HOSEA 9 - KITABI HABARI MOPIOHE

Hukumani ode Isirai̒lu pilomalalumu

¹ Wuu bangusa lo Isirai̒lu, diilalo mao̒ porameya duduu-laheyaalo bukaamu debo odelo babaa-ngusawalo wewo. Timongoli malo lolaa Allahu Taa̒alamu wau diila tatapu wau molotolo hilao to Olio. To timii̒du polumbetaa̒lo pale, timongoli helo potali batanga debo odelo tasuuntali ode Dewa Baa̒l, wau sanangi mololimo pale u hea̒nggapuo limongoli debo odelo wuupa lodewa boito ode olemu!

² Bo diilalo mohiheo timongoli mao̒kulangia lopale boli winulo jaitun, wau angguru olo mamo pulito.

³ Timongoli, wuu bangusa lo Isirai̒lu, diila taatatapu motibiluloa̒ tohuta uilohi lo Eeya ode olemu. Timongoli musi mohualinga ode Masiri, wau musi molamela ua̒alo halamu to Asyur.

⁴ To lilii-puwaalo boito timongoli diila tamoo̒ podewo angguru wau bake binatangi u moposanangi hilaa lo Eeya. Ua̒alomu mamoo̒hutu totaa u molamelao̒ mowali najisi, debo odelo ua̒alo u pilolamela to upacala polobungalo. Ua̒alo boito bo ohuna u mopobutuhu ombongumu; penu boli ngoi̒di mao̒ diila tadeloolo ode Bele lo Eeya u podewolo mola teto.

⁵ To duduu-laheyaalo buka lo agama u mohulumati to Eeya, timongoli diila tamowali mohutu wolo-wolo u mopolame mao̒.

⁶ Wonu bolo baala meidungga, wau timongoli deloolio ode lipu wewo, yi tamei tolaa mao̒ towolota limongoli maa̒ambuwo lotau-tauwalo Masiri u pateelio mate-mateelo mao̒ wau lobungolio to Mempis! Huo̒yota wau duhi mamobutu mai molau̒ube tataa-mbatiyaalo bakasi lobelemu wau babaa-langiyalo talaa̒amu u ohalaga.

⁷ Malei dungga wakutu pohukuu-maniyalo, wakutu u mololimo polomalasi tou̒ totoonulalo huhutu. Isirai̒lu mamolaasa mao̒! Timongoli moloi̒ya, “Nabi takiluwasa lo rohu botie abaloolo! Biyongo tio!” Timongoli loloi̒ya odito sababu timongoli molonuo̒ daa̒ to Olau̒ wau dusaamu udaa̒ tutu.

⁸ Allahu Taa̒ala lolao mai olaatia odelo nabi u mopoe̒elao̒ olimongoli umati-Lio, bo penu boli ode utoonu u ponao̒wa lowatia, timongoli hemo tolopani motaala olaatia debo odelo bulungi. To lipu miliki lo Allahu Taa̒ala lohihilao, ami mongonabi miluusu lo ulipu.

⁹ Mailaba leetio huhutuumu debo odelo u pee̒enta pilohutu lotau to Gibea. Allahu Taa̒ala mamoe̒ela totalamu, wau mohukuumani mai olimongoli sababu dusaamu.

Dusa lo Isirai̒lu wau akiibatilio

¹⁰ Eeya lotahuda mai, “Tou̒ Wau̒ bohu-bohulio loo̒dungga umati lo Isirai̒lu, Wau̒ meengahu debo odelo taa loo̒dungga hungo lo angguru tohuta luasi udelita. Tou̒ Wau̒ bohu-bohulio loo̒onto loluuhurumu, Wau̒ sanangi debo odelo taa loo̒onto tilapulo bohulo hungo lo ara. Bo tou̒ timongolio lonao̒ mola ode Hui̒dee Peor, timongolio malo lumula lolubo Baa̒l, tilinggula timongolio lowali najisi debo odelo dewa u otolia̒ngo daa̒ limongolio boito.

¹¹ Odudaa̒ lo Isirai̒lu matumombota mooli debo odelo bulungi; madiaaluo tao̒mbodaa̒, wau madiaaluo tau̒kekeei̒ tapotutu mai.

¹² Bo eleponu woluo tau̒kekeei tapilotutu mai wau pilopo udaa̒ mola, yi timongolio mahamaa-U̒; diaaluo penu ngotaa mao̒ tapoluli-U̒ tumutumulo. Matilopotala timongoli, wuu bangusa lo Isirai̒lu, wonu bolo Wau̒ mololaa olimongoli!”

¹³ Yaa Eeya, watotia loo̒onto tau̒kekeei̒ limongolio heila-yilapitalio wau pilatelio yila-yilateelo mao̒.

¹⁴ Wolo u musi pohile lowatotia ode Eeya duo̒lo tau-tauwalo boito? Ambunguolo pohutuwalo mai mongobua limongolio mowali bintela. Pohutuwalo mai timongolio diila tamoo̒ potutu tau̒nge limongolio!

Eeya lohukuumani bangusa lo Isirai̒lu

¹⁵ Eeya lotahuda mai, “Ngoa̒amila ololeeti mongolio tilumula to Gilgal. Teteetolo Wau̒ malo lonuo̒ olimongolio. Sababu huhutu limongolio u moleeto, Wau̒ mamopolahi olimongolio monto lipu-U̒ botie. Wau̒ diilalo momonu olimongolio; ngoa̒amila tau̒wa limongolio malo luwali ola-U̒.

¹⁶ Taulo Isirai̒lu mahukuu-maniyo-U̒. Timongolio mamowali debo odelo pilomulo udiila momungo, wau u wawaaa̒tio malohengu. Timongolio diila tamoo̒ toduo mai walao̒; bo eleponu timongolio o walaaa̒i, mapatee-U̒ mate-mateelo mao̒ tau̒kekeei̒ tao̒tolia̒ngi mongolio boito.”

Ti Nabi helo bisala timimbihu lo Isirai̒lu

¹⁷ Allahu Taa̒ala tahe bayaawa lowatia boito mamo potouli umati-Lio, sababu timongolio diila mohuto modungohe o-Lio. Timongolio mamonao̒ ode utoonulalo mao̒ towolota lo babaa-ngusawalo.