HOSEA 5 - KITABI HABARI MOPIOHE

¹ Eeya lotahuda mai, “Dungohiilo, wuu mongo iimamu! Poo̒toutilo, wuu taulo Isirai̒lu! Dungohiilo, wuu tau-tauwalo wali li olongia! Hukuumani mapilo dehulio mai toitaati mongoli. Sababu wajibulio timongoli momutoo̒ wolo aadili, bo bolii̒o mao̒ timongoli malowali debo odelo taalo to Mijpa, debo odelo taalo to Hui̒dee Tabor,

² wau debo odelo huango u modelomo to Sitim. Sababu uito Wau̒ mamo hukuumani mai olimongoli ngoa̒amila!

³ Otaawa-U̒ totoonulalo u hitua-tuawua pasali lo batangamu, wuu Isirai̒lu! Diila pongalo aakali yio̒ moluuo̒ u hitua-tuwaua monto ola-U̒. Sababu uito, ngoa̒amila taumu diilalo paatuti molubo ola-U̒.”

Poe̒ela tomimbihu polotubowa to balaahala

⁴ Ololeeto upilohutu lotau Isirai̒lu maloo̒ sababu olimongolio diila mowali muli mohualinga ode Allahu Taa̒ala limongolio. Timongolio makiluwasa lo polotubowa to balaahala, tilinggula timongolio diilalo lomandungi to Eeya.

⁵ Osombongi bangusa lo Isirai̒lu oontonga lou̒ mopatato, wau lowali bukuti totala limongolio. Dusa limongolio maloo̒ sababu olimongolio leiteduo̒ wau lodehu pee̒-pee̒nta, wau bangusa lo Yehuda lodudua̒ lodehu woli mongolio.

⁶ Timongolio lonao̒ helo lolohe to Eeya wolo hidelowa himba wau sapi duo̒lo bake, bo ngoa̒amilalo boito diila ilohuna. Sababu Eeya malo lolaa olimongolio, wau timongolio diila loo̒ dungga o-Lio.

⁷ Timongolio diila tatapu wau molotolo hilao to Eeya; mongo walai̒ mongolio diila mongo walaa-I̒o. Sababu uito, diilalo mohiheo timongolio mapobinasaalo pee̒-pee̒enta wolo hahaa-laaboluwalo limongolio.

Popaatea towolota lo Yehuda wau Isirai̒lu

⁸ Pohiipolo mola torompeti to Gibea! Potingohelo mola tuoto titianga u motuuhua to Rama! Potingalaa̒lo mola lo popaatea to Betel! Ntali, taulo Benyamin, pomajulo mota motuuhua!

⁹ Isirai̒lu mabinasa, sababu malei dungga dulahio u mohukuumani mai olio. Dungohilo, wuu ulipu lo Isirai̒lu, sua̒li boito tantulo mao̒ mamotoduo.

¹⁰ Eeya lotahuda mai, “Wau̒ muluka sababu mongo tau̒wa lo Yehuda maloluhu Isirai̒lu wau lolambata hutalio. Sababu uito Wau̒ mamopo dungga mai hukuumani ode yitaati mongolio debo odelo taluhee daa̒.

¹¹ Isirai̒lu madeehelio; tio mao̒olia lohaku tohutalio, sababu tio baaa̒ngiola u hemei̒ tulungi to tao̒tutuulio mao̒ diila moo̒ tulungi olio.

¹² Uito sababuulio Wau̒ mamopo antulu bangusa lo Isirai̒lu, wau mopobinasa taulo Yehuda.

¹³ Bangusa lo Isirai̒lu wau bangusa lo Yehuda mongalati owoluwoalio u mobulilo, yi Isirai̒lu lonao̒ ode Asyur u mei̒bantu monto li olongia daa̒. Bo ti olongia diila loo̒ tuulungi meaalo lopoo̒ pioheo̒ owowoluwoa limongolio.

¹⁴ Debo odelo singa moluhu, odi-odieelo mola Wau̒ mamoluhu taulo Isirai̒lu wau Yehuda. Wau̒ lohihilao tamamo nganta-ngantanga olimongolio, lapatao̒ tolaa-U̒ mao̒. Wau̒ modedea̒ olimongolio monao̒, diaaluo penu boli ngotaa mao̒ tamoo̒ lopata olimongolio.

¹⁵ Umati-U̒ matolaa-U̒ tunggula timongolio malo laba-labaalo modutolo sababu duduu-sawaalo limongolio, lapatao̒ uito monao̒ mai mololohe ola-U̒. Otanu todelomo polo dutololio, timongolio mamo tolopani modunggaya wola-U̒.”