DANIALI 12 - KITABI HABARI MOPIOHE

Pulitio lo jamani

¹ Malai̒kati taa pake-pake pakeeangi lineni boito luli loloi̒ya, “Tou̒ boito maa lumenetai malai̒kati daa̒ Mikhaeli taamoo-duo̒lawa bangusaamu. Lapatao̒ maa woluo mai maasa lou̒ suukali udiaa o baandingilio tumulalo mai woluo babaangusawaala. Bo ngoa̒amila tau monto bangusaamu taa tanggulio u leituladee to delomo buku lo Allahu Taa̒ala mapo aahuwolo.

² Dadaata to wolota limongolio taa maa yilate maa muli mobongu mai; ngotayade mamoo̒lasa tutumulo u kakaali, wau ngotayade poli maa moo̒rasa ohiihina wau oliliheela hapato u kakaali olo.

³ Mongotau̒a taa biijaki maa motinelo debo odelo tinelo hulungo. Wau timongolio taa maa longaajali to taa dadaata u lohutu wolo u mopiohe wau aadili, maa motinelo debo odelo popooliamaalo u o hiiheo-hiiheolo mao̒.”

⁴ Lapatao̒ ualo malai̒kati boito poli odelaatia, “Daniali heu̒utilo buku boito botia, wau dutua mao̒ seeheli alihu debo heu̒uuta de mola pulitio lo jamani. Dadaata tau maa mohimontala motulete wolo udonggo todu-toduo. Bo tolopani limongolio boito maa paracuma ngoa̒amilalo.”

⁵ Lapatao̒ iloontonga lowatia mao̒ duulota mongololai̒. Tangotaalio tihu-tihula to biihu dutulaa wimbihio, wau taa wewo to biihu dutulaa wimbihi mola.

⁶ Tangotaalio lohintu mao̒ ode taa tihu-tihula lebe meembideo̒ wolo dutulaa to wimbihu yitaatio, “Omolua mao̒ totoonulalo u yilowali u moo̒linggolabe botie maa mopaluto?”

⁷ Taa uwewo boito maa lomintaa̒ mola uluu̒lio mohu-mohualia ode hulungo. Ilodungohe lowatia tio lotadia domi Allahu Taa̒ala taa kakaali wau loloi̒ya, “Totoonulalo u yilowali maa pohu-pohutu ngotilonggadu tolo taunu wau ngoputu. Lapatao̒ polongalinaaya umati lo Allahu Taa̒ala mopaluto, yi mopalutao̒ olo totoonulalo u yilowali u moo̒linggolabe boito.”

⁸ Ngoa̒amila u yiloi̒aalio boito memangi ilodungohe lowatia, bo watia diila loo̒paahamu mao̒. Lapatao̒ watia maa malohintu, “Tuani, woloolo mola ngoa̒amila botie mamopaluto?”

⁹ Tio lolametai, “Ponao̒olo botia, Daniali, sababu loi̒ya botie musi tuuo̒lo wau depuheelo de mola pulitio lo jamani.

¹⁰ Daa-daata taa maa ujiolio wau poberesilio mao̒. Timongolio taa hileeta diila taa mongalati wau maa tulusi mohutu u moleeto; bo timongolio taa hibiijakia maa mongalati.

¹¹ Tumulalo mai tou̒ bake tumii̒du dulahee boito pilopohuheeli wau u hi tua-tuwaua u moo̒hililiheela hapato tanggu-tanggula Ololeeto umopo aantulu boito pilopotihulo, mamo palutao̒ ngolihu dulo hetuto tio lopulu hui mola.

¹² Potisanangilo tutu timongolio taa debo satia tunggula to dulahee ngolihu tolo hetuto tolo pulaa limo hui mola.

¹³ Yio̒ Daniali, potisatiaalo tunggula pulitio lo jamani. Yio̒ maa mate, bo maa muli mobongu mai u mololimo wuupamu to pulitio lo jamani.”