HOSEA 4 - KITABI HABARI MOPIOHE

Eeya lopotulude to Isirai̒lu

¹ Eeya o palakala wolo ulipu lolipu botie. Wuu Isirai̒lu, dungohe mao̒ wolo upilo tahudaa-Lio mai, “To lipu botie diaaluo otatapu wau molotolo hilao meaambo tolia̒ngo, wau ulipulio diila momasisi ola-U̒ odelo Allahu Taa̒ala.

² Timongolio hemotadia bo timongolio diila moe̒elao̒; timongolio hemohimbulo, hemomate mate-mateelo mao̒, hemotao̒, wau hemojina. Ololeeto heo̒duhenga mola, wau polomatea mate-mateelo mao̒ helo toduo tutuuntunga.

³ Sababu uito lipu botie mamowali mohengu, wau totoonulalo u hitumula teto maamate. Totoonulalo binatangi u hidala-dalaala u todulente, totudulio wau todeheto mabinasa.”

Eeya helo pototulude tomongo iimamu

⁴ Eeya lotahuda mai, “Wuu mongo iimamu, diila mao̒ woluo taa mopotala meaala moingo to umati-U̒, sababu timongolilo tapotaala-U̒.

⁵ Hui wau dulahu timongoli hipohutua totala, odito olo mongo nabi. Sababu uito Wau̒ mamopo binasa mai Isirai̒lu tiilamu.

⁶ Timongoli, mongo iimamu, diila helo mandungi ola-U̒ tilinggula timongolio tilopotala. Timongoli helo potouli popoo-ngaajali-U̒. Oditolio, Wau̒ olo mamo potouli olimongoli, wau mongo walau̒mu diila taa̒kuwo-U̒ odelo mongo iimamu-U̒.

⁷ Timongoli helebe dadaata mola, timongoli helebe mola olo odusa to Olau̒, wuu mongo iimamu! Sababu uito owowoluwoamu malomelo-U̒: Timongoli diilalo hulumatiolo, bo mahinaalio.

⁸ Timongoli lowali kaya sababu dusa lo umati-U̒, sababu uito timongoli ohilaa alihu timongolio odusa tulusi.

⁹ Yi timongoli mamodutolo tutuuwauwa debo odelo ulipu! Wau̒ mamo hukuumani mai olimongoli motuuu̒de wolo totoonulalo huhutuumu.

¹⁰ Timongoli mamolamelo babaa-keyaalo upilodewo, bo timongoli madebo pola-polaango. Timongoli mamolubo dedee-waalo u molomiyodu, bo ulipumu debo diila oduhenga mola, sababu timongoli malo lolaa ola-U̒ u lolubo ila-ila wewo.”

Eeya helo hukuumani polotubowa to balaahala

¹¹ Eeya lotahuda mai, “Wuu umati-U̒, mopio angguru u deedelo meaalo angguru u bohu malo podiaaa̒ omambowamu u momikiilangi mola wolo seehati.

¹² Timongoli hipohilea potuhata monto ayu ngoputu! Tunggudu ngoputu hemo poo̒taa mai olemu wolo u otohilaa otaawa mao̒ limongoli! Timongoli debo odelo ngotaalio lodile taabua talowali suntali; timongoli lololaa ola-U̒ wau lohudu batanga ode ila-ila wewo.

¹³ To tataa-mbatiyalo polubowalo balaahala to bobooli-tutuo̒walo huludu wau hui̒du, timongoli helo podewo bake, wau helomobu totabu towalungo bubuu-ngowaalo ayu lei̒daa̒ u mohimbungo mola teto sababu tambati boito moliilo. Bo wolo akibatilio? Mongo dulahumu lowali suntali wau walao̒ mongo moluhengumu taabua helojina!

¹⁴ Bo Wau̒ diila tamo hukuumani huhutu limongolio boito, sababu timongolio lohihilao olo helonao̒ mota ode tahi suntalia tahipo kalajawa to kukuu-wiliyalo, wau pee̒-pee̒enta woli mongolio helo podewo bake ode dewa. Otutu banali tahuda botie: ‘Bangusa tadiila ohuhama pasali lo Allahu Taa̒ala mamoa̒antulu.’

¹⁵ Wuu timongoli taulo Isirai̒lu, timongoli diila tatapu wau molotolo hilao to ola-U̒! Bo halapuwo-U̒ Yehuda diila mohutu totala u tutuuwauwa! Diila mao̒ poi̒baadati to Gilgal meaalo to Betel. Diila mao̒ potadia mola teto domi tanggulo Eeya tatumu-tumulo.

¹⁶ Timongoli, wuu taulo Isirai̒lu, baaa̒ngiola daa̒! Woloolo mola Wau̒ mowali mohimbala olimongoli debo odelo himba tohuta luasi u pilobutua lo huo̒yoto?”

¹⁷ Umati lo Isirai̒lu mai̒lo aanga lo balaahala. Sababu uito polulia mao̒ timongolio.

¹⁸ Lapatao̒ hiluwoa̒ helongilu angguru dadaata, timongoli helo tisuntali wolo sanangi lohilao. Timongolio lebe motohilaa hinaalo lou̒ hulumatiolo.

¹⁹ Sababu uito timongolio mamooli debo odelo hiliipa lodupoto. Timongolio mamoo̒ toduo wolito sababu babaa-keyaalo u pilodewo limongolio ode dedeewaalo.