ESTERI 1 - KITABI HABARI MOPIOHE

Ti Olongia taabua Wasti helo luwali palenta li Olongia Ahasyweros

^1-2 To Susan, tiilo lokota Persia, tei Ahasyweros helo malenta odelo olongia. Yilaidialio tilitangoa lo ngohetuto dulo pulaa pitu polopinsi, tumulalo mao̒ lonto India demola Sudan.

³ To taunu otolulio pamalentaalio, ti Olongia Ahasyweros helohutu potihunggu daa̒ ode ngoa̒amila tadudulaa̒ lo ulipu wau pogaweelio. Mongo eyaanggu lo Persia wau Media woluo olo to potihunggu boito, odito olo mongo gubolonulu wau tahi dihuma pantungo hilaia̒awa lo polopinsi.

⁴ Wolomo hula mola hiheolio ti olongia helo pobiloheo̒ okokaya lobele biluloa̒ li olongialio wau odudaa̒ boli ololamahu yilaidialio.

⁵ Lapatao̒ uito ti olongia luli lohutu potihunggu ode ngoilanggubu ulipu to Susan, mopio takaya boli tamosikini. Potihunggu boito pohupohutu ngodiminggu mola polupolu wau hepilo hutulio to ileengi pilomuloa bunga lobele biluloa̒ li olongia.

⁶ Paango lobele biluloa̒ li olongia hepiloromu wolo podehu lonto kayingi lenani tumbai̒o wahue̒nte wau moputio̒, ilawadu wolo tali lenani moa̒aluti wau piloa̒bitio to gagaa-langiyaalo talaa̒ u hulihuli to wowoo-lihiyaalo pualamu. To walungio dilutualio hehee-tuleyaalo hulawa wau talaa̒ toitaato wumbato uporo-poromu pualamu moputio̒, habluru meela, alipo mutiara u molilingga wau botu piirusi wahue̒nte.

⁷ Ti olongia lopohetu mao̒ angguru laba-labaalo daatalio u pilohinta todelomo pipii-yalaalo hulawa hidala-dalaala.

⁸ Tahe tiloduo diila pilopo eenggade anggurulio meaalo hepilakusa longilu. Ti olongia malongohi mao̒ palenta to tahi pomayawa tobele biluloa̒ li olongia, alihu timii̒du tatiloduo yintaalo modudua̒a u otihilaalio ngota-ngota.

⁹ Tou̒ boito ti Wasti, dile li olongia, helohutu olo potihunggu ode mongobua todelomo bele biluloa̒ li olongia.

¹⁰ To dulahe u opitulio, ti olongia helo ngilu-ngilu tunggula leengahe daa̒. Sababu uito tio lotiangai opitu lota tolomodu tahidihuma pantungo lipu talowali moomayawa batangalio; timongolio yito tei Mehuman, Bijta, Harbona, Bigta, Abagta, Jetar wolei Karkas.

¹¹ Tio helo poa̒hu olimongolio lodelo mai ode talulio ti Olongia taabua Wasti lou̒ pakepake makuta bele biluloa̒ saaha li olongia lunggongio. Ti ratu boito gaga daa̒, wau ti olongia ohilaa mopobiloheo̒ ogagaalio to tadudulaa̒ lo ulipu wau ngoa̒amila tahe tiloduolio.

¹² Bo tou̒ tahi pomayawa boito lopotunggulao̒ palenta li olongia odeli Olongia Taabua Wasti, ti ratu boito diila lohuto lonao̒ mai, tilinggula ti olongia maloingo daa̒.

¹³ Woluo obobiasa li olongia u hemohile potuhata to tahi aahalia tomimbihu sua̒li lo butoo̒ wau uu̒du. Sababu uito tiliangio mai tahi ponaseehatia olio tamotota deu̒ wolo u musi pohutuolo todelomo sua̒li debo odelo uito.

¹⁴ Tahi ponaseehatia olio talo lolaalaaita hetiango li olongia yito: tei Karsena, Setar, Admata, Tarsis, Meres, Marsena wolei Memukan. Timongolio yito tahidihuma pantungo lo Persia wau Media tao̒ huhuloa̒ lailaio̒ daa̒ to bele biluloa̒ saaha li olongia.

¹⁵ Uali olongia mao̒ ode tapitu lota boito, “Wau̒ malolao mota tahi pomayawa olau̒ odeli Olongia taabua Wasti u lei̒ nao̒ mai olio ode olau̒. Bo tio diila lohuto. Modudua̒a to butoo̒, wolo u musi pohutuonto mao̒ olio?”

¹⁶ Yi ualei Memukani odeli olongia, “Wolo huhutu boito, diila bo ti Baginda wambao̒ tamaa hilina li Olongia taabua Wasti, bo ngoa̒amila pogawee li Baginda, tumbao̒ timii̒du mongo lolai̒ to bele biluloa̒ saaha li olongia botie!

¹⁷ Sababu huhutu li ratu boito mamowali otaawa lo ngoa̒amila mongobua, wau timongolio mamoporeme dilelio ngota-ngota. Timongolio mamoloi̒ya deu̒ ti Baginda malomalenta oli Olongia Taabua Wasti mai motaalua, bo ti ratu diila lohuto lonao̒ mai.

¹⁸ Oditolio, wonu bolo mongo dile bua lo tadudulaa̒ lo ulipu to Persia wau Media moo̒dungohe mota sua̒li boito, tantu timongolio mahua̒a mopoo̒taa mao̒ todile lai̒ limongolio ngota-ngota. Akiibatilio yito, dile bua mamoluwali palenta lodilelio wau dile lai̒ mamoingo to dilelio.

¹⁹ Masababu uito, amiaatia momolohone mai alihu ti Baginda mohama mao̒ putuusani deu̒ ti Olongia taabua Wasti diilalo mowali mai motaalua woli Baginda. Putuusani boito musi powaliyola wuu̒du lo Persia wau Media, alihu diila mowali muli pahutoolo. Lapatao̒ uito, huhuloa̒a li Olongia taabua Wasti wohia mao̒ ode taabua wewo talebe mopioheo̒ wolio.

²⁰ Wonu bolo putuusani li Baginda boito, malo loo̒poolo mola to ngoilanggubu bele biluloa̒ saaha li olongia u luasi botie, yi timii̒du dile bua mamohurumati dilelio, mopio kaya boli mosikini.”

²¹ Hihiile lei Memukani boito ilakolo li olongia wau tadudulaa̒ lo ulipu, yi ti olongia hua̒a loponao̒ mao̒.

²² Tio malolao mola tuladee palenta ode ngoa̒amila polopinsi lo bele biluloa̒ saaha li olongia, tinggai todelomo bahasa wau tuladio lo polopinsi. Palenta boito tingohio, deu̒ timii̒du diilea, dile lai̒lo tamusi mowali tau̒wa, wau tapaatuti mohama mao̒ totoonulalo putuusani.