ESTERI 9 - KITABI HABARI MOPIOHE

Taulo Yahudi lohutu helo loluwali mumuusulio

¹ Pulitio mao̒ malei dungga mai dulahu opulaa totolu hulalo Adari, deu̒yito-yito dulahu utilantu mao̒ u ponao̒olo palenta li olongia totau-tauwalo Yahudi. Dulahe boito maa yilima mumuu-suwaalo bangusa lo Yahudi u mongawaasa mao̒ bangusa boito. Bo malo ilaalo deu̒ taulo Yahudilo talo poo̒laaheo̒ olimongolio.

² To timii̒du kota, tau-tauwalo Yahudi helo tia̒mbu wau lotituwau u loluhu ngoa̒amila taa u oniyati moleeto olimongolio. Babaa-ngusawalo penu boli tou̒toonu mailoohe olimongolio tilinggula diaaluo penu boli ngotaa mao̒ tabuheli motaalua wolimongolio.

³ Tumbao̒ ngoa̒amila taduduulaa̒ lo polopinsi, mongo gubolonulu, wau tahidihuma pantungo lo bele biluloa̒ saaha li olongia helomantu taulo Yahudi sababu ngoa̒amilalo moohe to olei Mordekhai.

⁴ To ngoilanggubu bele biluloa̒ saaha li olongia otaawa lotau deu̒ tei Mordekhai laba-labaalo odulude to bele biluloa̒ saaha li olongia wau helebe okawasa mola olo.

⁵ Odi-odieelo mola bangusa lo Yahudi heloo̒hutu mao̒ toonula otohilaalio wolo musu limongolio, timongolio loluhu wolo wamilo tulusi heloo̒pate olimongolio yila-yilateelo mao̒.

⁶ To Susani, tiilo kota lo lipu, taulo Yahudi helomate yila-yilateelo mao̒ limo lohetuto lota.

^7-10 To wolotalio leituoto mopulu lota walao̒ lai̒ lei Haman walae̒e Hamedata, musu daa̒ taulo Yahudi. Timongolio boito yito: tei Pasandata, Dalpon, Aspata, Porata, Adalya, Aridata, Parmasta, Arisai, Aridai wau Waijata. Bo taulo Yahudi diila helo lambato.

¹¹ To dulahu boitolo olo tau helo poduloheo̒ odeli olongia jumulaa lotau-tauwalo tahe ilopatea yila-yilateelo mao̒ to Susan.

¹² Uali olongia mao̒ odeli Olongia taabua Esteri, “Bo to Susan wambao̒ taulo Yahudi heloo̒pate yila-yilateelo mao̒ limo hetuto lota, leituoto tamopulu lota walae̒e Haman. Lebelebe pomao̒ to popoo-lopinsiyalo! Diila otaawa wolo u hepilohutu limongolio mola teto! Naa, donggo wolo poli u pohilemu botia? Poleleaalo mai wambao̒, yio̒ tantu mamoo̒tapu mao̒!”

¹³ Ti Esteri lolametao̒, “Wonu ti Baginda motuuhatawa, patutilio taulo Yahudi tahi biluloa̒wa to Susan botie loombu mola dumodupo poluasiyalo muli monguli mao̒ u mapilo hutulio to dulahe botie. Donggo poli, patutilio milate lomongo walae̒e Haman boito ntayangolo to wowoo-lihiyaalo pontayangalo.”

¹⁴ Lapatao̒ ti olongia longohi mao̒ parenta u loponao̒ hihiile li Esteri; tuladu palenta ode kota Susan yiluwalo wau milate lo walae̒e Haman mopulu lota he ntilayangio.

¹⁵ Oditolio todulahu opulaa pato hulalo Adar. Tau-tauwalo Yahudi luli lotia̒mbu to Susan wau helomate yila-yilateelo mao̒ tolo hetuto lota poli tokota boito. Wau pee̒enta botie olo timongolio diila helo lambato.

¹⁶ Tau-tauwalo Yahudi tahi biluloa̒wa to popoo-lopinsiyalo olo malo tia̒mbu wau helo poduulua batanga limongolio. Timongolio helo poo̒laaheo̒ musulio wau loo̒pate yila-yilateelo mao̒ pitu lopulaa limo lolihu lota tahi polonua̒wa olimongolio. Bo timongolio diila helo lambato.

¹⁷ Polou̒tia boito lotoduo mai todulahu opulaa totolu hulalo Adar. Dulahu wumbutio mola, todulahu opulaa pato, timongolio diila helomate yila-yilateelo mao̒ penu boli tatoonu, bo helo polame mao̒ dulahe boito wolo hiweengahe.

¹⁸ Bo taulo Yahudi tawoluo to Susan helo polame mao̒ todulahu opulaa limo odelo dulahe daa̒, sababu timongolio malomate yila-yilateelo mao̒ musu todulahu opulaa totolu wau opulaa pato, lapatao̒ lohuheli todulahu opulaa limo.

¹⁹ Uitoolo sababuulio taulo Yahudi tahi biluloa̒wa to kokoo-tawaalo kekeei̒ helo poe̒ela mola dulahu opulaa pato hulalo Adar odelo dulahu u potiwengahelo, dulahu u potihungguwalo wolo weengahe sambela hemo-ngongoohia paraseni debo odelo ua̒alo.

Rameyangi lo Purim

²⁰ Lapatao̒ uito tai Mordekhai helo luladeo̒ totoonulalo helo todua mai boito wau helolao tuladu ode ngoa̒amila taulo Yahudi to ngoilanggubu bele biluloa̒ saaha li olongia lo Persia, mopio tamolamingo meaambo tameembidu.

²¹ Tuango tuladu boito yito palenta u mopolame mao̒ dulahu opulaa pata wau opulaa limo halalo Adar timii̒du taunu.

²² To duduu-laheyaalo boitolo timongolio malo poo̒laaheo̒ mumuusuwalo limongolio, tilinggula owooloolo wau osuukali limongolio malo lomeelo lowali weengahe wau sanangi tutu. Masababu uito timongolio musi mopolame mao̒ duduu-laheyalo boito wolo potihunggu wau totamelo wau tinggai mongongoohia ua̒alo wau molayadeo̒ sadaka to taa mosikini.

²³ Taulo Yahudi helo dungoheo̒ palenta lei Mordekhai boito wau odi-odieelo mola lameyangi boito helowali uu̒udu timii̒du taunu.

Osimpuluulio

²⁴ Tei Haman walae̒e Hamedata, wali mai lei Agag, musu daa̒ taulo Yahudi, malo mahuta undi u ilunte olo “purim” huna molantu mao̒ dulahu u polambalaalo taulo Yahudi; tio malo ranjana u mopobinasa olimongolio.

²⁵ Bo ti Esteri mota lotaalua woli olongia, wau ti olongia longohi mao̒ palenta tulatuladu u loo̒sababu ranjana moleeto u pilohutu lei Haman lotoduo to batangalio lohihilao, tilinggula tio wau mongo walai̒o he ntilayangio to wolihi pontayangalo.

²⁶ Sababu uito duduu-laheyalo daa̒ boito ilunte Purim. Tuladee Mordekhai wau totoonulalo u mai̒lo rasaawa taulo Yahudi,

²⁷ heloo̒ akiibati olimongolio lohutu mao̒ wuu̒du tuwau ode batanga limongolio lohihilao, ode wali mola limongolio wau ode ngoa̒amila taa u mamowali waito bangusa lo Yahudi. Modudua̒ wuu̒du boito timii̒du taunu timongolio musi mopolame mao̒ oluo dulahu u matilantu mao̒ lei Mordekhai.

²⁸ Tilantulio mao̒ olo deu̒ u ohiheo-hiheolo mao̒ duduu-laheyalo Purim boito musi he eelaalo wau popolamee mao̒ lo timii̒du ngaalaa̒ lo Yahudi monto ngoa̒amila hilaide to delomo timii̒du polopinsi wau timii̒du kota.

²⁹ Wewolio mao̒ leeto, pee̒-pee̒enta wolo tuladee Mordekhai, ti Olongia taabua Esteri walae̒e Abihail heloludo tuladee oluolio, u lopoo̒toheto tuango tuladee Mordekhai pasali lo Purim boito.

³⁰ Tuladee boito yilaolio ode ngoa̒amila taulo Yahudi, wau totoonulalo dupilikatilio heilaolio ode ngohetuto dulo pulaa pitu polopinsi bele biluloa̒ saaha li olongia lo Persia. Tuladee boito wolo dua̒ alihu bangusa lo Yahudi laito salamati wau aamani.

³¹ Tuladee boito he loo̒wooli olo alihu timongolio wau wali mola mopoe̒elao̒ duduulaheaala lo Purim to wakutu u tuhata, odelo woloolo mola timongolio helo poe̒elao̒ maasa puasa wau maasa limilimi. Ui-uitolo tuango tuladee Mordekhai woli Olongia taabua Esteri.

³² Palenta li Esteri u lolantu mao̒ totoonulalo wuu̒du lo Purim, tiluladu todelomo buku.