DANIALI 9 - KITABI HABARI MOPIOHE

Tei Daniali helodua̒ ode bangusaalio

^1-2 To taunu bohulio pamalenta lei Dairus taulo Media, walao̒ talolai̒ lei Ahasyweros to yilaidia lo Babel, watia Daniali, helo pobaca bubuu-kuwaalo agama. Watia lotipoo̒yo lomikiilangi mola, deu̒ modudua̒ao̒ tahuda lo Eeya odeli Nabi Yeremia, kota lo Yerusalemu debo mabinasa ngotilonggadu pitu lopulu lotaunu mola.

³ Lapatao̒ malodua̒ mola watia lou̒ tio̒otutua ode Eeya Allahu Taa̒ala, wau lomohone odehu hilaa-Lio. Watia olo helopuasa wau lomake kaingi kado wau lotihuloa̒ toitaato peaahuo̒.

⁴ Totoonulalo dusa lobangusa lowatia hei̒laku lowatia to Eeya Allahu Taa̒ala lowatia. Loi̒ya lowatia, “Eeya Allahu Taa̒ala, Eeya udaa̒, wau mongowatotia mohulumati to Eeya. Eeya laito moe̒ela mai daantia lo Eeya wau hemo pobilohei ponu lo Eeya udiila opulitio ode limongolio tamo tolia̒nga to Eeya wau hemohutu wolo u pomalentai lo Eeya.

⁵ Mongowatotia mai̒lodusa, mongowatotia malohutu u moleeto, wau helohutu totala. Mongowatotia malo mintao̒ tingolo wau helo lambanga palenta lo Eeya wau helolahi lonto wuwuu-uduwaalo Eeya.

⁶ Mongowatotia diila lodungoheo̒ tomongo nabi mongo wato lo Eeya boito, tamalo bisala mai totanggulo Eeya ode mongo olongia lo mongowatotia, ode mongo tau̒wa, mongo loluuhuru wau ode ngoa̒amila bangusa lo mongowatotia.

⁷ Oo Eeya, huhutu lo Eeya laito tuhaata wau aadili, bo mongowatotia laito hemo potoduo mai wolito tobatanga lo mongowatotia deu̒yito-yito ngoa̒amila tahi biluloa̒wa to Yudea wau to Yerusalemu wau ngoa̒amila taa ngobangusa lo mongowatotia tamaa pilopo loo̒opo lo Eeya ode lilii-puwaalo u molamingo wau u meembide masababu timongolio diila tatapu wau molotolo hilao to Eeya.

⁸ Mongo olongia lo mongowatotia, mongo tau̒wa wau nenemoya lo mongowatotia malohutu susuu-aliyaalo u loo̒olito wau mai̒lodusa to Eeya.

⁹ Eeya polupolu lopongo ngambungu wau odehu hilao, eleponu mongowatotia malo luwali to Eeya.

¹⁰ Mongowatotia diila helo dungohe suala lo Eeya, oo Eeya Allahu Taa̒ala lo mongowatotia, tou̒ piloa̒hu lo Eeya mongowatotia tumumula modudua̒ bubuu-too̒waalo u mailohi mai lo Eeya ode mongowatotia lotimbulude to mongonabi, mongowato lo Eeya boito.

¹¹ Ngoilanggubu Isirai̒lu malo lambanga bubuu too̒waalo Eeya wau diila lohuto helo dungohe suala lo Eeya. Mongowatotia mai̒lodusa to Eeya, wau sababu uito pilopo dungga mai lo Eeya ode mongowatotia laa̒anati u malei tuladee todelomo Buku lei Musa, wato lo Eeya.

¹² Eeya lohutu mai tiluhaata debo odelo u mapilo danti mai lo Eeya ode mongowatotia wau ode tahi kawasawa lo mongowatotia. Yerusalemu maa hilukuumani lo Eeya lebe moo̒ohuu̒ wolo kota penu boli tou̒toonu todunia botie.

¹³ Totoonulalo baala utula-tuladee todelomo Butoe̒e Musa mapilopo lemba mai lo Eeya ode mongowatotia. Bo eleponu odito, oo Eeya Allahu Taa̒ala lo mongowatotia, mongowatotia debo donggo hemo potouli wambai̒o u mopo sanangi hilaa lo Eeya. Mongowatotia debo diila mohuto mololaa duduu-sawaalo mongowatotia wau diila mohuto olo mopoo̒ tuotao̒ popoo-ngaajaliyalo Eeya.

¹⁴ Eeya, oo Eeya Allahu Taa̒ala lo mongowatotia, malo hukumani mai to mongowatotia wolo baala u mapilo dapato lo Eeya; huhutu lo Eeya laito tuhaata wau aadili, bo mongowatotia diila modungohe suala lo Eeya.

¹⁵ Oo Eeya, Allahu Taa̒ala lo mongowatotia, Eeya malopo bilohei kawasa lo Eeya wolo lodelo umati lo Eeya yilumualai lonto Masiri, wau kawasa lo Eeya boito debo donggo tolo eela. Mongowatotia mai̒lodusa wau helohutu totala.

¹⁶ Eeya malo poduulua to mongowatotia tojamani muloololio mai, sababu uito diilalo mao̒ mulukai Yerusalemu, kota lo Eeya lohihilao, huludu Eeya u mantali. Masababu dusa lo mongowatotia wau ololeeto li nenemoya lo mongowatotia, yi ngoa̒amila taa u topalito lo mongowatotia momilohe dupa-dupapa Yerusalemu wau to umati lo Eeya.

¹⁷ Oo Allahu Taa̒ala lo mongowatotia, dungohilo mai dua̒ wau polohone lowatotia. Pongulia mai bele lo Eeya u mailantulu boito, poo̒pioheelo alihu otaawa lotaa ngoa̒amila deu̒ Eeyaalo Allahu Taa̒ala.

¹⁸ Dungohilo mai mongowatotia oo Allahu Taa̒ala, bilohiilo mongowatotia wau poo̒tuotalo mai polodutolo mongowatotia wau obobinasa lokota u ilunte wolo tanggulo Eeya. Mongowatotia modua̒ mola ode Eeya diila sababu jajaa-sawaalo mongowatotia, bo sababu Eeya polupolu lo odehu hilao.

¹⁹ Oo Eeya, dungohilo mai mongowatotia, wau ambungua mai mongowatotia, poo̒tuota mai mongowatotia wau hua̒a pohutualo mai! Diila mao̒ pohiiheo, alihu otaawa lotaa ngoa̒amila deu̒ Eeyaalo Allahu Taa̒ala. Sababu Yerusalemu wau umati lo Eeya yito miliki lo Eeya utolo-tolomodu.”

Jibrai̒lu lotombangai lamalani boito

²⁰ Watia tulusi helodua̒ mola wau longaku dusa lowatia wau dusa lo bangusa lowatia Isirai̒lu, wau lomolohone mola ode Eeya Allahu Taa̒ala lowatia u moponguli mao̒ bele lo Eeya u mantali.

²¹ Tou̒ donggo hemodua̒, Jibrai̒lu tamaa iloontonga lowatia mao̒ todelomo bibilohu lowatia u muloololio mai boito lowatia, tilumombotai ode mantahuu̒. To saaa̒ti boito wakutuulio lotau mopodewo bake lolaango.

²² Lapatao̒ Jibrai̒lu lotombangai odie, “Daniali, wau̒ monao̒ mai momantu olemu u momaahamu laamalani boito.

²³ Tou̒ yio̒ lolumula lomolohone mola ode Allahu Taa̒ala, Eeya lolametai. Wau̒ lonao̒ mai mopo tunggulao̒ uito sababu Eeya momonu olemu. Naa, dungohiilo mopio-piohulo mao̒ tou̒ wau̒ donggo hemo tombangai boli lo bibilohe boito.

²⁴ Poo̒opitu piu̒wa pitu lopulu lotaunu mola yito maasa u tilantu lo Allahu Taa̒ala u molopato bangusaamu wau kotamu umantali boito monto dusa wau ololeeto. Totoonulalo dusa maa ambunguolo wau oa̒adili u ohiheo-hiheolo mao̒ mapotihulolo, tilinggula bibilohe wau laamalani boito mamowali moi̒laalo, wau Bele lo Eeya umantali boito mamuli motaa̒luku wau mohulumati to Eeya.

²⁵ Tuladeelo wau pahamualo utie: Poo̒opitu piu̒wa pitu lotaunu mola mamopaluto, tumulalo mai tou̒ yilualio palenta u muli momongu Yerusalemu, tunggula meidungga mai ngotaalio tau̒wa tatulaoto lo Allahu Taa̒ala. Ngotilonggadu poo̒opitu piu̒wa wolomo pulaa dulo taunu mola dadaa-lalaala wau bibii-ntengiyalo lo Yerusalemu mamuli bongulolo, bo tou̒ boito polupolu lou̒ suukali.

²⁶ To pulitio lomaasa boito tau̒wa tatilulaoto Allahu Taa̒ala boito mapateelio mate-mateelo mao̒, lebe-lebe pomao̒ tio diila ototala. Yi meidunggalo mai suludadu ngota li olongia tamolotolo, tulusi mongantulu kota Yerusalemu boli Bele lo Eeya. Pulitio lojamani boito mamei dungga debo odelo taluhee daa̒ u mopotoduo mai popaatea wau obobinasa, debo odelo u matilantu mai lo Allahu Taa̒ala.

²⁷ Ti Olongia boito mamohutu daantia motoheeto wolo taa dadaata ngotilonggadu pitu lotaunu mola. To tomutaao̒ lomasa boito, tio mamopo huheli powoluwoolio bake wau podewo. Lapatao̒ hitua-tuawua u moo̒tihela hapato u iluntee ololeeto umopo aantulu mapo tambatilio to Bele lo Eeya wau madebo woluo mola teto tunggula tio tau̒ pilo-tambatilio mota teto odungga lou̒ obobinasa u matilantu mai lo Allahu Taa̒ala olio.”