ESTERI 8 - KITABI HABARI MOPIOHE

Bangusa lo Yahudi pilarentalio helo luwali musulio

¹ To dulahe boito ti Olongia Ahasyweros longohi mao̒ odeli Olongia taabua Esteri ngoa̒amila halata upango lei Haman, musu daa̒ taulo Yahudi boito. Ti Esteri lopo̒taa oli olongia deu̒ tei Mordekhai wutato ngoputua lo wibuo̒ wolio, yi tumulalo mai tou̒ boito tei Mordekhai heilohia haku hemotaalua woli olongia penu boli diila hetiangolo meimulo.

² Ti olongia lolopatao̒ hua̒limolio u maluli hilamalio mai lonto olei Haman wau yilohilio odelei Mordekhai. Wau ti Esteri lomudua̒a olio lowali takawaasa to halata upango lei Haman.

³ Lapatao̒ uito ti Esteri luli lotaalua mao̒ woli olongia. Tio losujudu mola sambela hiyo-hiyongo wau helo molohone alihu ti olongia diila mopomata ihitiyari moleeto u pilohutu lei Haman to taulo Yahudi.

⁴ Ti olongia lolopatao̒ tunggudio hulawa odeli Esteri, lapatao̒ tilimihula mola ti Esteri wau loloi̒ya mao̒,

⁵ “Wonu ti Baginda motuuhatawa wau motolia̒nga to watotia, patutilio ti Baginda mopolualao̒ tuladu palenta u momahutao̒ tutuu-ladeyaalo lei Haman u tuatuanga palenta mopobinasa mao̒ ngoa̒amila taulo Yahudi to bele biluloa̒ saaha li olongia botie.

⁶ Diila pongalo aakali watotia mambo momilohe bangusa wau mongo ilaato lo watotia mopulito tambalolio?”

⁷ Yi uali Olongia Ahasyweros odeli Olongia taabua Esteri wolei Mordekhai, “Memangi, wau̒ malo ntayangao̒ olei Haman sababu tio ohilaa mopobinasa taulo Yahudi, wau halata upangolio mailohiu̒ odeli Esteri.

⁸ Bo tuladu u matiluladee mota to tangguli olongia wau hecilapua mao̒ capu li olongia, diila mowali muli pahutolo. Bo, timongoli poluasiyou̒ mai moluladeo̒ tuladu pasali bangusa lo Yahudi, penu boli wolo wamabi̒o u bilohe limongoli mopiohu. Tuladeelo tuladu boito to tangguluu̒ wau capualo wolo capu lo bele biluloa̒ saaha li olongia.”

⁹ To dulahu boitolo, deu̒yito-yito todulahu odulo pulaa totolu hulalo otolulio, hulalo Siwan, tei Mordekhai helo tiangai tomongo dulutuli li olongia wau lopoa̒hu olimongolio helo luladee mota ode mongo gubolonulu, mongo uhuuhuhu wau taduduulaa̒ lo lipu ode ngohetuto dulo pulaa pitu polopinsi, monto India demola Sudan. Tutuu-ladeyaalo boito tiluladio mao̒ todelomo bahasa wau tuladio lo popoo-lopinsiyalo boito ngota-ngota. Tio olo helolao tuladee ode taulo Yahudi todelomo bahasa wau tuladio lo Yahudi.

¹⁰ Tutuu-ladeyaalo boito hedilutua mao̒ pali lo uluu̒ lei Mordekhai to tangguli Olongia Ahasyweros wau hecilapua wolo capu lo bele biluloa̒ saaha li olongia. Lapatao̒ tei Mordekhai helei̒ depitaa mota to mongo utolia tutuu-ladeyaalo boito ode popoo-lopinsiyalo bele biluloa̒ saaha li olongia wolo helotitae̒ to wawaa-dalawalo u molinggahu haku li olongia.

¹¹ Tutuu-ladeyaalo boito helo poi̒laalo deu̒ ti olongia mopoluasi taulo Yahudi to timii̒du kota u motituwau wau mopoduulua batanga. Wonu bolo timongolio tuhuo lotau-tuawalo otingolo monto bangusa wau penu boli polopinsi toonu, timongolio mowali moluwali wau momate mate-mateelo mao̒ tahi poluhua boito wolo dilebua wau mongo walai̒o; timongolio mowali molambala mumuusulio boito tunggula mopulito wau molambata harata upangolio.

¹² Palenta boito musi ponao̒olo to ngoilanggubu bele biluloa̒ saaha li olongia lo Persia to dulahe u matilantu mao̒ lei Haman u momate tau-tauwalo Yahudi mate-mateelo mao̒, todulahu opulaa totolu hulalo opulaa duluo, hulalo Adar.

¹³ Tuladu palenta boito musi polualolo odelo wuu̒du wau poloo̒polo mola ode ngoa̒amila polopinsi alihu bangusa lo Yahudi motidapato moluwali musulio wonu bolo dulahe boito meidungga mai.

¹⁴ Yi malo monggato mongo utolia boito helo titae̒ to wadala miliki li olongia. Wau olo to Susan tiilo kota lolipu, palenta boito hepilo bacalio mao̒.

¹⁵ Lapatao̒ uito tei Mordekhai lololaa mao̒ bele biluloa̒ li olongia wolo lomake pakeyangi odudaa̒ tumbai̒o wahue̒nte wau moputio̒, jumba lailoumu lonto lenani moa̒aluti wau makuta hulawa ugaaga daa̒. Kota Susan helo ngibo-ngiboode mola sababu leengahu.

¹⁶ Taulo Yahudi loraasa ilolulia mola lohilao wau leengahu, sanangi tutu wau bangga.

¹⁷ Wau olo to timii̒du kota wau polopinsi, penu boli tou̒toonu tuladu palenta li olongia boito hepilobaca, tau-tauwalo Yahudi helo tiwengahu, helo tisanangi wau lohutu potihunggu. Tumbao̒ dadaata lonto ulipu talowali walaga bangusa lo Yahudi, sababu timongolio moohe to bangusa boito.