ESTERI 2 - KITABI HABARI MOPIOHE

Ti Esteri lowali olongia taabua

¹ Dengolo wakutu mola lapatio mao̒, eleponu ti olongia madiilalo loingo, tio debo donggo hemomikiilangi mola huhutu li Olongia Taabua Wasti wau huhutu u mahilama mao̒ to olio.

² Sababu uito tahi ponaseehatia olio tamodudula daa̒ woli olongia helo nasehati mao̒ odie, “Opiohelio pei̒ loloohe mai mongo dulahu tahi gaagawa odeli Baginda.

³ Paatutilio ti Baginda momudua̒ mongo pogawee to ngoa̒amila polopinsi lo bele biluloa̒ saaha li olongia botie u mololoohei mongo dulahu tahi gaagawa lapatao̒ modelo mai olimongolio ngoa̒amila ode bele biluloa̒ bua to Susan botie. Tei Hegai, tatolomodu dihudihu pantungo talowali tau̒wa lou̒ diilea tobele biluloa̒ li olongia bua, mamonguurusi olimongolio wau molaalao̒ ogaaga limongolio.

⁴ Lapatao̒ uito, mamusi ti Baginda molulaotao̒ tadulahu taa otohilaa daa̒ li Baginda, wau mopowali mao̒ olio ratu odelo poluloo̒ oli Olongia Taabua Wasti.” Ti olongia akolo to potua boito wau loponao̒ mao̒.

⁵ To kota lo Susan boito woluo ngotaalio lo Yahudi tai̒lunte Mordekhai walae̒e Yair. Tio wali mai lei Kis wolei Simei lonto suku Benyamin.

⁶ Tei Mordekhai maa tilawalio tou̒ Yerusalemu ilolaahe lei Nebukadnejar, olongia lo Babel. Tei Mordekhai pilolayahio ode Babel pee̒-pee̒enta wolei Yoyakin, olongia lo Yehuda, wau dadaata tawalo uwewo.

⁷ Tio owutato ngoputua lo wibuo̒, tadulahu ngota u olaku gaga wau owawao̒ molamahu, tai̒lunte Esteri, hiambola tanggulo Iburanilio yito Hadasa. Mongo dulaa̒ li Esteri mailate wau tio malowali walao̒ tabilintao̒ lei Mordekhai wau tilaalalio mao̒ odelo walai̒o pulua.

⁸ Tou̒ palenta li olongia pilomalumu mola, yi dadaata mongo dulahu he ilambulio to Susan wau ti Esteri woluo to wolota limongolio. Tio olo dilelio mola ode bele biluloa̒ li olongia wau pilomalacayaalio mao̒ to olei Hegai tau̒wa lou̒ diilea to bele biluloa̒ li olongia bua.

⁹ Tei Hegai lolinggolabu loo̒onto mao̒ oli Esteri wau ilohilaa olio. Wolo lolamemetao̒ tadulahu boito yilohialio polorawati ogaaga boli ua̒alo utolo-tolomodu. Ti Esteri yilimbatio ode wimbihu ulaba-labaalo mewa tobele biluloa̒ li olongia bua boito wau pitu lota mongobua talaba-labaalo moolato tobele biluloa̒ li olongia yilohia tuugasi u momaya olio.

¹⁰ To potua mao̒ lei Mordekhai, ti Esteri diila helo poo̒taa mao̒ deu̒ tio ngotaalio lo Yahudi.

¹¹ Timii̒du dulahu tei Mordekhai hemojalena totalu lopaango lobele biluloa̒ li olongia bua boito u hemohintu mao̒ owowoluwoa li Esteri wau wolo u mamotoduo wolio.

¹² Modudua̒a wuu̒du, mongobua wohiyaalo ogaaga ngotilonggadu ngotaunu mola: wolomo hula mola wolo winulo uu̒ulauwa alama, wau wolomo hula wumbutio mola uu̒ulauwa wolo hiwoonua uwewo. Lapatao̒ uito, timii̒du tadulahu moo̒tapu tayadu motaalua woli olongia Ahasyweros.

¹³ Tou̒ tadulahu ngota motaalua woli olongia, tio mowali momake penu boli wolo wambao̒ u otohilaalio.

¹⁴ Tio dilolio mota ode bele biluloa̒ li olongia tou̒ hui, wau loombulio mola tio deloolio ode bele biluloa̒ li olongia wewo, wau iluurusi mao̒ lei Saasgas, ngotaalio utolo-tolomodu dihudihu pantungo lipu u monguurusi mongo pipia li olongia. Tadulahu boito diilalo mai motaalua woli olongia, ngopohia wonu ti olongia muli mokahandaki olio wau motianga olio wolo mongunte mao̒ tanggulio.

¹⁵ Yi malei dungga tayadu li Esteri mai motaalua woli olongia. – Ti Esteri yito walae̒e Abihail wau watato ngoputua lo wibuo̒ wolei Mordekhai tamalo mintaa̒ olio odelo walai̒o lohihilao; ti Esteri helao̒ linggolabu totimi̒du taa u momilohe olio. Tou̒ tio mota lotaalua woli olongia, ti Esteri helomake mao̒ pakeyangi lodudua̒ potunu wau potua lei Hegai, tau̒wa lobele biluloa̒ li olongia bua.

¹⁶ Odi-odieelo mola, totaunu opitulio pamalenta lei Ahasyweros tohulalo opululio, deu̒yito-yito hulalo Tebet, ti Esteri dilelolio lotaalua woli Olongia Ahasyweros tobele biluloa̒ li olongia.

¹⁷ Tio heloo̒ wengahe wau loo̒sanangi tutu oli olongia lebe lou̒ mongo dulahu wewo. Sababu uito tio otolia̒ngio daa̒ li olongia. Yi ti olongia malo pohuli mao̒ makuta to lunggongi Esteri wau lopowali olio lowali ratu lobuulota woli Olongia Taabua Wasti.

¹⁸ Lapatao̒ uito, ti olongia helohutu potihunggu daa̒ odelo lohurumati oli Esteri wau he loloduo ngoa̒amila pogawee wau tadudulaa̒ lo ulipulio. Ti helo pomalalumu mola dulahu perei to ngoilanggubu bele biluloa̒ saaha li olongia wau helolaya-layadeo̒ paraseni wolo laba-labaalo daatalio.

Tei Mordekhai helo poa̒ahu nyawa li olongia

¹⁹ Tou̒ boito tei Mordekhai mapiluduo̒ li olongia lowali pogawee lolipu.

²⁰ Ti Esteri debo diipo lopoo̒taao̒ deu̒ tio ngotaalio lo Yahudi, sababu tei Mordekhai lodini olio. Ti Esteri lodungohe olei Mordekhai debo odelo tou̒ tio donggo kikiia̒i wau hetilaala lo wutato ngoputua lo wibuo̒ wolio boito.

²¹ To dulahe tuwau, tou̒ tei Mordekhai donggo otuugasi tobele biluloa̒ li olongia, duulota utolo-tolomodu dihudihu pantungo li olongia, deu̒yito-yito tei Bigtan wolei Teres, lowoomboa ohilaa momate oli Olongia Ahasyweros mate-mateelo mao̒, sababu timongolio molonuo̒ daa̒ olio.

²² Ranjana boito ilotahua lei Mordekhai wau tio hua̒a lopotunggulao̒ odeli Esteri. Lou̒ diilalo lomikiilangi mola wolo-wolo, ti Esteri hua̒a lohungguli mao̒ odeli olongia wolo u ilotaawa lei Mordekhai boito.

²³ Palakala boito tiluletelio, yi malo patatai deu̒ dudulohu boito otutu. Oditolio, taduulota boito, he ntilayangio. Tutuuu̒de wolo palenta, polou̒tia boito tiluladio todelomo buku sojara lo bele biluloa̒ saaha li olongia.