DANIALI 8 - KITABI HABARI MOPIOHE

Bibilohe lei Daniali tomimbihu himba ulai̒ wau batade ulai̒

¹ To taunu otolulio pamalenta li Olongia Belsaasar, watia loo̒toduo mai bibilohe oluolio.

² To bibilohe boito ilodungga lowatia batanga lowatia to polopinsi Elam, to Susan, tiilo lokota Persia. Watia tihutihula totili lodutula Ulai,

³ wau totili lodutula oontonga himba tuwau otunge mohelu duluo huhuulayaa̒, u tuwau lebe hayahaya wau lebe bohu wolo uwewo.

⁴ Iloontonga lowatia himba ulai̒ boito lolunge ode mantahu otolopa, tilayo wau huliaalio. Diaaluo penu boli binatangi tuwau mao̒ uloo̒ taahangi lotaaluo wolo binatangi boito meaalo lolopato lonto kawasa lo binatangi boito. Binatangi boito helohutu totoonulalo u otohilaalio wau lowali sombongi.

⁵ Tou̒ watia donggo hemomilohe olio, iloontonga batade ulai̒ tuwau tete-teteea̒i lonto ambahu otolopa lotibaya dunia. Moo̒ohuu̒ daa̒ teteei̒o tilinggula oa̒atio diila leidedeta tohuta. To wolota lomatolio duluo otunge tuwau u wuduwudu.

⁶ Batade ulai̒ boito lohimbideo̒ himba ulai̒ u iloontonga lowatia tobiihu dutulaa boito, lapatao̒ loluhu ode mantahio wolo pala-palangi.

⁷ Piloo̒tuoto lowatia tio loluhu himba ulai̒ boito. Tio odito lilalilau tilinggula hilungangio himba ulai̒ boito udiila o lotoolo u moluwali. Tio leipomahula mola ode huta, wau yilu-yilumbetai̒o, wau diaaluo penu boli ngotaa mao̒ taloo̒ tuulungi olio.

⁸ Batade ulai̒ boito helebe udaa̒ mola. Bo tou̒ tio leidungga to pulito lo okokawasaalio, maloboli tungelio ulei̒daa̒ boito, tulusi to tambati boito lobutu mai tunge mohelu wopato u wuduwudu, tinggai hitunuwa ode mantahu u hiwewo-wewooa.

⁹ Monto tala tuwau lotunge boito malobutu mai tunge mooyoto, u lowali iludamanga daa̒ wau okokawasaalio loluasi ode mantahu huliaalio, ode mantahu tiimuru, ode mantahu huta ugaaga daa̒.

¹⁰ Tunge boito lowali helebe damangaa mola tunggula lotuuheta lotolio u loluhu suludadu losologa deu̒yito-yito popoo-liyamaalo, tumbao̒ dengolo to wolotalio pilomahulio mola ode huta wau yilu-yilumbetai̒o.

¹¹ Tumbao̒ tio helo tehengi eyaanggu suludadu losologa, lopohuheli bake podewo timiidu dulahu u podewolo odeli eyaanggu boito, wau lopo loloohubeo̒ bele pototabiaalo ode olio.

¹² Lapatao̒ tau-tauwalo mola teto mai̒lodusa wau diila lopodewo babaa-keyaalo u pilopo wajibu boito. Yi tabia u otutu mapilo mahulio mola ode huta. Tunge boito otilapulo todelomo ngoa̒amila huhutuulio.

¹³ Lapatao̒ ilodungohe lowatia ngotaalio lo malai̒kati loloi̒ya ode uwewo, “Tunggula dengolo mao̒ hiheolio ngoa̒amila u oo̒onto todelomo bibilohe boito mapohu-pohutu? Tunggula omolua dusa ulei̒daa̒ boito moluloa̒ao̒ bake timii̒du dulahu? Tunggula omolua suludadu losologa wau bele potabiaalo boito lumbe-lumbetaa̒lo?”

¹⁴ Ilodungohe lowatia malai̒kati ungota poli lolametao̒, “Tunggula ngolihu wau ngohetuto limo lopulu hui mola poli. Ngotilonggadu uito bake lolaango wau bake dumodupo diila podewolo. Lapatao̒ uito bolo bele potobiaalo mapo nguliyolo.”

Malai̒kati lo Jibraai̒lu lotombangai bibilohe boito

¹⁵ Tou̒ watia donggo hemo tolopani u momaahamu mao̒ boli lo bibilohe boito, debolo tilimihulai totalu lowatia u hitua-tuawau debo odelo manusia.

¹⁶ Ilodungohe lowatia suala u longiibodei to ngotuali lo Dutulaa Ulai, ualio mao̒, “Jibraai̒lu, tombangaalo mao̒ olio bibilohio boito.”

¹⁷ Lapatao̒ Malai̒kati Jibraai̒lu tatihu-tihula totalu lowatia boito lohimbidei olaatia. Watia mailoohe daa̒, tilinggula loombahulo mola. Ualo Jibraai̒lu olaatia, “Wuu manusia panaa, musi otaawamu mao̒ deu̒ bibilohe boito yito tomimbihu pulito lojamani.”

¹⁸ Tou̒ Tio donggo hemobisala, watia diilalo lotota lou̒ tau. Bo Tio lodihu olaatia wau lomantu olaatia luli tilimihulo. Lapatao̒ tio loloi̒ya,

¹⁹ “Wau̒ mamo poo̒taa mai olemu wolo u demaa motoduo mai odelo akiibati omuluka lo Allahu Taa̒ala. Sababu bibilohumu boito mopotuhata mai ode pulito lojamani.

²⁰ Himba ulai̒ u iloontongamu boito, u otunge mohelu duluo mopobayahei yilaidia lo Media wau Persia.

²¹ Batade ulai boito mopobayahei yilaidia lo Yunani, wau tunge u wuduwudu towolota oluo lo matolio boito yito ti olongiaalio tabohulio.

²² Opato tunge u yilumonggu mai lapatao̒ tunge bohulio boito loboli, boliilio deu̒ yilaidia lo Yunani mamowali hitaya-tayaade wopato yilaidia, bo penu boli tuwau mao̒ diaaluo u molotolo debo odelo lotolo yilaidia ubohu-bohulio boito.

²³ Tou̒ mameembidu mopulito yiyii-laidiyalo boito, wonu bolo ololeeto malo malitutua̒i, yi malumenetai olongia ngota tabaa-angiola, wau motota mohimbulo.

²⁴ Tio mamowali molotolai daa̒, bo diila sababu olootolio lohihilao. Tio mamopo dungga mai lo obobinasa u moo̒tihela hapato wau wolo wambai̒o u pohutuolio mao̒haasili. Tio mamopo binasa tau-tauwalo tahi lootola wau umati lo Allahu Taa̒ala.

²⁵ Sababu tio o dadaata aakali u moleeto. Ngoa̒amila dudelo huhutu yimbulolio mao̒haasili. Tio mamopo sombongi batangalio, wau lou̒ diila mopoe̒ela meimulo deu̒ tio mamopo binasa taa dadaata. Tumbao̒ tio buheli moluwali Olongia Taa Laba-labaalo udaa̒. Bo tio maa̒ntuluolio lou̒ diila wolo olootolo manusia.

²⁶ Bibilohe pasali lobake lolaango wau dumodupo umaa tilombangai olemu boito, otu-otutuulo mao̒ mamotoduo mai. Bo ngoa̒amila boito mamotoduo tomaasa utalu-talu mai u donggo molaminga mola; oditolio diila mao̒ silitaawa penu boli to ngotaalio.”

²⁷ Lapatao̒ watia molaasa molulupuhu tulusi malo ngongoto dengolo hui mola hiheolio. Lapatao̒ uito malobongu mola watia wau luli loponao̒ tutuu-gasiyaalo laatia odeli olongia. Bo watia balilsa lomikiilangi mola bibii-bibiilohe boito wau diila loo̒ paahamu mao̒.