ESRA 4 - KITABI HABARI MOPIOHE

Pomongulalo Bele lo Eeya hemilarosa

¹ Habari deu̒ tau-tauwalo bakasi polayahu boito donggo hemomongu Bele lo Eeya, Allahu Taa̒ala lo Isirai̒lu, ilodungohe lomusu taulo Yehuda wau Benyamin.

² Sababu uito timongolio mota lodunggaya wolei Jerubabel wau mongo tau̒wa lokaumu, lapatao̒ loo̒owoli mao̒ odie, “Poluasia mai amiaatia modudua̒ momongu Bele lo Eeya boito, sababu amiaatia olo helo tiwato to Allahu Taa̒ala lomongo wutato, tutuuwauwa odelo wutato ngoa̒amilalo. Amiaatia laito hemopodewo bake olio tumulalo mai tei Esar-Hadon, olongia lo Asyur helodelo mai olamiaatia odia mai.”

³ Bo tei Jerubabel, tei Yesua wau mongo tau̒wa lokaumu boito lolametao̒, “Ami diila mei̒ bantu olimongoli u momongu bele ode Eeya Allahu Taa̒ala lami. Ami mamomongu mao̒ lohihilao lotuuu̒de wolo palenta lei Kores, olongia lo Persia, to olami.”

⁴ Lapatao̒ ulipu tamalo hiiheo lotibiluloa̒ tolipu boito malo polupuheo̒ sumaangati taulo Yahudi wau helo popoohe mao̒ olimongolio alihu pohuheli mao̒ limongolio u momongu.

⁵ Timongolio helosooroi̒ mao̒ tahidihuma pantungo lo pamalenta Persia alihu timongolio diila mopoo̒mata ranjana taulo Yahudi boito. Sua̒li boito debo pohupohutu ngotilonggadu pamalenta li Olongia Kores demola pamalenta li Olongia Darius.

Pomongulalo kota Yerusalemu pilopohuheli

⁶ To bohulo pamalenta li Olongia Ahasyweros, mumuu-suwaalo ulipu lo Yerusalemu wau Yehuda helongaibu mao̒ wolo tuladu.

⁷ Wau olo tojamani pamalenta lei Artahsasta, kaisari lo Persia, uilowali boito helonguli mola: tei Bislam, Mitredat, Tabeel, wau mongo sahaabati limongolio helo luladueo̒ tuladu odeli olongia. Tuladee boito hetiluladio todelomo bahasa lo Aram, wau musi tohuwaleelo tou̒ pobacaalo.

^8-9 Tei Artahsasta olo helolao tuladu pasali lo Yerusalemu. Tuladee boito yiloalio odeli Gubolonulu Rehum wolei Simsai dulutuli lo polopinsi wau hebilantua lomongo sahaabati limongolio, deu̒yito-yito mongo hakimu wau ngoa̒amila tahidihuma pamarenta lo Persia wewo taa̒saliilio lonto Erekh, Babel, wau Susan tolipu lo Elam,

¹⁰ wau olo babaa-ngusawalo wewo tamaa bilintao̒ lei Asnapar Taa Molamahu wau hepilei̒ tatapulio tokota Samaria wau kokoo-tawaalo wewo todelomo polopinsi lo Eprat Otolopa.

¹¹ Odie mola tinogohu tuladee boito, “Ode talu li Olongia Artahsasta, lonto mongo wato li Baginda tahi biluloa̒wa to Eprat Otolopa. Salamu.

¹² Bolo potala ti Baginda maa̒lumu, deu̒ taulo Yahudi tamalo lolaa mao̒ mamaa-dalawaalo wewo todelomo bele biluloa̒ saaha li olongia li Baginda, botia hitatapua to Yerusalemu wau donggo hemomongu poli kota moleeto wau ohilaa momintaa̒ tingolo boito. Timongolio malo lumula lomongu mola poli didii-ngingaalo meeselilio wau diilalo mohiheo lapato kalaja boito.

¹³ Wonu kota boito ohaasili muli bongulolo wau didii-ngingaalo meeselilio lapato potihulolo, yi ulipulio diilalo mohuto momaayari beya, lapatao̒ tilapulo bele biluloa̒ saaha li olongia makuulangi.

¹⁴ Amiaatia mai̒lo biloli aakali toli Baginda dan diila ohilaa momilohe oli Baginda poluhiolio. Sababu uito amiaatia moo̒owoli mai,

¹⁵ alihu ti Baginda mei̒ tulete mao̒ arasipu lomongo loluuhuru li Baginda. Sababu monto tuangio mao̒taawa mao̒ li Baginda deu̒ kota Yerusalemu memangi ohilaa momintaa̒ tingolo wau tumulalo mao̒ muloololio mai laito hemoo̒luhi tomongo olongia wau takawaasa lo polopinsi. Ulipulio laito susa atuluwolo. Uito sababuulio kota boito mai̒laantulu.

¹⁶ Oditolio, amiaatia yakini, deu̒ wonu bolo kota boito muli bonguloolo wau didii-ngingaalo meeselilio potihuloolo, ti Baginda diilalo mowali mongawasa mao̒ polopinsi Eprat Otolopa botie.”

¹⁷ Ti olongia luli lolao totameta botie, “Odeli Gubolonulu Rehumi wau Simsai dulutuli lo polopinsi, wau mongo sahaabati limongolio taa hibiluloa̒awa to Samaria wau kokoo-tawaalo wewo to polopinsi Eprat Otolopa. Salamu.

¹⁸ Tuladee uilao mai lomongo wutato matilohuwale wau pilobacalio mai olau̒.

¹⁹ Lapatao̒ to palentau̒ mapilei̒ tuleteu̒ mao̒, wau memangi ilobukuti deu̒ anggadu muloololio mai Yerusalemu laito hemoluwali kawasa lomongo olongia wau dadaata to wolota ulipulio yito tahe lomintaa̒ tingolo wau tamoo-tolonggaloa.

²⁰ Pee̒enta mongo olongia tahi lootola buheli helo malenta mola teto wau longawasa mao̒ ngoilanggubu polopinsi lo Eprat Otolopa wau helo ponao̒ beya wau doi hulawa wau uwewolio uwaajibu pomayari odeli olongia.

²¹ Sababu uito, polualaalo mota palenta, u mopohuheli mao̒ kalaja lotau-tauwala boito, alihu kota boito diila mao̒ bongulolio poli tunggula wau̒ mongohi mai palenta wewo.

²² Ponao̒wa mao̒ palentau̒ boito wolo molamemeto alihu diilalo oduhenga mola oluuhiu̒!”

²³ Lolamemeto tou̒ tuladu lei Artabsasta boito pilobacalio mao̒ odelei Rehum, Simsai wau mongo sahaabati limongolio, malo monggato timongolio ode Yerusalemu wau helomakusa taulo Yahudi lopohuheli mao̒ kalaja u muli momongu mola kota boito.

Pomongulalo Bele lo Eeya luli tilumula

²⁴ Kalaja Bele lo Eeya mapilopo huheli wau diilalo tilolonga demola taunu oluolio pamalenta lei Darius, olongia lo Persia.