DANIALI 1 - KITABI HABARI MOPIOHE

WUNGGULI LEI DANIALI WAU MONGO SAHABATILIO 1:1–6:29 Mongo bohulotau lo Yahudi tobele biluloa̒ saaha li olongia Nebukadnejar

¹ Tolo taunu mola lapatio mao̒ ti Olongia Yoyakim lomalenta Yehuda, tei Nebukadnejar olongia lo Babel, loluhu Yerusalemu wau lomala mao̒.

² Eeya lopoluasi olio lopo olaaheo̒ li Olongia Yoyakim wau helo lambata ngotayadu lonto babaa-langiyalo ohalaga to Bele lo Eeya. Tau-tauwala tahe tilawalo, dilelolio ode kuili lo builio to Babel, wau babaa-langiyalo ohalaga u yilambatio, tilahulio todelomo huhuu-dunguwalo lokuili boito.

³ Lapatao̒ ti olongia lomalentao̒ olei Aspenas, tau̒wa lou̒ ngaalaa̒ lobele biluloa̒ saaha li olongia, u molulaotao̒ towolota lo tahi tilawalo Isirai̒lu dengolo lota tabohulotau wali mai li olongia wau tao̒duhu bangusa.

⁴ Timongolio musi mongo bohulotau tadiila oa̒aibu. Timongolio musi tahi gaagawa, tahi osikolawa molanggato, motoloa̒ wau opongotota u luasi wau paatuti u motuugasi to delomo bele biluloa̒ saaha li olongia. Tei Aspenas musi mongaajali mao̒ olimongolio mobaca wau moluladu bahasa lo Babel.

⁵ Ti olongia lolantu mao̒ olo deu̒ ua̒alo wau u yilumo limongolio musi tutuuwauwa wolo u poheetu duo̒lo pongawaa̒ ngaalaa̒ li olongia. Lapatao̒ tilereeneni ngotilonggadu tolo taunu mola, timongolio musi motaalua woli olongi u mololimo tuugasi tobele biluloa̒ saaha li olongia.

⁶ To wolota lomongo bohulotau boito woluo olo tei Daniali, Hananya, Misaeli wolei Ajarya, ngoa̒amilalo suku lo Yehuda.

⁷ Tau̒wa lou̒ ngaalaa̒ lobele biluloa̒ saaha li olongia lolua̒ao̒ tataa-nggulaalo limongolio lowali: Beltsajar, Sadrakh, Mesakh, wau Abednego.

^8-9 Wolo ponu lo Allahu Taa̒ala, tei Daniali aahadu wau ilotolia̒ngo lei Aspenas. Tei Daniali oteekati u diila moponajisi batangalio wolo ua̒alo wau minumani lo angguru monto bele biluloa̒ saaha li olongia, sababu uito tio lohile olei Aspenas alihu mowali moo̒tapu mai ua̒alo wewo.

¹⁰ Sababu moohe toli olongia, tei Aspenas loloi̒ya, “Ti olongia lohihilao tamaa lolantu mai ua̒alo wau minumanimu, oditolio wonu modudua̒ huhamaalio yio̒ oontonga diila boti seehati wolo mongo bohulotau wewo, tantu wau̒ mapateelio mate-mateelo mao̒.”

¹¹ Lapatao̒ tei Daniali lodulohupa mao̒ sua̒li boito wolo tamoo-kawalia tatiluugasia lei Aspenas u mongulusi olei Daniali wau sahabatilio toulota. Ualei Daniali,

¹² “Tesiyalo mai ami ngotilonggadu mopulu hui mola; wohia mai ami bo wambao̒ saayori wau taluhe u mowali ua̒alo wau minumani lami.

¹³ Lapatao̒ mopulu hui mola, pobandingia mao̒ laku lami wolo laku lomongo bohulotau tahi pongaala ua̒alo u tilantu mao̒ li olongia, lapatao̒ pohamaalo putuusani patopatoa̒ to imato boito.”

¹⁴ Tamoo-kawalia boito akolo wau lohimontala sua̒li boito ngotilonggadu mopulu hui mola.

¹⁵ Lapatao̒ wakutu boito lopulitao̒, timongolio oontonga lebe seehati wau molotolo wolo ngoa̒amila bohulotau tamaa loo̒tapu ua̒alo lonto meja li olongia.

¹⁶ Tumulalo mai tou̒ boito tamoo-kawalia boito diilalo helo pohinta olimongolio ua̒alo wau minumani u matilantu mao̒ li olongia, bolo saayori wau taluhe wambai̒o.

¹⁷ Allahu Taa̒ala longohi ode tabohulotau wopatota boito hikimati wau ahali todelomo ilimi wau kesusasteraa̒ni. Wewolio mao̒ leeto odelei Daniali yilohiya-Lio olo pongotota u motombanga bibilohu wau tohiilopo.

¹⁸ Tou̒ pulitio tolo taunu mola lou̒ maasa pilo sikolawa u tilantu li olongia boito, tei Aspenas malodelo ngoa̒amila tabohulotau boito mota lotaalua woli Olongia Nebukadnejar.

¹⁹ Lapatao̒ lotataameta woli mongolio ngoa̒amila, lotapu mao̒ li olongia deu̒ tei Daniali, Hananya, Misaeli wolei Ajarya mongilabata wolo tawewo-wewoolio todelomo totoonulalo biidangi. Yi matilumula limongolio helo tuugasi todelomo bele biluloa̒ saaha li olongia.

²⁰ Timii̒du ti olongia moo̒owoli mao̒ sua̒li u momalalu tombango wau pomikiilangi, hepoo̒ tuotolio deu̒ nasehati wau huhama lomongo bohulotau wopatota boito poo̒opulu lebe mopioheo̒ wolo nasehati wau huhama lo ngoa̒amila tamoo-lamalia wau ahali tataa-heyaalo uilaapali mopotoduo olootolo gaibu to ngoilanggubu lo yilaidiaalio.

²¹ Tei Daniali debo otuugasi tobele biluloa̒ saaha li olongia demola ti Olongia Koresi lonto Persia lopotaa̒luku Babel.