HOSEA 2 - KITABI HABARI MOPIOHE

¹ Sababu uito tiangaalo timongotamu wolo tanggula “Umati lo Allahu Taa̒ala” wau “Tapilonua lo Eeya.”

Ti Gomer tadiila tatapu wau molotolo hilao mopobayahu umati lo Isirai̒lu

² Eeya lotahuda mai, “Wuu mongo walau̒u-U̒, tiilamu diilalo dilee-U̒, wau Wau̒ diila dileelio. Sababu uito, palaa-kalaailo mao̒ alihu tio diila mao̒ mojina wau diilalo motisuntali poli.

³ Wonu tio debo motisuntali, Wau̒ mamopo lopato pakeyangilio alihu tio mohilaala debo odelo todulahee tou̒ tio pilotutu mai. Mapowaliyo-U̒ tio debo odelo huta mohengu wau diila molomiodu, yi tio mate mototoa̒ngo.

⁴ Timongoli, mongo walai̒o, diila taponuwo-U̒; timongoli pilotutu mai monto polosuntali.

⁵ Tiilamu suntali tadiila motota moolito. Tio moloi̒ya, ‘Wau̒ mamonao̒ mota ode mongo tilantahuu̒ tahi pongohia mai olau̒ ua̒alo wau minumani, kaingi lambuto binatangi u moa̒aluti wau kaingi lineni, winulo jaitun wau angguru.’

⁶ Sababu uito, Wau̒ mamo ngulungo olio wolo diu̒to duhi, wau moheu̒to dalalio wolo bala meeseli.

⁷ Tio mamo hilapita mongo tilantahio, bo diila tamei dungga ode limongolio. Tio mamo lolohe olimongolio, bo diila tamoo̒ dungga olimongolio. Lapatao̒ tio mamoloi̒ya, ‘Wau̒ mamuli mohualinga ode dileeu̒ tabohulio; muloololio mai owowoluwoau̒ lebe mopioheo̒ lou̒ botia.’

⁸ Tiilamu diila pee̒enta mao̒ momasisi deu̒ Wau̒lo tahe longohi mai olio pale, angguru, winulo jaitun, wau ngoa̒amila hulawa talaa̒ u hepomakelio molubo Baal boito.

⁹ Sababu uito, tosembo pongotolalo Wau̒ mamuli mopotouli wowohi-U̒, deu̒yito-yito pale wau angguru wau kaingi lambuto binatangi u moa̒aluti boli kaingi lineni uilohi-U̒ olio duo̒lo pakeyangilio.

¹⁰ Mapolaalaa-U̒ tio totalu lo ngoa̒amila mongo tilantahio. Diaaluo penu boli ngotaa mao̒ monto olimongolio mowali molopata olio monto okokawasaa-U̒.

¹¹ Totoonulalo potihunggu mapo huheliyo-U̒, mopio potihunggu timii̒du taunu meaambo potihunggu timii̒du hulalo wau duduu-laheyaalo Saabati; limbui̒o mao̒, ngoa̒amila rameyangi lo agamaalio.

¹² Wau̒ mamopo binasa bubuu-ngowaalo angguru wau bubuu-ngowaalo ara u modudua̒ao̒ olio yito wuupa lo polomayalio ode mongo tilantahio. Malomelo-U̒ ii̒i-lengiyaalo angguru wau ii̒i-lengiyaalo aralio mowali oa̒ayua; bibii-naatangiyalo mongantau mamoporuusa mao̒.

¹³ Wau̒ mamo hukuumani olio sababu duduu-laheyaalo u pilomakelio bo u momobu totabu ode Baal, wau lodadai wolo pakelio u lohilapita mongo tilantahio, lapatao̒ lolipata ola-U̒ sama-samaata. Wau̒, Eeya, malo tahuda mai.”

Eeya lomonu umati-Lio

¹⁴ Eeya lotahuda mai, “Sababu uito Wau̒ mamodelo olio ode huta datahu wau luasi u delita; mola teto tio mapiyoo-U̒ wolo tataa-heyaalo ohilaa.

¹⁵ Ii̒i-lengiyaalo anggurulio mamuli powalingo-U̒ olio, wau Lumbaya Osuusa mapowaliyo-U̒ huhebu lopolo halapani. Mola teto tio mamolutula ola-U̒ debo odelo tou̒ donggo mudalio mai, tou̒ tio boheli yilumualao̒ lonto Masiri.

¹⁶ Lapatao̒ tio mamongunte ola-U̒ dilelio, wau diilalo Baa̒liilio.

¹⁷ Wau̒ diila tamopo luasi olio mongunte mao̒ tanggulo Baa̒l poli, tilinggula tau mamo lipato̒ tanggulo boito.

¹⁸ Tou̒ boito Wau̒ mamohutu daantia wolo tilolahepalo binatangi u hidala-dalaala alihu timongolio diila mao̒ momuyu umati-U̒. Wau̒ mamopo huheli ngoa̒amila popaatea wau mopohinggi pakaa-kasiyaalo popaatea monto lipu lo umati-U̒ boito, wau mohutu olimongolio tumumula wolo tantaramu wau aamani.

¹⁹ Isirai̒lu, yio̒ mapowaliyo-U̒ dile-U̒, dile tasaaha u ohiheo-hiheolo mao̒. Yio̒ maponuwo-U̒ wau ilohilaa-U̒ daa̒ laito; Wau̒ mamohutu mai motulidu hale wau tatapu molotolo hilao̒.

²⁰ Motuuu̒de lo danti-U̒, yio̒ manikaa-U̒. Yio̒ mamomasisi ola-U̒ odelo Eeyaamu lohihilao.

^21-22 Tou̒ boito, wonu umati-U̒ Isirai̒lu modua̒, Wau̒ mamo dungoheo̒ olimongolio. Monto hulungo Wau̒ mopohutu mai didi motuhutai tilinggula huta mongohi tilapulo pale, angguru wau winulo jaitun.

²³ Mapohutuwo-U̒ umati-U̒ tumumulo moa̒ahu wau motitatapu tolipu limongolio. Toli mongolio tai̒lunte ‘Taa Diila Pilonuwa’ mapo bilohu-U̒ mai deu̒ timongolio pilonu-U̒, wau ode limongolio tai̒lunte ‘Diila Umati-U̒’ matahudaa-U̒ mai, ‘Timongoli Umati-U̒’. Timongolio mamo lametao̒ odie, ‘Eeyaalo Allahu Taa̒ala lo mongowatotia.’ ”