo dutolo dadaata; bo penu odito timongoli debo lohipate tio̒otutua.

³³ Tingga maito timongoli hilinalio wau hepilo hutulio lou̒ diila mopiohe totalu lotaa dadaata. Tinggga maito olo timongoli lodudua̒ lodutolo woli mongolio tahe pilohutulio odito,

³⁴ wau timongoli lodudua̒ loo̒laasa osuukali hilao lotaa tilutupalio. Wau tou̒ ngoa̒amila u mililiki limongoli yilambatio, timongoli lololimo uito wolo hilaa sanangi sababu otaawa limongoli deu̒ donggo woluo hitua-tuawua ulebe mopiohe, umoo̒ tahangi ohiheo-hiheolo mao̒.

³⁵ Masababu uito, diila mao̒ potombolu, sababu wonu timongoli debo palacaya, yi woluo wuupa udaa̒ woleeto!

³⁶ Timongoli palalu mosabali, alihu timongoli mowali mohutu kahandaki lo Allahu Taa̒ala wau lou̒ odito mololimo wolo upilo dantia-Lio mai.

³⁷ Sababu todelomo Kitabi tulatulade, “Bo ngopee̒ mola poli wambai̒o, yi Tio tamaa meidungga boito, mahua̒a meidungga; Tio diila tamo polohu-lohudu podunggaa-Lio mai.

³⁸ Wau umati-U̒ tao̒tutu mapalacaya wau tumumulo; bo wonu woluo towolota limongolio tatumouli, yi Wau̒ diila tasanangi olio”

³⁹ Ito botie diila umati tatoutouli wau yilapalo. Bolii̒o mao̒, ito yito umati tapalacaya to Allahu Taa̒ala wau tapilo aahu.