HOSEA 10 - KITABI HABARI MOPIOHE

¹ Isirai̒lu debo odelo bungo lo angguru u lomungo polodu. Helebe oduhenga mola okokayalio, helebe dadaata mao̒ mesba u pilohutulio. Helebe maa̒amulu mola, helebe mopiohe olo tutuu-guwaalo balaahala u hetuboolio.

² Tau-tauwalo tahilaalio diila motulidu hale boito, botia musi momanta akiibati lodusaalio. Allahu Taa̒ala mamopo aantulu mesba limongolio, wau mopolohubu tutuu-guwaalo balaahala limongolio.

³ Diilalo mohiheo timongolio mamoloi̒ya, “Ito diila o olongia sababu ito diila moohe to Eeya. Wolo hunalio ngotaalio li olongia duo̒lonto?”

⁴ Timongolio hemo latabu wau mohutu danti paaluti wau mongawade daantia udiila ohuna. Butoo̒ pilopo loloombulilio tilinggula odiila aadili lobutu debo odelo pilomulo opeedi to halabolu u mapilati.

⁵ Ulipu lokota Samaria mamoohe; timongolio wolo mongo iimamu tahi pomayawa sapi hulawa to Betel boito masuukali hilao wau humoyongo sababu ngoa̒amila ololamahu lo balaahala limongolio boito mailooli.

⁶ Balaahala botio mabintao̒lio ode Asyur u pomalaseni odeli olongia daa̒. Isirai̒lu helo dudua̒ lanjana u lohutu olimongolio loo̒tapu wolito wau hihiina.

⁷ Samaria mamo aantulu wau ti olongialio deloolio monao̒ debo odelo ayu ngoputu u pileelihu lotaluhu.

⁸ Kukuu-wiliyaalo to huhuu-luduwaalo to Betel tambati taulo Isirai̒lu molubo balaahala, maa̒ntuluolio. Duhi wau huo̒yoto mamobutu mai tomesba limongolio. Lapatao̒ timongolio mamo nguatia̒a mola ode huhuu-ideyaalo, “Tau̒beelo mai ami!” wau ode huhuu-luduwaalo, “Tembaalo mai ami!”

Isirai̒lu dilehuwa hukuumani

⁹ Eeya lotahuda mai, “Tumulalo mai u lotoduo to Gibea, taulo Isirai̒lu debo diipo lohuheli olo helohutu dusa loluwali ola-U̒. Sababu uito to Gibea olo timongolio mao̒dungga lo popaatea.

¹⁰ Wau̒ mamoluhu tau-tauwalo tao̒dusa boito, wau mohukuumani olimongolio. Babaa-ngusawalo mamo panggala u moluwali olimongolio, wau timongolio mahukuu-maniyolo sababu dusa limongolio u dadaata boito.

¹¹ Muloololio mai Isirai̒lu debo odelo sapi buboto u yilati mopiohu, wau u mohuto molumbetaa̒ pale. Wau̒ diila palalu momasi ayu ngoputu pomota to bonggolio u mopiohe boito. Bo botia Wau̒ malolantu u momakusa olio mokalaja mobuheeto. Yehuda ahulaa-U̒ momadeo̒ wau Isirai̒lu ahulaa-U̒ moheide huta.

¹² Wau̒ motahuda mai, ‘Wuu Isirai̒lu! Huo̒oilo halabolu bohu duo̒lo batangamu, pololadeelo bili u aadili, otolaalo balakati u lotapu mai wolo tio̒otutua tolia̒ngamu daa̒ ola-U̒. Sababu mawakutuulio yio̒ mololohe ola-U̒, Eeyaamu. Wau̒ mamei dungga mai wau mopodaata daa̒ olemu wolo babaa-laakati-U̒.’

¹³ Bo yio̒ helohutu u bolii̒o mao̒; yio̒ helo tolopani u moleeto, wau longotola odiila aadili. Yio̒ mailonga huhuu-ngowaalo tilapulo lo owimbulomu.” Eeya luli lotahuda mai, “Wuu bangusa lo Isirai̒lu, sababu timongoli hemo pomangga kakaa-letawaalo popaateyamu wau daatalio lomongo pajulemu,

¹⁴ yi ulipumu mao̒temba lo popaatea, wau ngoa̒amila bintengimu maa̒ntuluolio. Owowoluwoalio madebo odelo todulahu li Olongia Salman lopobinasa kota lo Bet-Arbel todelomo popaatea, wau lolihitao̒ mongo tiilo pee̒-pee̒enta wolo mongo walai̒o.

¹⁵ Ui-uitolo u mamotoduo mai woli mongoli, wuu ulipu lo Betel, sababu timongoli malohutu u moleeta daa̒. Tou̒ dulahee mamobutu mai, molamemeto lapatao̒ popaatea tumulalio, ti olongiaamu maamate.”