HOSEA 12 - KITABI HABARI MOPIOHE

Isirai̒lu wau Yehuda dilehuwa hukuumani

¹ Eeya lotahuda mai, “Bangusa lo Isirai̒lu momalita ola-U̒ wolo wimbulo wau aakali; bangusa lo Yehuda debo molawali ola-U̒, Allahu Taa̒ala Taa Mantali wau tatapu boli molotolo hilao.

² Totoonulalo hitua-tuawua u pilohutu lotau Isirai̒lu monto dimodupo demola hui diila ohuna wau osiipati mongantulu debo odelo dupoto tiimuru. U diila motulidu hale wau opoparangi lolaia̒ to wolota limongolio. Timongolio lohutu daantia wolo Asyur wau lodelo mota winulaa ode Masiri debo odelo tuoto lou̒ polosahaabati.”

³ Eeya o palakala wolo bangusa lo Yehuda; Tio olo maa mohukumani mai Isirai̒lu sababu pii̒ili limongolio. Tio maa molontuli huhutu limongolio.

⁴ Tumulalo mai todelomo talomo, tei Yako loluuhuru limongolio maa loheehu olei Esau wutatio pingi; wau yinta maa iludaa̒ mola, tei Yako lohuumbala wolo Allahu Taa̒ala.

⁵ Tio lohuumbala wolo ngotaalio lo malai̒kati, wau tio loo̒hama. Lapatao̒ tio hilumoyongo wau lei̒balakati mao̒. Lapatao̒ to Beteli, Allahu Taa̒ala leidungga mai ode lei Yako loluuhurunto boito, wau lobibiisalawa wolio.

⁶ Allahu Taa̒ala boito yito Eeya Taa Laba-Labaalo Kawasa. Tanggu-Lio yito Eeya. Wolo tanggula boi-boitoolo Tio mokahandaki tau moi̒baadati mao̒ to Olio.

⁷ Sababu uito, wuu timongoli wali lei Yako, pomalacayaalo ode Allahu Taa̒alaamu wau muli pohualingoolo ode Olio. Potitumuloolo wolo lea-leaatu lo tolia̒ango wau juujulu, wau wimai mao̒ wolo sabalu tunggula Allahu Taa̒alaamu mopohutu mai.

Putuusani u wumbutio mola timombihu hukumani ode Isirai̒lu

⁸ Eeya lotahuda mai ode bangusa lo Isirai̒lu, “Timongoli diila juujulu debo odelo tau lo Kanaa̒n; taa moodahangia monto olimongoli hipohimbuloa to taa paakualio wolo titimenga u diila otutu.

⁹ ‘Ito botia kaya,’ uali mongolio. ‘Ito uuntungi! Diaaluo penu boli ngotaa mao̒ taa mowali mopotulude deu̒ ito loo̒toduo mai okokaya boito wolo diila juujulu.’

¹⁰ Bo Wau̒, Eeya Allahu Taa̒alaamu, taa lodelo olimongoli yilumualao̒ lonto Masiri, maa mohutu olimongoli muli motibiluloa̒ to kekeemawala debo odelo mulooloalio mai tou̒ Wau̒ leidungga mai ode olemu to auhu padengo.

¹¹ Wau̒ maa lotahuda mao̒ ode mongonabi, wau longohi mai bibilohe dadaata ode limongolio. Lotimbuludei olimongolio Wau̒ lopoo̒taa mao̒ totoonulalo patuju-U̒ ode limongoli, umati-U̒,

¹² bo oditolio debo donggo woluo taa hipoluboa balahala to Gilead, wau he lopodewo sapi to yitaatio lo mesba to Gilgal. Bo timongolio taa hipoluboa balahala boito maa mate, wau memeesbawala to Gilgal boito maa mowali huntua lo botu to hahaalaboluala.”

¹³ Tei Yako loluuhurunto lolahi ode Mesopotamia, lapatao̒ u moo̒toduo mai dile, tio lotitiwato to taa u mola teeto wau lohimbala mao̒ hihiimbawaala lo tau boito.

¹⁴ Eeya longuutusi ngotaalio lo nabi u lodelo tau lo Isirai̒lu yilumualao̒ lonto polowato to Masiri, wau mota lodaha mao̒ olimongolio.

¹⁵ Tau lo Isirai̒lu maa lohutu to Eeya loingo daa̒; timongolio paatuti hukumaniola sababu ololeeti mongolio. Eeya maa mohukumani olimongolio. Sababu timongolio maa lohutu mao̒ tau he lohina Olio.