IBRANI 1 - KITABI HABARI MOPIOHE

Allahu Taa̒ala helo tahuda lotimbulude to Wala-I̒o

¹ Tojamani muloololio mai poo̒-poo̒daata Allahu Taa̒ala helo tahuda mai odeli nene mayanto lotimbulude tomongo nabi wolo lomake dudelo u hidala-dalaala.

² Bo tojamani pulitio botie Tio lotahuda mai olanto wolo lotimbulude to Wala-I̒o. Lotimbulude to Wala-I̒o botieelo Allahu Taa̒ala lopowali mai ngoilanggubu aalamu. Wau Allahu Taa̒ala malolantu mao̒ deu̒ Wala-I̒o botieelo olo tao̒haku motolo miliki totoonulalo u hitua-tuawua.

³ Tiolo tamopo tinelai odudaa̒ lo Allahu Taa̒ala ulaba-labaalo mobaango; Tiolo gambali u moilaalo monto batanga lo Allahu Taa̒ala lohihilao. Tiolo olo tamolaalai otuwau lo ngoilanggubu aalamu botie wolo kawasa lotahuda-Lio ulaba-labaalo okawasa. Lapatao̒ Tio mopoluasi manusia taa u lopatolo monto duduu-sawaalo limongolio, Tio mamo tihuloa̒ tobele biluloa̒ lo pamalenta to sologa pee̒-pee̒enta wolo Allahu Taa̒ala, Tamongawasa ulaba-labaalo malaio̒.

Odudaa̒ lo Walao̒ Allahu Taa̒ala

⁴ Walao̒ boito loo̒tapu huhuloa̒ ulebe lolaia̒ daa̒ wolo malai̒kati, wau tanggulo uilohi lo Allahu Taa̒ala o-Lio olo lebe hulu-hulumati daa̒ wolo tanggulo uilohi ode malai̒kati.

⁵ Diila pee̒enta mao̒ Allahu Taa̒ala helo tahuda odie penu boli ode ngotaalio lo malai̒kati, “Yio̒olo Wala-U̒; todulahe botie Wau̒ mowali ti Paapamu.” Diila pee̒enta mao̒ Allahu Taa̒ala helo tahuda odie penu boli tomimbihu malai̒kati toonu olo, “Wau̒ mamowali ti Paapa-Lio, wau Tio mamowali Wala-U̒.”

⁶ Bo tosaaa̒ti Allahu Taa̒ala lolao mai Wala-I̒o tamohuhula daa̒ ode dunia botie, Allahu Taa̒ala lotahuda odie, “Ngoa̒amila malai̒kati wajibu molubo Walao̒ boito.”

⁷ Tomimbihu mamaa-lai̒katiyalo, Allahu Taa̒ala lotahuda odie, “Allahu Taa̒ala mohutu mamaa-lai̒kati-Lio mowali dupoto, wau tahi pomayawa o-Lio mowali lei̒to tulu.”

⁸ Bo to Walao̒ boito, Allahu Taa̒ala lotahuda mao̒, “Bele biluloa̒a-Mu, oo Allahu Taa̒ala, mabakaa ohiheo-hiheolo mao̒! Pamalenta-Mu yito pamalenta u aadili.

⁹ Yio̒ mamotohilaa u aadili, wau mamolonuo̒ udiila juujulu; uitolo sababuulio Allahu Taa̒ala, Allahu Taa̒ala-Mu, molulaota ole-Mu wau mongohi ole-Mu ohulumati u moo̒toduo weengahe, mongilabota lomongo sahabati-Mu.”

¹⁰ Allahu Taa̒ala lotahuda olo, “Yio̒, Eeya, tou̒ bohulio lopowali mai dunia, wau Yio̒ lohihilao talo powali hulungo.

¹¹ Ngoa̒amilalo boito mamooli, wau mowali panggola debo odelo boo̒; bo Yio̒ diila tamobolio̒.

¹² Ngoilanggubu aalamu botie mapiu̒wo-Mu debo odelo boo̒, wau matuloa̒-Mu wolo uwewo. Bo Yio̒ diila pee̒enta mao̒ tamobolio̒, wau tutumulu-Mu diila tao̒pulitio.”

¹³ Allahu Taa̒ala diila pee̒enta mao̒ lotahuda odie penu boli ode ngotaalio lo malai̒kati, “Huloo̒olo towimbihu olowala-U̒, dilumutu mumuusu-Mu potaa̒lukuwo-Mu de ole-Mu.”

¹⁴ Wonu odito, otutuulio mao̒ mamaa-lai̒katiyalo boito tatoonu? Timongolio yito roroo-huwaalo tahi pomayawa to Allahu Taa̒ala, wau tai̒lahula lo Allahu Taa̒ala u momantu tau-tauwalo tamaa mololimo oa̒ahu.