HOSEA 6 - KITABI HABARI MOPIOHE

Taulo Isirai̒lu diila tio̒otutua lolilihu

¹ Tau-tauwalo Isirai̒lu loloi̒ya, “Dulo ito muli mohualinga ode Eeya. Eeyaalo talopo ngongoto olanto, bo Tio tamamo poo̒luli. Tio talomali olanto, bo Tio olo tamamo moloobani papaa-liinto.

² To delomo dulo meaalo tolohui mola botie Tio mamo poo̒luli mai olanto, wau ito matumumulo todelomo poloduo̒lo-Lio.

³ Sababu uito duloolo ito motolopani u tio̒otutua motota to Eeya. Tio tantu mamei dungga mai ode olanto debo odelo u mapobutua mai mato lodulahu, wau debo odelo didi u mopobata mai huta to pulito sembo lo polodidi.”

⁴ Bo Eeya lotahuda mai, “Wuu Isirai̒lu wau Yehuda! Wau̒ musi mohutu mai wolo wolemu? Tolia̒ngumu daa̒ ola-U̒ hua̒a yilooli debo odelo heengo monto batawa ulaya-layango meaalo wambulo tou̒ dumodupo.

⁵ Uito sababuulio Wau̒ malolao mai mongo nabi-U̒ u mopo tunggula olemu putuusani-U̒ deu̒ timongoli musi hukuu-maniyolo wau pobinasaalo. U otohilaa-U̒ monto olimongoli malo ilaalo wau lopotato:

⁶ Wau̒ lebe motohilaa deu̒ timongoli motota ola-U̒ wau laito motolia̒nga ola-U̒, lou̒ timongoli momobu wau mopodewo bake ode Olau̒.

⁷ Bo debo odelo tei Adamu, timongoli diila moe̒ela dantimu wola-U̒.

⁸ Gilead yito kota upolupolu wolo tahileeta wau tamoomatea mate-mateelo mao̒.

⁹ Mongo iimamu tokota boito debo odelo ngopolemboa̒ lo tamoo-lambatawa tahemo langgu taa u lumaodeo̒. To dalalo udulu-dulunga ode tambati mantali to Sikhem olo timongolio hemomate mate-mateelo mao̒! Ngoa̒amila u moleeta boito hepilohutu limongolio wolo milakusudu.

¹⁰ To Isirai̒lu iloontonga-U̒ hitua-tuawua u moo̒tihela hapato: umati-U̒ loponajisi batangalio wolo helolubo balaahala.

¹¹ Tomimbihu olimongoli, wuu taulo Yehuda, Wau̒ malolantu wakutuulio u mohukuumani mai olimongoli olo sababu huhutuumu.”