HAGAI 1 - KITABI HABARI MOPIOHE

Palenta lo Eeya u muli momongu Bele lo

¹ To taunu oluolio pamalenta li Olongia Darius to Persia, tobohulo dulahu hulala olomio, Eeya lotahuda lotimbuludei li Nabi Hagai. Tahuli lo Eeya boito pilodulu-Ngio odelei Jerubabel walae̒e Sealtiel, gubolonulu lo Yehuda, wau odeli Iimamu Daa̒ Yosua walae̒e Yojadak.

² Eeya Taa Laba-labaalo kawasa lotahuda odelei Hagai, “Bangusa botie loloi̒ya deu̒ diipo wakutuulio muli momongu Belee-U̒.”

³ Lapatao̒ wolo lotimbuludei li Nabi Hagai, Eeya lotahuda ode umati-Lio,

⁴ “Wuu umati-U̒, wolo maa wakutuulio olemu u motibiluloa̒ todelomo bele u motoheeto wau molotolo, hiambola Belee-U̒ donggo debo odelo tutuu-wodeyaalo?

⁵ Ntali, poo̒tuotilo mao̒ owowoluwoamu!

⁶ Timongoli malo mua̒yade bili dadaata, bo tilapulo ilotolumu bo ngoi̒di. Timongoli o ua̒alo, bo diila tuheto u mopobutuhe ombongumu. Timongoli o angguru, bo diila tuheto u mopoo̒luli hilaamu. Timongoli o pakeyangi, bo diila tuheto mopopatu batangamu. Wau wuupa u tilolimo lokaumu tahi pokalajawa bangganga diila tuheto u mohumbuta tutumuli mongolio.

⁷ Wolo timongoli diila mongalati, yilongola sua̒li boito lotoduo?

⁸ Botia, potao̒dulo mola ode huhuu-luduwaalo u mohama mai ayu, lapatao̒ bongulaalo Belee-U̒; yi Wau̒ mamolaasa sanangi wau Wau̒ mamuli tuboolio wolo dudelo u patutilio. Ntali, poo̒tuotilo mao̒ owowoluwoamu!

⁹ Timongoli hemo halapu tilapulo ilotolo u dadaata daa̒, bo diila ota-otaa mao̒ timongoli loo̒tapu mai bongoidi daa̒; timongoli lodelo lohualingo tilapulio, bo tilapulo ilotolumu boito hiliipa-U̒, tilinggula lopulito pilotomboto dupoto. Yilongola pilohutu uito? Tametio yito: Sababu Belee-U̒ donggo debo odelo tutuu-wodeyaalo, hiambola timongoli ngoa̒amila moo̒olohu hemomongu beleemu ngota-ngota.

¹⁰ Uitolo sababuulio didi diila helodehu tilinggula diaaluo pilomulo u mowali mobutu.

¹¹ Wau̒ malo podungga mai polohengu tohuta wau huhuu-luduwaalo, to hahaa-laboluwalo pale wau ii̒i-lengiyalo angguru wau ii̒i-lengiyalo jaitun, wau ode ngoa̒amila pilomulo tohuta botie, tumbao̒ olo ode manusia wau binatangi wau totoonulalo u hitua-tuawua u tilolopani limongoli.”

Umati lo Isirai̒lu lodungohe palenta lo Eeya

¹² Lapatao̒ tei Jerubabel wolei Yosua boli ngoa̒amila umati lo Isirai̒lu tamaa luli lohualingai lonto polayahu to Babel, lodungohe loloo-iyaalo lei Hagai, utolia lo Eeya boito. Timongolio lopohutu wolo u pilomalenta lo Eeya ode limongolio, sababu moohe to Eeya.

¹³ Lapatao̒ tei Hagai lopo tunggulao̒ ode ulipu tahuli lo Eeya deu̒ Eeya malodanti mamoduo̒la olimongolio.

¹⁴ Odi-odieelo mola Eeya helo poo̒liyoa̒ hilaa li Gubolonulu Jerubabel, Iimamu Daa̒ Yosua wau ngoa̒amila taa u malo hualingai lonto polayahu, alihu timongolio ngoa̒amila mokalaja momongu Bele lo Eeya Taa Laba-labaalo kawasa, Allahu Taa̒ala limongolio.

¹⁵ Timongolio lolomula lokalaja todulahee odulo pulaa pato, hulala olomio todelomo taunu oluolio tomaasa pamalenta li Olongia Darius.