ESRA 9 - KITABI HABARI MOPIOHE

Tei Esra lodungohu dudulohu pasali lou̒ nika uu̒ulauwa to wolota taulo Yahudi wau diila Yahudi

¹ Lapatao̒ ngoa̒amila boito piloponao̒ dengolo lota tahimuloa ulipu bangusa lo Isirai̒lu lonao̒ mai ode olau̒. Timongolio lopoo̒taao̒ deu̒ ulipu lo Isirai̒lu, leituoto mongo iimamu, wau tau-tauwalo Lewi tadiila helo halahu lonto babaa-ngusawalo tahi biluloa̒wa totili mao̒ leeto, deu̒yito-yito bangusa lo Amon, Moab, Masiri, Kanaa̒n, Het, Peris, Yebus wau Amori. Tumbao̒ mongo iimamu wau tau-tauwalo Lewi helohutu odito olo. Timongolio ngoa̒amila helohutu toonula huhutu kootoro u hepilohutu lo babaa-ngusawalo boito.

² Mongo lolai̒ lo Yahudi helonika wolo mongobua bangusa deli, tilinggula umati tolomodu miliki lo Eeya diilalo pulua. Tumbao̒ taleimulo daa̒ helohutu uito yito tahimuloa lo ulipu wau tahidihuma pantungo lo Isirai̒lu.

³ Loo̒dungohe sua̒li boito, wau̒ loraasa lolee̒e daa̒ tilinggula helo ngaidingao̒ pakeyangiu̒ wau lomahutao̒ huwoo̒ wau dangguu̒, tulusi lotihuloa̒a wolo hilaa u lotoyopu.

⁴ Wau̒ debo tulusi hulohuloa̒a odito dilimutu wakutu podewowalo bake lolaango. Lapatao̒ malonao̒ mai tau-tauwalo helomalita olau̒. Timongolio mailoohe loe̒ela mola aanjamu mai lo Allahu Taa̒ala lo Isirai̒lu todusa lotau-tauwala tamalo hualingai lonto polayahu boito.

⁵ Tou̒ bake lolaango tilumula hepodewolo, matilimihula mola wau̒ lonto tambati ilosukariyau̒ boito wolo pakeyangi ukai-kaidingo, wau̒ losujudu wau lohudu mola ulu̒u ode Eeya Allahu Taa̒alau̒.

⁶ Wau̒ maloloi̒ya, “Yaa Allahu Taa̒ala lo watotia, watotia botie moolito u lumanggela mola ode talu lo Eeya. Dusa lo mongowatotia malo hidenge-dengea toitaato lunggongo lo mongowatotia demola hulungo.

⁷ Tumulalo mai to jamani loluuhuru lo mongowatotia demai botia, mongowatotia umati lo Eeya mailodusa to Eeya. Uito sababuulio mongowatotia, mongo olongia wau mongo iimamu lo mongowatotia mai̒lolaahe lomongo olongia deli. Mongowatotia pilatelio yila-yilateelo mao̒, yilambatio wau dilelolio odelo tawalo. Mongowatotia mahilinaalio lopuli-pulitolo mao̒, debo odelo owowoluwoalio to dulahe botie.

⁸ Bo botia, yaa Eeyaa Allahu Taa̒ala lo mongowatotia, Eeya boheli ilomuura lohilao to mongowatotia. Eeya helo pobebasi mai dengolo lota to wolota lo mongowatotia lonto polowato u tumumulo wolo salamati to tambati u tolo-tolomodu botie. Eeya longohi mai tutumula bohu to mongowatotia.

⁹ Tou̒ mongowatotia donggo todelomo polowato, Eeya diila lololaa to mongowatotia. Eeya lohutu mai tomongo olongia lo Persia helo tolia̒nga to mongowatotia wau yiluasia luli lomongu mola Bele lo Eeya ubolo tuodio boito. Eeya helo duo̒lai to mongowatotia tewe, to Yehuda wau Yerusalemu.

¹⁰ Bo botia, yaa Eeya Allahu Taa̒ala, lapatao̒ totoonulalo uilowali mai boito wolo u mowali loi̒ya lo mongowatotia? Mongowatotia maluli lomalongao̒ totoonulalo palenta lo Eeya,

¹¹ uilohi mai lo Eeya ode mongowatotia lotimbulude tomongo nabi, mongo wato-Mu. Timongolio helo poo̒tai to mongowatotia deu̒ huta u mapoti biluloa̒ lo mongowatotia boito diila beresi sababu ngoilanggubu ulipulio lonto huudu ode huudu helohutu kootoro wau hina.

¹² Mongo nabi boito helodini to mongowatotia monika uu̒ulauwa wolo tau-tauwala boito, meaambo momantu olimongolio mowali maa̒amulu wau moa̒ahu. Wonu mongowatotia modungohe, mongowatotia molotola mola wau moo̒ lamitao̒ tilapulo huta boito wau mopowaarisi mola towali mai lo mongowatotia dilumutu ohiheo-hiheolo mao̒.

¹³ Mongowatotia mailodusa wau helo lambanga butoo̒ lo Eeya, wau Eeya malo hukumani mai mongowatotia. Bo otaawa lo mongowatotia, yaa Allahu Taa̒ala lo mongowatotia, deu̒ hukumani uilohi mai lo Eeya mai boito diila ngobuheto upaatuti tolimoo lo mongowatotia, tumbao̒ mongowatotia donggo pilopoa̒ahu mai lo Eeya.

¹⁴ Oditolio, diila pongalo aakali mongowatotia muli momalonga totoonulalo palenta lo Eeya wau monika uu̒ulauwa wolo tau-tauwalo tahileeta hileeta boito? Wonu mongowatotia mopohutu uito, tantulo mao̒ Eeya mamomuluka daa̒ tilinggula mongaantulu mai to mongowatotia sama-samaata wau diila mopoluli penu boli ngotaa mao̒ tatumumulo.

¹⁵ Yaa Eeya, Allahu Taa̒ala lo Isirai̒lu, Eeya aadili, penu boli odito Eeya helo poluli mai to mongowatotia tumutumulo. Mongowatotia motolongaku mai totala lo mongowatotia to Eeya; mongowatotia diila ohaku u motitalu mola ode aarasi lo Eeya.”