BOHULO TAWARI 9 - KITABI HABARI MOPIOHE

Tau-tauwala tahe lohualingai lonto polayahu

¹ Ngoa̒amila taulo Isirai̒lu leidaputali helo dudua̒a ngaalaa̒lio ngota-ngota. Daputali boito hituladee todelomo buku lo Mongo Olongia lo Isirai̒lu. Odelo hukuumani to duduu-sawaalo limongolio, yi ulipu lo Yehuda hepilopo layahio.

² To wolota limongolio tabohu-bohulio lohualingai ode huta haku limongolio to kokoo-tawaalo yito taa aawamu, mongo iimamu, taulo Lewi wau tahi pokalajawa Bele lo Eeya.

³ Ngotayadu suku Yehuda, Benyamin, Epraim wau Manasye luli lohualingai wau lotibiluloa̒ to Yerusalemu.

^4-6 Woluo wolomo hetuto tio lopulu lou̒ ngaalaa̒ lonto suku Yehuda tahe lotibiluloa̒ to Yerusalemu, leituwoto wali mai lomongo walae̒e Yehuda tai̒lunte Peres, Syela wau Jerah. Wali mai lei Peresi hetilau̒wa lei Utai. Pilito lo wali mai lei Utai lonto walungo ode yitaato yito tei Utai, Amihud, Omri, Imri wau Bani. Wali mai lei Syela hetilau̒wa lei Asaya. Tio yito tau̒wa lou̒ ngaalaa̒. Wali mai lei Jerah hetilau̒wa lei Yeuel.

^7-9 Tau-tauwalo suku Benyamin tahi biluloa̒wa to Yerusalemu woluo tio lohetuto limo lopulaa wolomo ngaalaa̒. Mongo tau̒wa lou̒ ngaalaa̒ limongolio boito yito: Salu walae̒e Mesulam, wombu lei Hodawya, totu lei Hasenua Yibnia walae̒e Yeroham Ela walae̒e Uji, wombu lei Mikhiri Mesulam walae̒e Sapaca, wombu lei Rehuel, totu lei Yibnia.

Mongo iimamu tahi biluloa̒wa to Yerusalemu

^10-12 Mongo iimamu tawumbutio mola botie hibiluloa̒wa to Yerusalemu: Tei Yedaya, Yoyarib wau Yakhin Tei Ajarya walae̒e Hilkia, loluuhurulio yito tei Mesulam, Jadok, Merayot wau Ahitub. (Tei Ajarya yito tau̒wa lo pogawee to Bele lo Eeya.) Tei Adaya walae̒e Yeroham; loluhuurulio yito tei Pasyhur wolei Malkia. Tei Masai walae̒e Adiel; loluuhurulio yito tei Yahajera, Mesulam, Mesilemit, Imer.

¹³ Mongo iimamu talowali tau̒wa lou̒ ngaalaa̒, ngoa̒amilalo woluo ngolihu pitu lohetuto wolomo pulu lota. Timongolio hiwoolata mokalaja u hidala-dalaala to Bele lo Eeya.

Tau-tauwalo Lewi tahi biluloa̒wa to Yerusalemu

^14-16 Tau-tauwalo Lewi u wumbutio mola botie hibiluloa̒wa to Yerusalemu: Tei Semaya walae̒e Hasub; loluuhurulio yito tei Ajrikam wau Hasabya lonto kaumu Merari Bakbakar, Heres wolei Galal Matanya walae̒e Mikha; loluuhurulio yito tei Jikhri wolei Asap Obaja walae̒e Semaya; loluuhurulio yito tei Galal wau Yedutun Berekhya walae̒e Asa, wombu lei Elkana, biluloa̒lio tomadala kota Netopa.

Tahi pokawalia Bele lo Eeya tabilu-biluloa̒ to Yerusalemu

¹⁷ Tahi pokawalia Bele lo Eeya tabilu-biluloa̒ to Yerusalemu wolo ngaalaa̒ limongolio yito: tei Akuba, Talmon, Ahiman, wau Salum tau̒wa lo tamoo-kawalia.

¹⁸ Tunggula todulahee botie tau-tauwala lonto kaumu limongolio tilugasia helodaha Huhebu Hulubangi li Olongia to ambahu tiimuru. Muloololio mai tau-tauwala lonto kaumu limongolio boito tiluugasia helodaha huhuu-hebuwaalo hulubangi u duludulunga ode kema taulo Lewi.

¹⁹ Tailohia tuugasi helodaha huhebu u tumuwotao̒ ode Kema lo Eeya yito tei Salum wolo tau-tauwalo tangokaumu wolio, deu̒yito-yito kaumu Korah. (Tei Salum yito walae̒e Kore wombu lei Ebyasap.) Muloololio mai loluuhuru limongolio olo helo ponao̒ tuugasi boito tou̒ timongolio helomaya topilo tikemawa lo Eeya.

²⁰ Tei Pinehas walae̒e Eleajar – pohileaala dua̒ Eeya moduo̒lai olio! – pee̒enta pee̒enta helo titau̒wa toli mongolio.

²¹ Tei Jakaria walae̒e Meselemya olo yito tamoo-kawalia huhebu hulubangi Kema lo Eeya.

²² Ngoa̒amila tahe tilulaotio u lodaha huhuu-hebuwaalo hulubangi woluo dulo hetuto mopulaa duulota. Timongolio leidaputali helo dudua̒ kakaa-mbunguwalo tambati biluloa̒ limongolio. Loluuhuru limongolio yilohia tutuu-gasiyaalo boito li Olongia Dauda wau linabi Semuel.

²³ Tumulalo mao̒ uito timongolio wau wali mola limongolio debo tamoodahawa huhebu hulubangi Bele lo Eeya.

²⁴ Woluo wopato huhebu: tuwau totilayo, tuwau to huliaalio, tuwau to tiimuru wau tuwau to otolopa. To timii̒du huhebu boito hepilopo tambatilio ngotaalio lo Lewi talowali tau̒wa lo tamoodahawa.

²⁵ Mongo ilaato limongolio tahi biluloa̒wa to kakaa-mbunguwalo, hemomantu olimongolio bubuulota – timii̒du ngodimingu mola hiheolio.

²⁶ Bo opaato lo tau̒wa tamoodahawa boito debo otuugasi tulusi. Timongolio tatihu-tihula to huhuu-waliyaalo leidaa̒ to Bele lo Eeya wau babaa-langiyalo u tahutahu teto.

²⁷ Timongolio bilubiluloa̒ totili Bele lo Eeya, sababu timongolio musi modaha bele boito wau momuo̒ huhuu-hebuwaalo hulubangilio timii̒du dimodupo.

Tau-tauwalo Lewi uwewo

²⁸ Ngotayadu taulo Lewi uwewo tatihu-tihula to pakaa-kasiyaalo u poi̒baadatialo. Timongoliolo tamo yia̒apo tou̒ poluwalolo wau tou̒ muli powalingo mai.

²⁹ Ngotayade poli tatihu-tihula to aa̒a-latiyaalo ibaadati wau tolabu, angguru, winulo jaitun, alama, wau ramba-ramba.

³⁰ Bo tatihu-tihula mongulau mao̒ ramba-ramba boito yito mongo iimamu.

³¹ Tatihu-tihula mohutu mao̒ dewo u pilanggangi yito ngotaalio lo Lewi tai̒lunte Matica, walao̒ tamohuhula daa̒ lei Salum lonto kaumu Korah.

³² Tau-tauwala monto kaumu Kehat tatihu-tihula u mopodapato roti pohinta ode Eeya timii̒du dulahu Saabati.

³³ Ngotayadu taulo Lewi uwewo otuugasi mowali tamoolahua to Bele lo Eeya. Mongo tau̒wa lou̒ ngaalaa̒ limongolio motibiluloa̒ to demohelu ngoolo hudungu to Bele lo Eeya. Timongolio diila yilohia tuugasi wewo, sababu timongolio hio̒tuugasia hui wau dulahu.

³⁴ Tau-tauwala tai̒lunte to yitaato boito yito mongo tau̒wa lou̒ ngaalaa̒ lo Lewi loduduo̒ pilito lo wali mai limongolio. Timongolio boito yito mongo tau̒wa tahi biluloa̒wa to Yerusalemu.

Loluuhuru wau wali mai li Olongia Saul

³⁵ Tei Yeiel talomongu kota Gibeon, lapatao̒ lotibiluloa̒ teto. Dilelio ilunte Maakha,

³⁶ wau walai̒o talolai̒ tamohuhula daa̒ ilunte Abdon: tawewolio ilunte Jur, Kish, Baal, Ner, Nadab,

³⁷ Gedor, Ahyo, Jakaria wau Miklot,

³⁸ tiyamo lei Simea. Wali mai limongolio lotibiluloa̒ to Yerusalemu wolo ngangaa-laa̒waalo wewo tangokaumu woli mongolio.

³⁹ Tiyamo li Olongia Saul ilunte Kish wau tiyombulio ilunte Ner. Tei Saul owalao̒ talolai̒ wopatota: tei Yonatan, Malkisua, Abinadab, wau Esybaal.

⁴⁰ Tei Yonatan owalao̒ talolai̒ ngota: tai̒lunte Meribaal, tiyamo lei Mikha.

⁴¹ Tei Mikha owalao̒ talolai̒ wopatota: tei Piton, Melekh, Tahrea wolei Ahas.

⁴² Walae̒e Ahas ilunte Yoada owalao̒ talolai̒ toulota: tei Alemet, Asmawet wolei Jimri. Pilito lo wali lei Jimri yito tei Moja,

⁴³ Bina, Rapa, Elasa wolei Ajel.

⁴⁴ Tei Ajel owalao̒ talolai̒ wolomota: tei Ajrikam, Bokhru, Ismai̒la, Searya, Obaja wolei Hanan.