DANIALI 6 - KITABI HABARI MOPIOHE

Tei Daniali pilopo tuotio ode delomo gowa singa

¹ Lapatao̒ tei Belsaasar ilopatealio yila-yilateelo mao̒, tei Darius taulo Media lohehu tambati huhuloa̒ li olongia lo bele biluloa̒ saaha li olongia. Tou̒ boito tio o umulu wolomo pulaa dulo taunu.

² Tei Darius lolayadeo̒ yilaidiaalio ngohetuto dulo pulu lo polopinsi u tinggai pilalentaalio li gubolonulu ngota.

³ Tei Daniali wau duulota wewolio piludui̒o u mongimato mao̒ to guguu-bolonuluwalo boito alihu ti olongia diila mao̒ moluhi.

⁴ Hua̒a loilaalo mai deu̒ kalaja lei Daniali lebe mopioheo̒ wolo kalaja lo guguu-bolonuluwalo wau tahi pongimatoa wewolio. Sababu uito, ti olongia ilohilaa momudua̒o̒ olio mowali tao̒kawasa to ngoilanggubu lo bele biluloa̒ saaha li olongia.

⁵ Bo guguu-bolonuluwalo wau tahi pongimatoa boito helo tolopani u mololoohe totoo-talawaalo lei Daniali to delomo tuugasi lo pamalenta, bo diila ilodungga limongolio, sababu tei Daniali tatapu wau molotolo hilao boli juujulu wau diila helo malonga meaala lohutu totala penu boli wolo wambai̒o.

⁶ Lapatao̒ timongolio loloi̒ya, “Ito bo moo̒dungga totalaa lei Daniali todelomo sua̒li u aa̒aita wolo agamalio.”

⁷ Lapatao̒ malonao̒ pee̒-pee̒entalo mao̒ timongolio mota lotaalua woli olongia wau loloi̒ya mao̒, “Yaa Tuani lo watotia Olongia Dairus, pomali tutuo̒olo mola Tuani lo watotia u ohiheo-hiheolo mao̒!

⁸ Mongowatotia ngoa̒amila tahe longuulusi bele biluloa̒ saaha li olongia li Tuani lo watotia, mopio tahi pongimatoa, guguu-bolonuluwalo wau tahidihima pantungo lo ulipu uwewo, malo heeluma u modudulai alihu ti Tuani lo watotia mopolualao̒ tuladu palenta u musi dungoheelo lou̒ tio̒otutua. Wajibulio ti Tuani lo watotia momalentao̒ alihu ngotilonggadu tolo pulu hui mola diaaluo penu boli ngotaa mao̒ poluwasiyola mopo tunggulao̒ lo polohone ode tala tuwau lo dewa meaambo ode manusia, ngopohia odeli Tuani lo watotia lohihilao. Titaalo tita tamo lambangao̒ palenta boito mapo mahuloola ode delomo gowa losinga.

⁹ Mongowatotia momolohone alihu ti Tuani lo watotia mopodutu mao̒ pali lo uluu̒ totuladu palenta boito alihu mowali wuwuu-uduwaalo lo Media wau Persia u diilalo mowali pahutolo.”

¹⁰ Yi ti Olongia Dairus malo podutu mao̒ pali lo uluu̒ totuladu palenta boito.

¹¹ Tou̒ tei Daniali loo̒dungoge sua̒li boito, malo hualinga tio ode belelio. Huwalilio u to bele-belea to yitaato o otutuu-tutulowalo utalutalu ode mantahu Yerusalemu. Wau debo odelo biasaalio, tio hemoduo̒ ode Allahu Taa̒alaalio wau hemomuji Olio poo̒otolu ngohui wolo motibonggohuu̒ mola totalu lo tutuu-tutulowalo u huo̒huo̒o boito.

¹² Tou̒ mumuu-suwaalo lei Daniali loo̒onto olei Daniali donggo hemodua̒ ode Allahu Taa̒alaalio,

¹³ malonao̒ timongolio ngoa̒amila lotaalua woli olongia mota lopoduloheo̒ olei Daniali. Timongolio loloi̒ya mao̒, “Diila maati Tuani lo watotia talo podutu mao̒ pali lo uluu̒ totuladu palenta u lodini ngoa̒amila tau ngotilonggadu tolo pulu mola hui botie mopotunggula polohone ode tala tuwau lodewa meaambo manusia ngopohia odeli Tuani lo watotia wambao̒? Wau olo, deu̒ titaalo tita tamo lambanga palenta boito mapo mahuloolo ode delomo gowa losinga?” Ti Olongia lolametao̒, “Memangi, wau palenta boito malowali wuwuu-uduwaalo lo Media wau Persia u diilalo mowali pahutolo.”

¹⁴ Lapatao̒ uali mongolio odeli olongia, “Tei Daniali, tala ngota lo tapilo layahu lonto Yehuda, diila lomandungi li Tuani lo watotia, wau lopodiaalu palenta li Tuani lo watotia. Tio hemodua̒ wolo aa̒atulu poo̒otolu ngohui.”

¹⁵ Loo̒dungohe uito ti Olongia lowali siluukali lohilao wau lolawalo, tilinggula tio lopeehu aakali u mopoa̒ahu olei Daniali. Tunggula lolaangio mola ti olongia debo donggo hemotolo mikiilangi mola.

¹⁶ Lapatao̒ tau-tauwala boito luli mai lotaalua woli olongia wau loloi̒ya, “Tuani lo watotia, wajibulio ti Tuani lo watoyia moe̒elao̒ deu̒ modudua̒ wuu̒du lo Media wau Persia, palenta u yiluwali li olongia diila mowali boli-bolio̒olo.”

¹⁷ Yi pulitio mao̒ ti olongia malei̒ wau̒upao̒ olei Daniali wau pilomahulio ode delomo gowa losinga. Uali mongolio odelei Daniali, “Hileaala dua̒ Allahu Taa̒alamu tahe tuboomu wolo tatapu wolo molotolo hilao boito mopoa̒ahu mai olemu.”

¹⁸ Lapatao̒ uito botu tuwau ulei̒daa̒ polopodutulio mao̒ tongango logowa boito, wau cilapua mao̒ li olongia botu boito wolo capu lo bele biluloa̒ saaha li olongia wau capu lotaduduulaa̒ lolipu, tilinggula diaaluo penu boli ngotaa mao̒ tamowali molopata olei Daniali monto sisii-ngawaalo.

¹⁹ Lapatao̒ ti olongia malo hualinga mota ode bele biluloa̒ saaha li olongia. Tio diila mohuto molamela meaalo liyangolo. Wau ilo-iloonua tio diila loo̒tuluhu.

²⁰ Tou̒ masubu mai malobongu ti olongia wau hua̒a lonao̒ mota ode gowa losinga.

²¹ Tou̒ leidungga mola odito, tio malo ngiibode wolo suala uwohe-wohe, “Daniali wato lo Allahu Taa̒ala tatumu-tumulo! Wolo Allahu Taa̒alamu tahe tuboomu wolo tatapu wau molotolo hilao boito malowali lopoa̒ahu olemu lonto sisii-ngawaalo boito?”

²² Lapatao̒ ilodungohelio suala lei Daniali u lolametai, “Pomali tutuo̒olo mola Tuani lo watotia u ohiheo-hiheolo mao̒!

²³ Allahu Taa̒ala lo watotia malolao mai malai̒kati-Lio u lolau̒ubeo̒ tunggilo sisii-ngawaalo boito tilinggula sisii-ngawaalo boito diila lodangapa olo watotia. Allahu Taa̒ala lopoa̒ahu mai olo watotia sababu otaawa lo Allahu Taa̒ala deu̒ watotia diila helohutu totala to Allahu Taa̒ala wau odeli Tuani lo watotia.”

²⁴ Donggo boli sanangi hilaa li olongia wau tio lomalentao̒ lei̒ lualai olei Daniali lonto gowa boito. Lapatao̒ palenta boito pilohutulio mao̒, malo ilaala deu̒ diaaluo pali penu boli ngoi̒di mao̒ to olei Daniali, sababu tio palacaya lo Allahu Taa̒alaalio.

²⁵ Lapatao̒ ti olongia lomalentao̒ tau alihu moheu̒u totau-tauwalo tamalo podulohei. Tulusi timongolio wolo mongo walai̒o wau mongodile taabua limongolio pilomahulio ode delomo gowa losinga boito. Tou̒ timongolio diipo leidungga mola ode delomo wamoo̒ logowa boito, sisii-ngawaalo malo dangapo olimongolio wau lopotoyopo tulali mongolio.

²⁶ Lapatao̒ uito ti Olongia Dariusi maa lolao mola tuladee ode tau-tauwaala lonto totoonulaalo bangusa, suku bangusa wau bahasa to ngoilanggubu lo dunia, “Salamu sojahtera!

²⁷ Wau̒ momalentaao̒ ode ngoa̒amila taa u to madala lo yilaidiaau̒ alihu moohe wau mohurumati to Allahu Taa̒ala taahe tuboo lei Daniali! Tio yito Allahu Taa̒ala taa tumu-tumulo o hiiheo-hiiheolo mao̒, tunggula pulito jamani momalenta. Yilaidiaa-Lio diila taa binaasa. Olotoo-Lio diila taa o pulitio.

²⁸ Tio mopoa̒ahu wau mopobeebasi, mohutu muu̒jisati wau u moo̒linggolabe to hulungo boli to dunia. Tei Daniali maa piloposalaamati-Lio mao̒, lonto dangapio lo sisiingawaala.”

²⁹ Odi-odieelo mola tei Daniali debo o huhuloa̒ u lai-laia̒a ngotilonggadu pamalenta lei Dairusi wau pamalenta lei Koresi tau lo Persia boito.