HOSEA 1 - KITABI HABARI MOPIOHE

¹ Uti-utieelo tahuli uilohi mai lo Eeya odelei Hosea walae̒e Beeri tomaasa yilaidia lo Yehuda totoo-yunuta mola pilalenta li Olongia Ujia, Yotam, Ahas, wau Hiskia, wau yilaidia lo Isirai̒lu pilalenta lei Yerobeam walae̒e Yoahas.

Dile wau mongo walae̒e Hosea

² Tou̒ Eeya u bohulo tahuda mai ode bangusa lo Isirai̒lu lotimbulude to olaatia, Eeya lotahuda mai, “Hosea, nikaiilo ngotaalio tamotohilaa motisuntali, wau mongo walau̒mu olo mamowali debo odelo tio. Umati-U̒, tutuuwauwa debo odelo ti dilemu boito; timongolio diila tatapu wau molotolo hilao to Olau̒ wau lololaa ola-U̒.”

³ Yi nilika lowatia taabua ngota tai̒lunte ti Gomer walae̒e Diblaim. Lapatao̒ tio malo potutu mai walao̒ lami tabohulio, talolai̒ ngota,

⁴ Eeya lotahuda mai odelaatia, “Tangguli mao̒ walau̒mu boito tei Yijreel sababu diilalo mohiheo Wau̒ mamo hukuumani mai oli olongia lo Isirai̒lu sababu polomatea yila-yilateelo mao̒ u pilohutu lei Yehu, loluuhurulio, to Yijreel. Wau̒ mamo poo̒pulitao̒ pamalenta wali mai lei Yehu.

⁵ Tou̒ boito to Lumbaya Yijreel Wau̒ mamo ngantulu olootolo suludadu lo Isirai̒lu.”

⁶ Lapatao̒ dile lowatia boito lopotutu mai walao̒ lami tao̒luolio, taabua ngota. Eeya lotahuda mai odelaatia, “Hosea, tangguli mao̒ walau̒mu boito, ‘Taa Diila Pilonua’, sababu Wau̒ diilalo momonu bangusa lo Isirai̒lu, wau sama-samaata diila tamo ngambungu olimongolio.

⁷ Bo bangusa lo Yehuda maponuwo-U̒. Wau̒ Eeya, Allahu Taa̒ala limongolio, mamopoa̒ahu mai olimongolio, bo diila wolo popaatea, wau olo diila wolo wamilo meaalo pana meaalo wadala wau jokiilio.”

⁸ Lapatao̒ walao̒ lami tao̒luolio pilopo huheli mao̒ lotutu, dile lowatia luli ilombodaa̒ mai tulusi malo potutu mai walao̒ talolai̒ ngota.

⁹ Eeya lotahuda mai odelaatia, “Tangguli mao̒ walau̒mu boito ‘Diila Umati-U̒’, sababu taulo Isirai̒lu diila umati-U̒, wau Wau̒ diila Allahu Taa̒ala limongolio.”

Owowoluwoa lo Isirai̒lu luli pilonguli mai

¹⁰ Bangusa lo Isirai̒lu mamowali mola dadaata wau daatalio debo odelo hungayo to deheto, tilinggula diilalo otonggade meaalo oyia̒apo. Botia Allahu Taa̒ala lotahuda ode limongolio, “Timongoli diila umati-U̒,” bo mamei dungga wakutuulio Tio mamotahuda mai ode limongolio, “Wau̒lo Allahu Taa̒ala tatumu-tumulo wau timongoli mongo walau̒u-U̒!”

¹¹ Bangusa lo Yehuda wau bangusa lo Isirai̒lu mamuli potuwauwolo. Timongolio mamo muduo̒ tau̒wa ngota, wau timongolio mamowali dadaata mola wau maa̒amulu poli tolipu limongolio. Otutu, dulahu Yijreel mamowali dulahee daa̒!