HOSEA 14 - KITABI HABARI MOPIOHE

¹ Samaria musi hukuu-maniyolo sababu lomintaa̒ tingolo loluwali ola-U̒. Ulipulio maamate todelomo popaatea; mongo walai̒o unge malihitolio, wau mongobua tahi ombodaa̒wa butao̒ lio ombongio.”

Tei Hosea lomolohone alihu Isirai̒lu motoobati

² Muli pohualingolo ode Eeya Allahu Taa̒alaamu, wuu bangusa lo Isirai̒lu! Dusamu maa loo̒sababu olimongoli leihuluto wau lodehu.

³ Muli pohualingolo ode Eeya wau potunggula mola dua̒ botie odelo dewomu ode Eeya, “Yaa Eeyaa, aambungualo mai toonula dusa lo mongowatotia, wau tolimowali dua̒ lo mongowatotia botie, yi mongowatotia maa momuji mola to Eeya debo odelo u maa dilaanti lo mongowatotia.

⁴ Asyur diila taa mowali mopoa̒ahu mao̒ mongowatotia, wau wadala lo popaatea diila moo̒bantu olo mongowatotia. Mongowatotia diilalo moloi̒a ode bubuui̒aala huhutu lo mongowatotia lohihilao deu̒ timongolio Allahu Taa̒alo lo mongowatotia. Yaa Eeyaa, Eeya momonu tau-tauwala taa o diila penu boli olita taa mowali pomangga limongolio.”

Eeya lodanti tutumulo bohu ode Isirai̒lu

⁵ Eeya lotahuda mai, “Umati-U̒ taa maa lolahi, muli hamaa-U̒ wau ponuo-U̒ wolo lea-leaatu lo hilao; timongolio diila taa oingowa-U̒ poli.

⁶ Duo̒lo tau lo Isirai̒lu Wau̒ debo odelo didi u moo̒bata huta u delita. Timongolio maa mongoa̒abe debo odelo bunga wau debo odelo bungo lo woohu u modelomo waa̒tio.

⁷ Timongolio maa tumumulo wau oduheenga mola debo odelo pilomuulo u lotumbingai tou̒ toonulaalo mao̒, debo odelo bungo lo jaitun lamahio moonu debo odelo bungo lo woohu!

⁸ Timongolio maa muli mohualingai ode Olau̒ wau motibiluloa̒ todelomo wunelu-U̒. Wolo ngoi̒nta mola daa̒ timongolio maa oduheenga mao̒ maa̒amulu, debo odelo pale lobutu mola to halabolu u molomiodu wau debo odelo ileengi lo angguru. Debo odelo taluhu angguru lo Libanon tangguli mongolio masa-masaahuru.

⁹ Tau lo Isirai̒lu maa molapi mao̒ bubuui̒aala lo balahalaalio; timongolio tilaala-U̒ wau dilungohe-U̒ dua̒alio. Debo odelo bungo lo ayu u dadaata duungio, Wau̒ maa molilungai olimongolio. Wau̒ulo bungo lo totoonulaalo balakati limongolio. Wau̒, Eeya, maa lotahuda mai.”

Poheu̒uto

¹⁰ Hileaala dua̒ ngoa̒amila taa u biijaki mongalati wolo u tula-tuladee teea, wau mopoo̒tuotao̒. Potuhata-potuhata monto Eeya yito otutu, wau taa u sale tumumula modudua̒ potuhata-potuhata boito. Bo taa o dusa momalongao̒ tilinggula meihuloto wau modehu.