DANIALI 4 - KITABI HABARI MOPIOHE

Tei Nebukadnejar luli loo̒ tohiilopo u oluolio

¹ Uti-utieelo poonggumo li Olongia Nebukadnejar u yilaolio ode tau-tauwala monto totoonulalo bangusa, suku lo bangusa wau bahasa to ngoilanggubu dunia: “Salamu salaamati!

² Wau̒ ohilaa mosilita mai pasali u moo̒linggolabe wau muu̒jijati u mapilohutu mai lo Allahu Taa̒ala Taa Laba-labaalo molanggato to olau̒.

³ Donggo boli udaa̒ muu̒jijati u pilohutu-Lio! Donggo boli polutuo̒ u moo̒linggolabe u pilohutu-Lio! Allahu Taa̒ala mamowali olongia u ohiheo-hiheolo mao̒. Tio okawasa mololaalaaita.”

⁴ Wau̒ bilu-biluloa̒ wolo moa̒ahu todelomo bele biluloa̒ saaha li olongiaau̒ wau tumu-tumula wolo halata ulaba-labaalo daatalio.

⁵ Bo tou̒ huilio tuwau tou̒ wau̒ donggo tuutuluhu, wau̒ loo̒ tohiilopo wau loo̒toduo mai bibilohe u malo moo̒ohe hilaau̒.

⁶ Lapatao̒ pilei̒ tiyanguu̒ mai ngoa̒amila tahua̒a mongalati wau motota mololohe dalalio tawoluo to Babel u motombangao̒ boli lo tohiilopo boito to olau̒.

⁷ Bo tou̒ tahi polaamalio, ahali lo tataa-heyaalo uilaapali mopotoduo olootolo gaibu, tau-tauwalo tahi o ilimua wau tahi ahalia lo poliyama boito lonao̒ mai wau sililiitaau̒ tohilopuu̒ boito olimongolio, diaaluo penu boli ngotaa taloo̒ tombanga boliilio.

⁸ Pulitio malonao̒ mai tei Daniali tai̒lunte olo Belsaasar debo odelo tanggulo dewaau̒. Tei Daniali polupolu lorohu dedeewaalo u mantali. Sililiitaau̒ olo tohiilopou̒ olio, loi̒yaau̒ mao̒,

⁹ “Wuu, Belsaasar tau̒wa lotau-tauwalo lotahi o ilimua, otaawau̒ deu̒ yio polupolu lo rohu dedeewaalo u mantali, tilinggula diaaluo hitua-tuawua u milakusudu hetuuo̒lo u leituuo̒ olemu. Dungohi mao̒ tohiilopou̒ botie wau tombanga mai boliilio.

¹⁰ Tou̒ wau̒ donggo tuutuluhu, iloontongau̒ bungo lo ayu ngobungo tohuungo lodunia.

¹¹ Bungo lo ayu boito molanggato daa̒; batangio leidaa̒ wau molotolo. Bolitutui̒o demola hulungo, tilinggula mowali oontonga lotaa ngoa̒amila todunia.

¹² Duungio seehati wau hungolio leta-letaa̒a daa̒, tuheeto ua̒lolio lotuango dunia. Bibii-natangiyalo molinggelo hiluu̒uta towalungo lo wolungio wau bubuu-lungiyalo hipoti beelea to tangolio. Wau ngoa̒amila mahaluku u hitumula moowali mongaa huhuu-ngoolio.

¹³ Tou̒ wau̒ donggo poo̒poo̒oyo hemo mikiilangi mola bibilohe boito, iloontongau̒ ngotaalio lo malai̒kati lotuhutai lonto sologa; tio oontonga mao̒ dapadapato wau hemo poo̒daaha.

¹⁴ Wolo suala daa̒ tio loloi̒ya, ‘Luwodeelo bungo lo ayu boito wau pontodelo tataa-ngoolio, lopuwaalo duduu-ngio wau hua̒yadelo mola hungolio. Lanengaalo bibii-natangiyalo u hiluu̒uta to walungio wau bubuu-lungiyalo u hipoti beelea to tangolio.

¹⁵ Bo huliilo mao̒ tuodio meitolaa todelomo huta. Awadeelo wolo lante wate wau tombaha tulusi tolai mao̒ tohuta luasi u pilobutuo lo huo̒yoto. Huliilo mao̒ tio bataalo wambulo, wau tumumula pee̒-pee̒enta wolo bibii-naatangiyalo wau pipii-lomuwaalo.

¹⁶ Hulii mao̒ aakali lo manusialio mobolio̒ mowali aakali lo binaatangi ngotilonggadu pitu lotaunu mola.

¹⁷ Ui-uitoolo putuusani lami mamaa-lai̒katiyalo tadapa-dapato wau hemo poo̒daaha. Makusudu lami yito alihu tau-tauwalo penu boli tou̒toonu momasisi, deu̒ Allahu Taa̒ala Taa Laba-labaalo molanggato okawasa to yilaidia lomanusia wau yilaidia boito wuduo-Lio ode titaalo tita tatulao-Tio, tumbao̒ ode taa u diila oboliilio sama-samaata wambai̒o!’

¹⁸ Wuu Belsaasar, ui-uitolo tohiilopou̒. Botia poleleaalo mai olau̒ boliilio. Diaaluo penu boli ngotaa mao̒ lonto ngoa̒amila tahua̒a mongalati wau motota mololohe dalalio tawoluo to yilaidiaau̒ moo̒ tombangai, bo yio̒ mowali, sababu yio̒ polupolu lorohu dedeewaalo u mantali!”

Tei Daniali lotombangao̒ boli lo tohiilopo boito

¹⁹ Loo̒dungohe uito, tei Daniali tai̒lunte olo Belsaasar, iloohea wau leitontongo u ngopee̒ mola. Yi wau̒, Olongia Nebukadnejar loloi̒ya mao̒ olio, “Belsaasar, diila mao̒ oohe yio̒ sababu tohiilopo wau boliilio boito.” Tei Belsaasar lolametao̒, “Tuani lowatotia, donggo boli piohio humayaalio totoonulalo umotoduo mai u yilaamali lo tohiilopo boito meidungga ode mumuu-suwaala li Tuani lowatotia wau diila odeli Tuani lowatotia.

²⁰ Bungo lo ayu u iloontonga li Tuani lowatotia boito odito langgato, tilinggula bolitutui̒o demola hulungo, wau mowali oontonga lotaa ngoa̒amila todunia.

²¹ Duungio seehati wau hungolio leta-letaao̒ tilinggula tuheeta u mongohi ua̒alo ode ngoa̒amila tuango dunia. Bibii-natangiyalo molinggelo hiluu̒uta towalungo lo wolungio, wau bubuu-lungiyalo hepoti beelea to tangolio.

²² Yaa Tuani lowatotia, ti Tuanilo watotiaalo bungo lo ayu u molanggato wau molotola boito. Odudaa̒ li Tuani lo watotia oduhenga demola hulungo wau okokawasa li Tuani lo watotia moo̒oma demola huudio lo dunia.

²³ Ti Tuani lo watotia loo̒onto olo ngotaalio lo malai̒kati lotuhutai lonto sologa sambela loloi̒ya mao̒, ‘Luodeelo bungo lo ayu botie wau pobinasaalo mao̒, bo hulii mao̒ bungolio meitolaa to delomo huta. Awade mao̒ wolo lante wate wau tombaha tulusi tolai mao̒ tohuta luasi u pilobutua lo huo̒yoto wolo bibii-natangiyalo ngotilonggadu pitu lotaunu mola.’

²⁴ Tuani lo watotia, uti-utieelo boli lo bibilohe boito, wau uti-utieelo u tilantu mai lo Allahu Taa̒ala Taa Laba-Labaalo Molanggato tomimbihu li Tuani lo watotia lohihilao.

²⁵ Ti Tuani mapo lahiyolio monto huungo ulipu lomanusia wau tumumula towolota lo bibii-natangiyalo to padengo. Ngotilonggadu pitu lotaunu mola ti Tuani lo watotia mamonga huo̒yoto debo odelo sapi wau motuluhe to tanalapa ubua̒-bua̒de, tilinggula mobata lowambulo. Lapatao̒ uito ti Tuani lo watotia mamomasisi mao̒ deu̒ Allahu Taa̒ala Taa Laba-labaalo Molanggato okawasa to bele biluloa̒ saaha li olongia lomanusia, wau bele biluloa̒ saaha li olongia boito wuduo-Lio ode titaalo tita tatilulao-Tio.

²⁶ Mamaa-laikatiyalo lomalentai alihu bohulo wimbihu lo ayu boito poluli mao̒ meitolaa todelomo huta. Uito boliilio mao̒ deu̒ ti Tuani lo watotia mamuli mowali olongia poli lapatao̒ ti Tuani lo watotia momasisi mao̒ deu̒ Allahu Taa̒ala motolo kawasa ngoilanggubu dunia.

²⁷ Sababu uito wajibulio ti Tuani lo watotia modudua̒ nasehati lo watotia. Diilalo mao̒ pohutu dusa, bo pohutua mao̒ wolo mopiohe wau aadili, wau tolia̒ngi mao̒ taa mosikini. Lou̒ odito ti Tuani lo watotia maadebo sanangi tutu.”

²⁸ Ngoa̒amila boito motoduo mai to batangau̒, Olongia Nebukadnejar.

²⁹ Mopulaa dulo hula mola lapatio mao̒, tou̒ wau̒ donggo jale-jaleena to ilengi, u pilomuloa wolo bubuu-ngawaalo wau uwewolio tobele-belea lobele biluloa̒au saaha hudungu lo yilaidiaau̒ to Babel,

³⁰ wau̒ loloi̒ya, “Bilohi, donggo boli polutui̒o kota lo Babel! Wau̒ulo talomongu mao̒ lowali tiilo lokota u mopobukuti mao̒ okokawasa wau olotolu̒, ololamahu wau odudaa̒au̒!”

³¹ Wau̒ diipo lopulita lobisala tou̒ loo̒dungohe suala lonto hulungo, “Olongia Nebukadnejar, dungohi mao̒ utie! Okokawasamu odelo olongia mahilama lonto olemu.

³² Yio̒ mapo lahiyolo monto huungo ulipu lomanusia, wau tumumula wolo bibii-natangiyalo to padengo. Ngotilonggadu pitu lotaunu mola yio̒ mamonga huo̒yoto debo odelo sapi. Lapatao̒ uito yio̒ mamo tolongaku mao̒ deu̒ Allahu Taa̒ala Taa Laba-Labaalo Molanggato okawasa to bele biluloa̒ saaha li olongia lomanusia wau bele biluloa̒ saaha li olongia boito wohi-Lio mao̒ ode titaa lo tita tatilulao-Tio.”

³³ Tou̒ boi-boitoolo olo, tahe-taheaala boito maa lotoduo mai. Wau̒, Nebukadnejar pilopolahilio mao̒ lonto u lipu lo manusia wau yulongaa huo̒yota debo odelo sapi. Batangaau̒ bilatalio lo wambulo, huou̒u̒ maa hilumayaa̒ odelo hayai̒o lai lo bulia, wau luo̒buu̒ odelo hayai̒o luo̒bu odelo hayai̒o luo̒bu lo bulungi.

Tei Nebukadnejar lomuji Allahu Taa̒ala

³⁴ Tou̒ maasa pitu lo taunu boito maa lopaluto, wau̒ yilumanggela mola ode hulungo, lapatao̒ maa longuli mai pikiirangiu̒. Yi pilujiu̒ mola Allahu Taa̒ala Taa Laba-Labaalo Molanggato. Pilopomanggau̒ wau pilopolamahuu̒ Tio taa tumu-tumulo kaakali boito. “Allahu Taa̒ala maa mowali olongia u o hiiheo-hiiheolo mao̒. Tio o kawasa ngohilayaa̒ maasa.

³⁵ Babaa-ngusawalo todunia diila oboliilio. Diaaluo penu boli ngotaa mao̒ tamoo̒ tuwali kahandaki-Lio, diaaluo tabuheli mohintu mao̒ wolo u hepohutuo-Lio.”

³⁶ Tou̒ pikiilangiu̒ luli longuli mai ode olau̒, yi odudaa̒, ololamahu wau omasaahuru lo yialidiaau̒ pilopo walingio mai ode olau̒. Wau̒ bilotulio lomongo pogaweeu̒ wau taduduulaa̒ lo ulipuu̒, wau pilopo walingio ode yilaidiaau̒, tumbao̒ odudaa̒au̒ malebe udaa̒ wolo muloololio mai.

³⁷ Oditolio botia wau̒, Nebukadnejar, momuji, mopolaia̒ wau mopolamahu Olongia lo Sologa. Totoonulalo huhutuu-Lio otutu wau aadili, wau Tio mambo mopodupapa taa u motihutu sombongi.