DANIALI 5 - KITABI HABARI MOPIOHE

Ti Olongia Belsaasar walao̒ talolai lei Nebukadnejar lopowoluo potihunggu

¹ Tou̒ dulahee tuwau ti Olongia Belsaasar loloduo ngolihu lota taduduulaa̒ lolipu lonao̒ mai ode potihunggulio u dadaata ngoa̒amilalo, wau mimii-numaniyalo angguru.

² Tou̒ timongolio donggo hipongiluma, tei Belsaasar lomalentao̒ u lohama mai mamaa-nggowaalo hulawa wau talaa̒, umaa yilambatai lei Nebukadnejar, tiyamolio, lonto delomo Bele lo Eeya to Yerusalemu. Makusudu li Olongia Belsaasar, yito alihu taduduulaa̒ lolipu, mongo dilelio, mongo pipiaalio wau tio lohihilao mongilu monto mamaa-nggowaalo boito.

³ Hua̒a dilelolio mai mamaa-nggowaalo boito ode olio, lapatao̒ timongolio ngoa̒amila malongilu lonto pakaakasi lo minumani boito.

⁴ Sambela hipongiluma timongolio hipomuji-mujia dedeewaalo u pilohutu lonto hulawa, talaa̒, tombaha, ayu wau botu.

⁵ Debolo iloontongalo mai uluu̒ lomanusia u loluladeo̒ hitua-tuwaua to dingingo meeseli lobele biluloa̒ saaha li olongia totambati u mobaango daa̒ otuhata lotinelo tohe, tilinggula ti olongia loo̒onto mao̒ lou̒ mopatato.

⁶ Tio malo tambuti daa̒, wau yiloohe daa̒ tilinggula huu̒lio hulu-huluhelio.

⁷ Wolo longuatia̒a mota tio lohile mai alihu tahi ahaalio lo nujumu, ahali lo tataa-heyaalo uilaapali mowali mopotoduo olootolo gaibu wau ahali lo poliyama monao̒ mai. Tou̒ timongolio leidungga mai, ti olongia loloi̒ya mao̒, “Titaalo tita tamoo̒ pobaca mao̒ utula-tuladee boito wau mopoo̒taa mai olau̒ boliilio, mawohiyalo pakeyangi lo yilaidia jumba lailoumu wau lante tuotio ohulumati. Wewolio mao̒ leeto tio mapuduo̒ou̒ mowali tao̒kawasa otolulio todelomo yilaidiaau̒.”

⁸ Ngoa̒amila tahua̒a mongalati wau motota mololohe dalalio lodiambanga lomaju, bo diaaluo penu boli ngotaa mao̒ limongolio taloo̒ pobaca utula-tuladee boito meaalo lopoo̒taa mao̒ odeli olongia boliilio.

⁹ Ti Olongia Belsaasar lebe yiloohe wau luli lotambuti; wau olo taduduulaa̒ lolipu malolingu daa̒.

¹⁰ Loo̒dungohe wuwa-wuwaatio̒ li olongia wau taduduulaa̒ lolipulio, tiilo li olongia tilumuwoto ode delomo huwali leidaa̒ lo potihunggu. Lapatao̒ tio, loloi̒ya mao̒, “Pomali-tutuo̒olo mola Tuani lowatotia ohiheo-hiheolo mao̒! Poduo̒taalo mola hilaa li Tuani lowatotia wau diila mao̒ otambuti.

¹¹ Sababu todelomo yilaidia li Tuani lowatotia woluo talolai̒ ngota tapolu-polu lorohu dedeewaalo u mantali. Tomaasa pamalenta liyamo li Tuani lowatotia, tau boito mailo bukuti opongotota, ohuhama wau ohikimati, udebo odelo hikimati lo dedeewaalo. Tiyamo li Tuani lowatotia ti Olongia Nebukadnejar malo mudua̒ao̒ olio lowali tau̒wa lotahi ahaalia momilohe paladu lomanusia, ahali lo tataa-heyaalo uilaapali mowali mopotoduo olootolo gaibu, tau-tauwalo tahi o ilimua wau ahali lo poliyama.

¹² Tio laba-labaalo motoloo̒ wau molinepo boli ahali todelomo motombanga tohilopo, momuo̒ hitua-tuawua u milakusudu hetuuo̒lo wau mololohe aakali to susuu-aliyaalo u mototolo. Tanggulio tei Daniali, bo ti olongia longunte olio Belsaasar. Pei̒ tiangaalo mai tio. Tio mamopoo̒taa mai odeli Tuani lowatotia wolo boliilio lou̒ tulatuladee botie.”

Tei Daniali lotombangao̒ boli lou̒ tulatuladee boito

¹³ Wolo lolamemeto tei Daniali dilelolio mai lotaalua woli olongia. Lapatao̒ malohintu ti olongia olio, “Yio̒-yio̒olo tei Daniali, taulo Yahudi pilolayahu, tamaa bilintaa̒ai liyamau̒ lonto huta lo Yehuda?

¹⁴ Ilodungoheu̒ deu̒ yio̒ polupolu wolo roroo-huwaalo dewa u mantali, wau deu̒ yio̒ opongotota, ohuhama, wau ohikimati upolu-polutuo̒.

¹⁵ Ngoa̒amila tahua̒a mongalati wau motota mololohe dalalio wau tahi ahaalia lo tataa-heyaalo uilaapali mowali mopotoduo olootolo gaibu malo himontala lopobaca mao̒ utula-tulade botie wau lopoo̒taa mai ode olau̒ boliilio. Bo timongolio diila loo̒wali.

¹⁶ Boheli ilodungoheu̒ mao̒ deu̒ yio̒ mowali momuo̒ totoonulalo hitua-tuawua u milakusudu hetuuo̒lo wau mololohe aakali to susuu-aliyaalo u mototolo. Wonu yio̒ mowali moo̒ pobaca mao̒ utula-tuladu botie wau mopoo̒taa mai olau̒ boliilio yio̒ mawohiyau̒ pakeyangi lo yilaidia debo odelo jumba lailumu wau buo̒ohu hulawa tuoto ohulumati. Wewolio mao̒ leeto yio̒ mapuduo̒ou̒ mowali tao̒kawasa otolulio todelomo yilaidiaau̒.”

¹⁷ Tei Daniali lolametao̒, “Tuani lo watotia diila palalu mongohi mai papaa-laseniyalo boito ode watotia, wohiyalo mao̒ ode taa wewo. Watotia mamopobaca mai utula-tuladee boito odeli Tuani lowatotia wau mopoo̒taa mai boliilio.

¹⁸ Allahu Taa̒ala Taa Laba-labaalo molanggato lohutu mai olei Nebukadnejar, tiyamo li Tuani lowatotia olongia udaa̒ wau longohi olio odudaa̒ wau omasaahulu.

¹⁹ Tio odito udaa̒alio, tilinggula tau-tauwalo lonto totoonulalo bangusa, suku bangsua, wau bahasa, hilumuhela wau moohe olio. Wonu tio ohilaa momate tau mate-mateelo mao̒, pateelio wambao̒ tau boito mate-mateelo mao̒. Wonu tio ohilaa mopoa̒ahu tahingota-ngotawa, poa̒ahuwolio tau boito. Tio mopolaio̒ meaalo mopodupapa penu boli tatoonu wambai̒o modudua̒ u kahandakiolio.

²⁰ Bo tou̒ tio lowali sombongi, baaa̒ngiola wau parangiola, tio yilinggilio lonto tambati huhuloa̒ li olongia lo yilaidialio tilinggula tio iloolia lo odudaa̒alio.

²¹ Tio pilopolahi lonto ulipu lomanusia wau aakalilio lowali debo odelo aakali lo binatangi. Tio tilumumulo wolo kolodai lo oa̒ayua, yilongaa huo̒yota debo odelo sapi wau lotuluhe to tanalapa u huo̒huo̒o tilinggula bilata lo wambulo. Pulitio mao̒ tio lomasisi deu̒ Allahu Taa̒ala Taa Laba-labaalo molanggato okawasa to yilaidia lomanusia wau yilaidia boito yilohilio ode titaalo tita wambai̒o tatilulao-Tio.

²² Bo walao̒ talolai̒lio, deu̒yito-yito ti Tuani lowatotia lohihilao, diila mohuto motidupapa lo batanga, eleponu otaawa li Tuani lowatotia ngoa̒amilalo boito.

²³ Ti Tuani lowatotia lotilaio̒ batanga ode Eeya tosologa wau buheli lei̒ tuwotao̒ mamaa-nggowaalo u mailambato lonto Bele lo Eeya. Lapatao̒ ti Tuani lowatotia wau taduduulaa̒ lolipu, mongodile wau mongopipia li Tuani lowatotia longilu to mamaa-nggowaalo boito. Ti Tuani lowatotia helomuji-muji dedeewaalo upilohutu lonto hulawa, talaa̒, tombaha, wate, ayu wau botu, dedeewaalo udiila mowali moo̒onto, meaalo moo̒dungohu boli mongalati wolo-wolo. Ti Tuani lowatotia diila mohulumati Allahu Taa̒ala tamolantu mai tutumulo meaala mate li Tuani lowatotia wau molantu mai dalalo tutumulo li Tuani lowatotia.

²⁴ Uitolo sababuulio Allahu Taa̒ala lolao mai uluu̒ boito u moluladeo̒ tahulii-Lio.

²⁵ Uti-utieelo utula-tuladee boito, ‘Yilia̒apo, yileekeni, tilimenga, tilayadu.’

²⁶ Wau uti-utieelo boliilio: Yilia̒apo, maasa pamalenta li tuani lowatotia mailia̒apo lo Allahu Taa̒ala wau piloo̒ pulitio mao̒;

²⁷ tilimenga, ti Tuani lowatotia maa tilimenga wau ilodungga diila moo̒luli hilao;

²⁸ tilayadu; yilaidia li Tuani lowatotia tilayadio wau yilohilio ode taulo Media wau Persia.”

²⁹ Wolo lolamemeto tei Belsaasar lomalenta mongo pogaweelio alihu mopopake mao̒ olei Daniali jumba lailoumu wau mopo buo̒oheo̒ lante hulawa to buloo̒lio. Lapatao̒ tio malo mudua̒a olei Daniali lowali tao̒kawasa otolulio todelomo yilaidialio.

³⁰ Tou̒ hui boi-boitolo tei Belsaasar olongia lo Babel boito ilopatealio yila-yilateelo mao̒.