DANIALI 10 - KITABI HABARI MOPIOHE

Bibilohu lei Daniali to Dutulaa Tigris

¹ To taunu otolulio pamalenta li Olongia Koresh to Persia, tahuli hitua-tuawua piloi̒laalo odelei Daniali toliilio Belsaasar. Tahuli boito otutu, bo mototola daa̒ pahamuwola. Tou̒ tei Daniali lotolopani u momaahamu mao̒ tei Daniali lololimo tombango pasali lotahuli boito todelomo hitua-tuawua lo bibilohu.

² Tou̒ boito watia donggo lotiitihi batanga lonto oorame lodunia ahadilio totolu polupolu.

³ Ngotilonggadu tou̒ boito watia diila helo lamela ua̒alo u motabo meaalo tapu; watia diila helongilu angguru, wau diila olo helo heide huwoo̒.

⁴ To dulahu odulo pulaa pato hulalo bohulio totaunu boito, watia donggo tihu-tihula tobiihu lo Dutulaa Tigris uleidaa̒ boito.

⁵ Watia lotitalu mao̒, tulusi ilootonga lowatia ngotaalio tapake-pake pakeyangi lo lineni wau bintolo wohuta lonto hulawa tutu.

⁶ Batangalio inta mao̒ inta mao̒ debo odelo polioto, bayalio debo odelo baango tinelo ilato, wau matolio lai̒itao̒-lai̒itao̒ debo odelo tulu. Polotodu wau oa̒atio molilingga debo odelo tombaha u hilihita, wau sualaalio odungohe debo odelo suala lotaa dadaata.

⁷ Bo watia lohihilao taloo̒onto bibilohe boito. Tau-tauwalo tapee̒-pee̒enta wolaatia diila loo̒onto olio, bo timongolio mailoohe tilinggula tilumeteo̒ wau lotituuo̒.

⁸ Watia tilolaalio mota teto tutuuwau, sambela hemo poo̒tuotao̒ bibilohe u moo̒salabangu boito. Watia madiilalo o lotolo wau baya lowatia malo tambuti daa̒.

⁹ Tou̒ watia loo̒dungohe sualaalio, madiilalo lotota lou̒ tau watia tunggula leidambao̒lo mola tohuta.

¹⁰ Lapatao̒ woluo uluu̒ lodedetai olaatia wau lopobongu mola olaatia sambela lotidutaa̒a to uluu̒ wau huu̒u lowatia.

¹¹ Malai̒kati boito loloi̒ya mai odelaatia, “Daniali, yio̒ pilonua lo Allahu Taa̒ala. Pobongulo wau tihuloolo mola tulusi dungohe mai loi̒yau̒ botie mopio-mopiohulo mao̒. Wau̒ botie mailaolio mai ode olemu.” Tou̒ tio loloi̒ya mao̒ odito matilimihula mola watia wolo hulu-huluhelio.

¹² Lapatao̒ ualio mao̒ olaatia, “Daniali, diila mao̒ oohe. Allahu Taa̒ala malo dungohei dua̒amu tumulalo mai tou̒ yio̒ bohulo dulahu lohama putuusani u motidupapa lo batangamu alihu mowali molinepo. Wau̒ malei dungga mai odelo totameto to dua̒amu.

¹³ Malai̒kati tamoo-duo̒lawa yilaidia lo Persia loluwali olau̒ ngotilonggadu ahadilio totolu Lapatao̒ tei Mikhael, tala ngota lomongo tau̒wa lo malai̒kati, lonao̒ mai lotulungi olau̒. Tilolaau̒ mao̒ tio mola teto, to Persia.

¹⁴ Wau̒ monao̒ mai u mohutu olemu u momaahamu mao̒ wolo de mamotoduo mai to bangusaamu. Bibilohe botie pasali lou̒ dulahee momooli.”

¹⁵ Tou̒ tio loloi̒ya mai sua̒li boito, watia lotidungu wau diilalo loo̒bisala.

¹⁶ Lapatao̒ malai̒kati tadebo odelo manusia boito lohudu mai uluu̒lio wau lodedetao̒ biihu lowatia. Watia loloi̒ya mao̒ olio, “Tuani, bibilohe botie helohutu olo watia siluukali daa̒ tilinggula watia diilalo o lotolo sama-samaata.

¹⁷ Watia debo odelo ngotaalio lowato tatihu-tihula totalu li tuanilio. Woloolo mola watia mowali mobisala mai odeli Tuani? Lotolo watia madiduu̒ wau napasi lowatia mototoolo.”

¹⁸ Yi pee̒entapo Tio lodedetai olaatia, tulusi ilolaasawa mai lotolo lowatia mai̒lo duhenga mola.

¹⁹ Tio loloi̒ya, “Allahu Taa̒ala momonu olemu, sababu uito diila mao̒ polawalo meaambo moohe, ntali, powaliilo!” Tou̒ Tio donggo hemobisala mai losua̒li boito, watia molaasa lebe hemo lotolai poli wau loloi̒ya mao̒, “Toduwolo mobisala, Tuani. Ti Tuani maloo̒ lotoolai olaatia.”

^20-21 Lapatao̒ Tio lolametai, “Wolo otaawamu yilongola wau̒ lonao̒ mai ode olemu? Makusuduulio yito u moloi̒a mai olemu wolo utula-tuladee todelomo Buku Obobanari. Botia wau̒ musi muli mohualinga mota mopaatea moluwali malai̒kati tamoo-duo̒lawa lo Persia. Lapatao̒ uito malai̒kati tamoo-duo̒lawa lo Yunani mamei dungga mai. Diaaluo tamaa motulungi olau̒ ngopohia tei Mikhael, malai̒kati tamoo-duo̒lawa Isirai̒lu, lipumu.