DANIALI 2 - KITABI HABARI MOPIOHE

Tohiilopo lei Nebukadnejar

¹ Tou̒ huilio tuwau, dulo taunu mola lapatio mao̒ ti Olongia Nebukadnejar helo malenta, tio loo̒ tohiilopo. Tohiilopio boito malo loo̒balisa hilaalio, tilinggula tio diilalo moo̒tuluhe.

² Sababu uito tiliyangio mai tahi polaamalia, ahali lo tataa-heyaalo uilaapali mopotoduo gaibu, hulango wau tau-tauwalo tahi oi̒limua, u motombangao̒ tohiilopio boito.

³ Tou̒ timongolio hitihula totalulio, ti olongia loloi̒ya mao̒, “Wau̒ loo̒ tohiilopo, wau hilaau̒ balisa sababu ohilaa motota mao̒ boliilio!”

⁴ Timongolio lolametao̒ todelomo bahasa lo Aramu, “Pomali-tutuo̒lo mola ti Tuani lowatotia ohiheo-hiheolo mao̒! Ambungualo silitaalo mai tohilopo boito ode mongowatotia, yi mongowatotia mamo tombangai boliilio.”

⁵ Ti Olongia lolametao̒, “Wau̒ malohama mao̒ putuusani botie: Timongoli musi mopoo̒taa mai olau̒ tohiilopo boito, odito olo boliilio. Wonu timongoli diila mambo, timongoli mao̒lo-olotolo wau bele limongoli malohubuolo.

⁶ Bo wonu timongoli mambo, timongoli mawohiya-U̒ palaseni u higaagawa daa̒ wau ohulumati uleidaa̒. Naa poo̒taalo mai botia tohiilopou̒ boito wolo boliilio!”

⁷ Timongolio luli lolametao̒, “Wajibulio ti Tuani lowatotia mopoo̒taapo̒ mai tohiilopo boito ode mongowatiotia, lapatao̒ uito mongowatotia mamo tombangai boliilio.”

⁸ Loo̒dungohe uito ti olongia malo lametao̒, “Tiluhata debo odelo u yilantobuu̒. Timongoli bo hemo polohu-lohudu wakutu wambai̒o, sababu otaawa limongoli deu̒ wau̒ omakusudu

⁹ u mohukuumani olimongoli ngoa̒amila wolo dudelo u tutuuwauwa wonu timongoli diila mambo mopoo̒taa mai olau̒ tohiilopo boito. Timongoli loheeluma u tulusi mohimbulo wau mopoitohe olau̒ wolo halapani deu̒ wau̒ mamo lomelao̒ putuusaniu̒. Naa poleleaalo mai tohiilopo boito, yi mao̒taawau̒ mao̒ deu̒ timongoli mowali motombangai olo boliilio.”

¹⁰ Tahi ahalia boito lolametao̒, “To ngoilanggubu dunia diaaluo penu boli ngotaa mao̒ tamoo̒ poo̒taa mai wolo u kahandakia li Tuani lo watotia boito. Wau diipo pee̒enta mao̒ ngotaalio li olongia, penu boli woloolo mola udaa̒ wau lamahio, helohile wolo moo̒ohuu̒ sua̒li debo odelo uito monto tahi polaamalia, ahali lo tataa-heyaalo uilaapali mopotoduo olootolo gaibu, wau tau-tauwalo tahe oilimua tobele biluloa̒ saaha li olongialio.

¹¹ Ti tuani lowatotia ohilaa hitua-tuawua u mototolo daa̒. Diaaluo penu boli ngotaa mao̒ tamowali mopoo̒polu mao̒ ngopohia dedeewaala, bo dedeewaalo diila bilu-biluloa̒ towolota lo manusia.”

¹² Loo̒dungohe uito ti olongia maloingo daa̒ wau longohi mao̒ palenta u momate-mateelo mao̒ ngoa̒amila tahua̒a mongalati wau motoloo̒ mololohe dalalio tawoluo to Babel.

¹³ Lapatao̒ palenta boito pilo malalumulio mola, wau ngoa̒amila tahua̒a mongalati wau motoloo̒ mololohe dalalio, tuwo-tuwoto tei Daniali wau mongo sahabatilio yilolohio u pateelio mate-mateelo mao̒.

Allahu Taa̒ala lopoi̒laalo mai tohiilopo boito wau boliilio odelei Daniali

¹⁴ Yi tei Daniali lodunggaya mao̒ wolei Ariokh, tau̒wa lo tamoo-kawalia li olongia, tamalo tidapato moponao̒ mao̒ hukuumani mate boito. Wolo ulintapo tei

¹⁵ Daniali lohintu mao̒ olio, yilongola ti olongia malo polualo palenta upala-palangi boito. Tei Ariokh lopoo̒taa mao̒ olei Daniali wolo umalo toduo mai.

¹⁶ Wolo lolamemetao̒ tei Daniali mota lotaalua woli olongia wau lomolohone alihu wohiaalio wakutu u motombanga boli lo tohilopo boito.

¹⁷ Hihileelio tilololimo, lapatao̒ tio lohualinga ode bele wau lopoo̒taa mao̒ ngoa̒amila u lotoduo boito odelei Hananya, Misaeli wolei Ajarya.

¹⁸ Ilahulalio timongolio helodua̒ mola ode Allahu Taa̒ala tosologa alihu Allahu Taa̒ala modehu hilao toli mongolio wau momuo̒ hitua-tuawua u milakusudu hetuu̒olo pasali lo tohiilopo boito. Lou̒ odito timongolio diila tahukuu-maniyolo mate pee̒-pee̒enta wolo ngoa̒amila tahuaa̒a mongalati wau motoloo̒ mololohe dalalio uwewo.

¹⁹ Tou̒ hui boito olo Allahu Taa̒ala lopoo̒taa mai hitua-tuawua u milakusudu hetuuo̒lo boito odelei Daniali todelomo bibilohe tuwau. Yi tei Daniali malomuji mola Allahu Taa̒ala tosologa,

²⁰ ualio mao̒, “Allahu Taa̒ala boito molinepo wau tamolotolo boli buheli daa̒, ilopujiaalo mola Allahu Taa̒ala ohiheo-hiheolo mao̒!

²¹ Eeyaalo tamolantu mai sembo wau maasa, Eeya tamopo bulinggayanga wau momudua̒ tamoo-ngawaasa. Eetaalo olo tamongohi mai tinepo, wau mongohi mai wolo polongalati.

²² Eeyaalo tamomuo̒ mai hitua-tuawua u milakusudu hetuuo̒lo ulaba-labaalo delomio. Otaawa lo Eeya ngoa̒amila u motoduo mai todelomo udiila boti mabaango. Eeya yilanggube lotinela mobaango.

²³ Oo, Allahu Taa̒ala tahe pujaa loluhuru lowatia, Eeya pujio lowatia wau polamahu lowatia. Sababu Eeya longohi mai odelaatia hikimati wau olootolo. Polohone lamiaatia matilolimo lo Eeya. Wau totametai odeli olongia mapiloo̒taa mai lo Eeya.”

Tohiilopo boito piloo̒taa wau tilombangao̒ lei Daniali

²⁴ Lapatao̒ uito tei Daniali lonao̒ mota odelei Ariokh tamaa tiluugasia u momate-mateelo mao̒ ngoa̒amila tahua̒a mongalati wau motota mololohe dalalio to Babel. Ualei Daniali ode olio, “Diila mao̒ patea mate-mateelo mao̒ ngoa̒amila tahua̒a mongalati wau motota mololohe dalalio boito. Delowalo watia motaalua woli olongia, sababu watia ohilaa mopoo̒taa mao̒ boliilo tohilopio boito.”

²⁵ Wolo lolamemeto tei Ariokh lodelo olei Daniali mota lotaalua woli Olongia Nebukadnejar lapatao̒ loloi̒ya mao̒, “Watotia maloo̒ dungga towolota taulo Yahudi tahe pilolayahu ngotaalio tamoo̒ poo̒taa mai boli lo tohilopo li Tuani lowatotia.”

²⁶ Yi malo loi̒ya mao̒ ti olongia olei Daniali tao̒lo iluntee Belsaasar, “Wolo yio̒ mowali mopoo̒taa mai olau̒ tohiilopou̒ wau boliilio olo?”

²⁷ Tei Daniali lolametao̒, “Tuani lowatotia, diaaluo taa o ilimi, ahali lo tataa-heyaalo uilaapali mopotuduo olootolo gaibu, tamoo-lamalia meaalo ahali lo poliyama tamowali mopoo̒taa mai odeli Tuani lowatotia sua̒li boito.

²⁸ Bo tosologa woluo Allahu Taa̒ala tamomuo̒ ngoa̒amila hitua-tuawua u milakusudu hetuuo̒lo, wau Eeya boito tamaa lopoo̒taa mai odeli Tuani lowatotia wolo u mamotoduo mai to dulahee momooli. Botia, poluasia mai watotia motombangai tohiilopo wau bibilohe u tilolimo li Tuani lowatotia tou̒ tuutuluhu boito.

²⁹ Tou̒ ti Tuani lowatotia donggo tuutuluhu, ti Tuani lowatotia lotohiilopo pasali lojamani u mamei dungga mai. Allahu Taa̒ala tamomuo̒ ngoa̒amila hitua-tuawua u milakusudu hetuuo̒lo mopoo̒taa mai odeli Tuani lowatotia wolo u mamotoduo mai.

³⁰ Hitua-tuawua u milakusudu hetuuo̒lo botie mapilo ilaalo mai ode watotia diila sababu watotia lebe motota wolo titaalo tita olo, bo alihu ti Tuani lowatotia mowali motota mao̒ boli lo tohiilopo li Tuani lowatotia boito wau mongalati mao̒ pasali lo tuango hilaa li Tuani lowatotia.

³¹ Uti-utieelo bibilohe u iloontonga li Tuani lowatotia: Totalu li Tuani lowatotia woluo bui̒ tuwau! Bui̒ boito leidaa̒ tutu, wau helingga-linggawa bo lakulio malo moo̒tihela hapato.

³² Lunggongio pilohutulio lonto hulawa tutu, duheelo wau polotodio lonto talaa̒, wohuta wau poyonggilio lonto tombaha,

³³ bungolopalio lonto wate wau oa̒atio ngotayadio lonto wate wau ngotayadio poli lonto huta modudangia.

³⁴ Tou̒ ti Tuani lowatotia donggo hemo lontongao̒, botu tuwau leidaa̒ lolilideo̒ lonto binggai, lou̒ diila tilenggulo tau, lapatao̒ lolemba bui̒ boito to oa̒atio lonto wate wau huta modudangia boito, tilinggula lotoyopu.

³⁵ To saaa̒tilo boito ngoilanggubu bui̒ boito yiloombahu wau lowali huntua lowate, huta modudangia, tombaha, talaa̒, wau hulawa u malo aantulu-aantulu lomao̒ debo odelo peaahuo̒ to tambati hepo lobua̒alo pale tosembo lo polodulahe. Huntua boito hetilu-tilumomboto hiliipa lodupoto, tilinggula diila lololaa mao̒ penu boli ngoi̒di bakasi. Bo botu ulopo woombaheo̒ bui̒ boito lowali debo odelo udaa̒ lohui̒du wau lopoo̒polu ngoilanggubu dunia.

³⁶ Ui-uitolo tohiilopo li Tuani lowatotia wau botia watotia mamo tombangai boliilio.

³⁷ Tamolamahu Tuani lowatotia yito olongia lo totoonulalo olongia; ti Tuani lo watotiaalo talaba-labaalo okawasa. Allahu Taa̒ala tosologa malongohi mai odeli Tuani lowatotia yilaidia botie, okokawasa, olootolo wau odudaa̒.

³⁸ Ti Tuani lowatotia pilopowali-Lio mai tao̒kawasa towimbihu dunia u otuango lipu wau to ngoa̒amilalo bulungi wau binatangi wewolio. Ti Tuani lowatotia lohihilao yito tau̒wa lohulawa tobui̒ boito.

³⁹ Bo lapatio mao̒ yilaidia li Tuani lowatotia mopaluto, malumenetai yilaidia wewo udiila udaa̒ debo odelo daa̒alio lo yilaidia li Tuani lowatotia. Lapatao̒ malumenetai yilaidia otolulio u pilobayahei lo bagiyangi lonto tombaha tobui̒ boito, u mamongawasa ngoilanggubu dunia.

⁴⁰ Wumbutio mola malumenetai yilaidia opaatio, u debo odelo toheeto wate. Wau debo odelo wate u mopotoyopu wau mongantulu yiyii-laidiyalo uwewo boito.

⁴¹ Oa̒ato wau titii-ngongowalo oa̒ato bui̒ u ngotayadu lonto huta modudangia wau ngotayadu wate boito, mopoi̒laalo mai deu̒ todulahee momooli yilaidia boito mamowali hitaya-tayade. Yilaidia boito o lotoolio olo sababu huta modudangia boito o ulau watelio.

⁴² Titii-ngongowalo u ngotayadu monto wate ngotayadu monto huta modudangia boliilio mao̒ deu̒ woluo bagiyangi yilaidia u molotolo wau woluo olo u molulupuhu.

⁴³ Ulaulio wate wolo huta modudangia boito mopobayahu olo deu̒ yilaidia boito mamo tolopani mopoo̒lotolo batanga wolo monika uu̒ulambohe, bo tolopani boito diila ohuna, debo odelo wate diila mowali ngonyawa wolo huta modudangia.

⁴⁴ To maasa pamalenta lomongo olongia boito, Allahu Taa̒ala tosologa mamo potihulai yilaidia tuwau u mamoo̒ taahangi ohiheo-hiheolo mao̒ wau udiila tao̒laahe penu boli lobangusa toonu. Yilaidia boito mamopo antulu-antuluulo mao̒ totoonulalo yilaidia uwewo boito.

⁴⁵ Wolo diila maa iloontongao̒ li Tuani lowatotia deu̒ diila ilotenggula lotau, botu leidaa̒ tuwau lolopato lonto binggi tulusi lolemba wau lopotoyopu bui̒ lowate, tombaha, huta modudangia, talaa̒ wau hulawa boito? Allahu Taa̒ala tau̒daa̒ mopobilohei odeli Tuani lowatotia wolo u de mamotoduo mai. Tohiilopo boito mowali yakiniyalo wau tombango lowatotia tiluhata.”

Tei Daniali lololimo wuupa to huhutu u mopiohu lonto li olongia

⁴⁶ Lapatao̒ malo sujudu ti Olongia Nebukadnejar totalu lei Daniali wau longohi mao̒ palenta alihu tei Daniali hurumatiola wau ode olio musi podewolo bake yilalango wau dedee wowaalo uwewo.

⁴⁷ Ti olongia loloi̒ya mao̒, “Otutu, Daniali, Allahu Taa̒alamu boito udaa̒ tutu to wolota lo totoonulalo Allahu Taa̒ala. Tio yito takawa-kawaasa tou̒ totoonulalo olongia, wau momuo̒ mai totoonulalo hitua-tuawua u milakusudu hetuuo̒lo. Otaawau̒ sua̒li boito sababu mailo mambowamu lotombangai boliilo hitua-tuawua u milakusudu hetuuo̒lo botie.”

⁴⁸ Lapatao̒ tei Daniali yilohiyalio huhuloa̒ ulailaia̒, yilohiyalio dadaata palaseni u higaagawa daa̒, wau piludui̒o lowali gubolonulu lo Babel, wau pilowaliilio tau̒wa ulaiaia̒ daa̒ ode ngoa̒amila tamoo nasehatia tobele biluloa̒ saaha li olongia.

⁴⁹ Bo to hihiile lei Daniali, ti olongia lohudu mao̒ pamalenta polopinsi lo Babel boito odelei Sadrakh, Mesakh wolei Abednego, hiambola tei Daniali lohihilao lotibiluloa̒ to bele biluloa̒ saaha li olongia.