ESTERI 4 - KITABI HABARI MOPIOHE

Tei Mordekhai helei̒bantu oli Esteri

¹ Tou̒ tei Mordekhai loo̒dungohe wolo u malo toduo mai, tio longaidinga pakeyangilio wau lomake kaingi kado odelo tuotio siluukali. Tio lopomua̒yade peyahuo̒ to lunggongio, tulusi lolontale di kota sambela hiyo-hiyonga daa̒ wau piilu.

² To talu lohuhebu hulubangi lobele biluloa̒ li olongia tio lohuheli, sababu taa u hipakea kado diniolio tumuotao̒.

³ Wau olo to ngoa̒amila polopinsi, tau-tauwalo Yahudi helo hilimuta lapatao̒ palenta li olongia pilomalalumu mola. Timongolio helo puasa, hilumoyongo wau helo podulohu, wau dadaata to wolota limongolio helomake kaingi kado wau helo tibalata toitaato peyahuo̒.

⁴ Tou̒ mongo dulahu wau tolomodu tahidihuma pantungo taa hemomaya toli Olongia taabua Esteri helo poduloheo̒ olio wolo u donggo hepohutuo lei Mordekhai, yi ti Esteri siluukali daa̒. Tio lolao pakeyangi odelei Mordekhai odelo poluloo̒ kaingi kadolio, bo tei Mordekhai diila lohuto lololimo mao̒.

⁵ Lapatao̒ ti Esteri lotiangai olei Hatah tala ngota u tolomodu tadihudihu pantungo utiluugasia li olongia u lomaya oli Esteri. Ilahulalio tei Hatah mota lohintu olei Mordekhai wolo udonggo todutoduo wau yilongola tio helohutu debo odelo uito.

⁶ Yi malonao̒ mota tei Hatah odelei Mordekhai to tanalapa lokota totalu huhebu hulubangi lobele biluloa̒ li olongia.

⁷ Tei Mordekhai lohungguli mao̒ olio wolo u malo toduo wau dengolo mola doi talaa̒ upilodanti lei Haman u potuotolo ode delomo kasi li olongia, lapatio mao̒ ngoa̒amila taulo Yahudi pobinasaalo.

⁸ Tei Mordekhai olo longohi mao̒ olei Hatah wuwemi lotuladu li olongia u mailualai to Susani wau tuatuanga palenta u mopobinasa mao̒ taulo Yahudi. Tio lopoa̒hu olei Hatah mota longohi tuladu boito odeli Esteri wau lotombangao̒ palakala boito olio, wau olo helohile mao̒ alihu ti Esteri mota motaalua woli olongia huna momolohone odehu hilao li olongia ode bangusaalio.

⁹ Lapatao̒ malonao̒ tei Hatah odeli Esteri wau helo potunggulao̒ tahuli lei Mordekhai olio.

¹⁰ Bo ti Esteri luli lolao olei Hatah odelei Mordekhai wolo tohuli botie,

¹¹ “Timii̒du tau, mopio lai̒ boli bua, tadiila tiliyango, motaalua woli olongia to paango delomio lobele biluloa̒ li olongia, musi hukumaniyola mate. Uito yito wuwuu-uduwaalo wau ngoa̒amila tau tumulalo mao̒ monto tamoo-nasehatia dilumutu ulipu to popoo-ropinsiyalo, motota sua̒li boito. Bo woluo dalalo tuwau u moo̒hei monto wuwuu-uduwaalo boito, deu̒yito-yito wonu bolo ti olongia mohudu mao̒ tunggudio hulawa totau boito. Wonu uito motoduo, yi tio mama̒ahu. Bo mangohula mola botie wau̒ diila hetiliyangi olongia.”

¹² Lapatao̒ tei Hatah lopotunggulao̒ tahuli li Esteri boito odelei Mordekhai.

¹³ Yi tei Mordekhai helo poe̒elao̒ odie toli Esteri, “Diila mao̒ polantobu deu̒ yio̒ malebe aamani wolo taulo Yahudi wewo, bo sababu yio̒ bilu-biluloa̒ tobele biluloa̒ li olongia!

¹⁴ Taulo Yahudi tantuulo mao̒ mamoo̒tapu mai tuulungi penu boli woloolo mola olo dudelolio tilinggula timongolio moa̒ahu. Bo wonu yio̒ debo motipoo̒oyo wambai̒o todelomo owowoluwoa debo odelo utie, yi yio̒ lohihilao maa mate wau ngaalaa̒ liyamamu mamopulita mola riwaayatilio. Tatoonu tamotota, otanu tumbao̒ to sasaa-atiyaala debo odelo utie yio̒ matilulaoto lowali ratu!”

¹⁵ Yi ti Esteri lolao mola habari botie odelei Mordekhai,

¹⁶ “Ambualo mao̒ ngoa̒amila taulo Yahudi tawoluo to Susan u modua̒ mola olau̒. Diila mao̒ polamelo wau pongilu ngotilonggadu huilio totolu wau dulahio totolu. Wau̒ lohihilao wau mongo dulahu tahi pomayawa olau̒ mamopuasa mola olo. Lapatao̒ uito wau̒ mamotaalua woli olongia, penu boli uito molambanga wuwuu-uduwaalo. Wonu wau̒ musi mate kalana uito, huliilo mao̒ wau̒ mate!”

¹⁷ Lapatao̒ malonao̒ tei Mordekhai wau helo pohutu mao̒ ngoa̒amila u pilolahuli Esteri olio.